1 Huan nopa tiocamanalojquetl El'ias tlen ejqui ipan Tisbe tlen tlali Galaad quiilhui Acab: "Temachtli nimitzilhu'ia ax tlaahuetzis para se ome xihuitl, niyon huetzis ajhuechtli ipan tlali Israel hasta quema na niquijtos para oncas." 2 Huan TOTECO quiilhui El'ias: 3 "Xiquisa nica huan xiya ica campa quisa tonati huan ximotlati nechca nopa atlajtli tlen itoca Querit tlen mocahua ica campa quisa tonati tlen atemitl Jord'an. 4 Nopona huelis tiatlis ipan nopa atlajtli huan niquinnahuatijtoc totome ma mitzhuiquilica motlacualis." 5 Huajca El'ias quichijqui tlen TOTECO quinahuati huan yajqui para itztoti nechca nopa atlajtli Querit, tlen eltoc iixmelac nopa atemitl Jord'an. 6 Huan nopa totome quihuiquiliyaya pantzi huan nacatl mojmostla ica ijnaloc huan ica tiotlac, huan quiiyaya atl tlen nopa atlajtli Querit. 7 Huan panoc miyac tonali huan teipa huajqui nopa atlajtli Querit pampa ax tlaahuetztoya ipan tlali Israel. 8 Huajca TOTECO quiilhui El'ias: 9 "Ximoquetza huan xiya ipan altepetl Sarepta ipan tlali Sid'on huan xiitzto ipan nopa altepetl. Niquilhuijtoc se cahual sihuatl tlen itztoc ipan nopa altepetl ma mitztlamaca." 10 Huajca El'ias moquetzqui huan yajqui nepa altepetl Sarepta. Huan quema ajsito ipan ipuerta nopa altepetl, quipanti se sihuatl cuapejpenayaya, huan ya quinojnotzqui huan quiilhui: --Na nimitztlajtlan'ia xinechhualiquili se quentzi atl ipan se vaso para niquis. 11 Huan quema nopa sihuatl yohuiyaya para quicuiliti nopa atl, El'ias sampa quinojnotzqui huan quiilhui: --Nojquiya nimitztlajtlan'ia xinechhualiquili se achi pantzi. 12 Huan nopa sihuatl quinanquili: --Temachtli na ax nijpiya niyon se quentzi pantzi ipan nochaj. Pero nijpixtoc se achi harina huan se achi aceite huan ama nijsentil'ia se achi cuahuitl para niquicxitis para nocone huan na para tijcuase huan teipa timiquise ica mayantli. 13 Huan El'ias quinanquili: --Amo ximajmahui. Xiya xijsencahuati queja tiquijtojtoc. Pero achtohui ica nopa harina tlen tijpiya xijchihua se torta pilsiltzi huan xinechhualiquili. Huan teipa xijsencahua seyoc para ta huan para mocone. 14 Pampa TOTECO toDios nochi israelitame quiijto para ax tlamis nopa harina, niyon nopa aceite hasta nopa tonali quema TOTECO quichihuas ma tlaahuetzi ipan ni tlali Israel. 15 Huajca nopa cahual sihuatl yajqui huan quichijqui tlen El'ias quiilhuijtoya. Huan tlacuajqui El'ias, huan nopa sihuatl huan icone. Huan quipixque tlacualistli para miyac tonali. 16 Ax tlanqui nopa harina campa quiajcoctoya, niyon nopa aceite tlen eltoya ipan se soqui xarro, san queja TOTECO quiijtojtoya ica El'ias. 17 Huan se tonali, huetzqui ipan se cocolistli icone nopa cahual sihuatl huan icocolis eliyaya tlahuel chicahuac. Ayoc quipixqui pajtli huan mijqui. 18 Huajca nopa cahual sihuatl quiilhui El'ias: --¿Tlaque nijpiya ica ta tiitlatequipanojca Toteco Dios? ¿Tihualajtoc para tinechilnamiquiltis notlajtlacolhua huan tijchihuas ma miqui nocone? 19 Huan ya quiilhui: --Xinechmaca mocone. Huajca El'ias quicuic nopa piloquichpiltzi huan quihuicac campa ya mocahua huan quitlali nopa piloquichpiltzi ipan tlen ya itlapech. 20 Huan nima momaijto ica TOTECO huan quiilhui: "NoTECO Dios, ¿para tlen tijchijtoc ma mocueso nopa cahual sihuatl tlen ipan ichaj nimocajtoc, huan tijchijtoc ma miqui icone?" 21 Huan teipa motejqui ipan nopa piloquichpiltzi eyi hueltas, huan quitzajtzili TOTECO huan quiilhui: "NoTECO Dios, nimitztlajtlan'ia, xijmaca itonal ni piloquichpiltzi para itztos." 22 Huan TOTECO quitlacaquili tlen tlajtlanqui El'ias huan quichijqui para nopa piloquichpiltzi ma moyoliti. 23 Huan El'ias nimantzi quitlalanqui nopa piloquichpiltzi huan quihuicac campa itztoya inana huan quiilhui: --Xiquita mocone itztoc. 24 Huan nopa sihuatl quinanquili: --Ama nel'ia nijmati cuali para ta tiitlatequipanojca Toteco Dios huan tlen tiquijtohua nel'ia melahuac pampa huala tlen TOTECO.
