1 Kings 19

1Huan Acab quipohuili isihua Jezabel nochi tlen El'ias quichijtoya huan quejatza quinmictijtoya nochi itiocamanalojcahua Baal. 2Huajca Jezabel quinahuati se tlayolmelajquetl ma quiilhuiti El'ias: "Ma nechmictica nopa dioses intla para mostla ipan ni hora ax nimitzmictijtoc, ta El'ias, queja tiquinmicti itiocamanalojcahua Baal." 3Huajca quema El'ias quimatqui para quinequiyaya quimictise, motlalantejqui huan cholojtejqui para quimanahuis iyolis. Huan yajqui ipan altepetl Beerseba ipan tlali Jud'a, huan nopona quicajtejqui itlatequipanojca. 4Teipa El'ias nejnenqui semilhuitl hasta nopa huactoc tlali, huan mosehuito itzintla se cuahuitl tlen ax quipiya miyac ixihuiyo huan quinequiyaya ma miqui. Quiilhui TOTECO: "¡Ya cuali noTECO! ¡Xinechquixtili noyolis! ¡Pampa na ax m'as nicuali que notatahua!" 5Huan El'ias motejqui itzintla nopa cuahuitl tlen ax quipiya miyac ixihuiyo. Huan quema cochtoya, se elhuicac ejquetl quiojolini huan quiilhui: "Ximehua huan xitlacua." 6Huajca El'ias isac, huan quiitac nechca itzontla eltoya se pantzi tlen icsitoya ipan tetini tlen totonic huan ihuaya eltoya se comitl temitoc ica atl. Huajca mejqui, huan tlacuajqui huan teipa sampa cochqui. 7Pero nopa ielhuicac ejca TOTECO ica ompa quiojolini huan quiilhui: "Ximehua huan sampa xitlacua huan xiatli pampa tlahuel hueyi ojtli mitzpolohua noja." 8Huajca mejqui huan tlacuajqui huan atlic. Huan nopa tlacualistli quimacac fuerza para nejnemis 40 tonali huan 40 yohuali hasta ajsito ipan nopa tepetl Horeb, nopa tepetl tlen Toteco Dios. 9Huan quema ajsito nopona, calajqui ipan se mijca ostotl huan nopona panoc nopa yohuali. Pero se tlajtoli tlen TOTECO ajsic campa ya huan quiilhui: "¿Tlaque tijchihua nica, El'ias?" 10Huan El'ias quinanquili: "Tlahuel nimitztlasomajtoc TOTECO, ta Tlen Tiquinyacana Nochi Moelhuicac Ejcahua Ma Tlatlanitij. Huan nopa israelitame quitlahuelcajtoque nopa tlajtolsencahuali tlen tijchijqui ininhuaya, huan quixolejtoque motlaixpahua huan quinmictijtoque ica machete nochi motiocamanalojcahua. Huan san na noselti nimocajtoc para nimitztequipanos. Huan ama nechtemohuaj para nechmictise nojquiya." 11Huan TOTECO quiilhui: "Xiquisa calteno huan ximoquetza noixtla ipan ni tepetl." Huajca El'ias moquetzqui nopona. Huan TOTECO panoc huan se chicahuac ajacatl quitzohuitejqui nopa tepetl hasta tlapantejque huejhueyi tetini iixpa TOTECO. Pero TOTECO ax itztoya ipan nopa ajacatl. Teipa quema ya panotoya nopa ajacatl mojmolini nopa tlali. Pero TOTECO ax itztoya ipan nopa mojmolinilistli tlen tlali. 12Huan quema ya mojmolinijtoya nopa tlali, teipa oncac se hueyi tlitl, pero TOTECO ax itztoya ipan nopa tlitl. Huan quema ya panotoya nopa tlitl, El'ias quicajqui queja acajya quiixtaca camahuiyaya ica yamanic. 13Huan quema El'ias quicajqui, moixtzajqui ica iyoyo, panquisqui huan moquetzqui campa calajqui ipan nopa mijca ostotl. Huan teipa quicajqui se tlen quiilhui: "¿Tlaque tijchihua nica El'ias?" 14Huan ya quinanquili: "Tlahuel nimitztlasmati TOTECO, ta Tlen Tiquinyacana Nochi Moelhuicac Ejcahua Ma Tlatlanitij. Huan israelitame quitlahuelcajtoque nopa tlajtolsencahuali tlen tijchijqui ininhuaya, huan quixolejtoque motlaixpahua huan quinmictijtoque ica machete motiocamanalojcahua. Huan san na noselti nimocajtoc para nimitztequipanos huan nechtemohuaj para nechmictise nojquiya." 15Huan TOTECO quiilhui: "Ximocuepa ica campa tihualajqui huan xiya ipan huactoc tlali ipan tlali Damasco. Huan quema tiajsis nopona, xijtzonalti ica aceite Hazael para ma eli tlanahuatijquetl ipan tlali Siria. 16Huan Jeh'u, iixhui Nimsi, ticaltis para ma eli tlanahuatijquetl ipan tlali Israel. Huan Eliseo, icone Safat, tlen ehua Abel Mehola, xijtzonalti ica aceite para ma eli se tiocamanalojquetl queja mopatlaca ta. 17Huan tlen mochololtis tlen imachete Hazael, Jeh'u quimictis huan tlen mochololtis tlen imachete Jeh'u, Eliseo quimictis. 18Huan noja niquinpiya seyoc 7 mil tlacame ipan tlali Israel tlen ax motlancuaquetzque iixtla Baal, niyon ax quitzoponijque inintlaixcopincayo." 19Huajca El'ias yajqui huan quipanti Eliseo, icone Safat, tlapoxahuayaya ipan se milcahuali ica 12 pares torojme tlen tlapoxahuayayaj ica se tepos arado huan yajaya yohuiyaya iniica quintequihuiyaya. Huan El'ias yajqui campa itztoya Eliseo huan quitlalili iyoyo tlen huehueyac tlen se tiocamanalojquetl. 20Huajca Eliseo quincajtejqui nopa torojme tlen quintequihuiyaya huan motlalojtihualajqui iica El'ias, huan quiilhui: --Nimitztlajtlan'ia xinechcahuili ma nijtzoponiti notata huan nonana, huan teipa nimitztoquilis. Huan El'ias quiilhui: --Xiya, pero ximoyolilhui tlen nimitzchihuilijtoc. 21Huajca Eliseo quicajqui El'ias huan mocuepqui. Huan quinitzqui ome itorojhua, huan quinmicti, huan quicacatzo ininnacayo huan quintlamacac nopa tlacame tlen itztoyaj nopona. Teipa yajqui ihuaya El'ias huan mochijqui itemach.

will be added

X\