1 Kings 15

1Ab'iam pejqui tlanahuat'ia ipan tlali Jud'a quema Tlanahuatijquetl Jeroboam, icone Nabat, yohuiyaya para 18 xihuitl tlanahuat'ia ipan tlali Israel. 2Huan Ab'iam tlanahuati ipan altepetl Jerusal'en eyi xihuitl. Inana itoca eliyaya Maaca tlen elqui iichpoca Absal'on. 3Ab'iam quichijqui san se tlajtlacoli queja itata quichijtoya quema tlanahuatiyaya. Ax quipixqui iyolo xitlahuac iixpa TOTECO Dios tlen elqui iTECO queja eliyaya iyolo David, ihueyi tata. 4Pero pampa TOTECO quiicneli David, noja quinmacac tlanahuatili iixhuihua para tlanahuatise ipan caltlanahuatili ipan Jerusal'en. Huan TOTECO quimacac Ab'iam se icone para tlanahuatis ipan altepetl Jerusal'en quema yajaya miquisqu'ia. 5Huan TOTECO quiicneli David pampa quichijqui nochi tlen cuali iixpa TOTECO. David ax moiyocatlali tlen TOTECO, niyon ax quema quitlahuelcajqui tlen TOTECO quinahuatijtoya ipan nochi tonali tlen iyolis. San ipan nopa tlamantli tlen Ur'ias nopa heteo tlacatl, ax quipacti TOTECO tlen quichijqui. 6Huan oncayaya tlatehuijcayotl ica Ab'iam, icone nopa mijcatzi Roboam, huan Jeroboam nochi tonali tlen ininyolis. 7Huan sequinoc tlamantli tlen panoc ipan itequi Ab'iam huan nochi tlen quichijqui eltoc ijcuilijtoc ipan nopa amatlapohuali tlen itoca Tlen Quichijque Nopa Tlanahuatiani Tlen Tlali Jud'a. 8Huan quema Ab'iam mijqui, quitlalpachojque campa itoca Ialtepe David. Huan tlanahuati icone tlen itoca Asa. 9Huan Asa pejqui tlanahuat'ia ipan tlali Jud'a quema Tlanahuatijquetl Jeroboam yohuiyaya para 20 xihuitl tlanahuat'ia ipan tlali Israel. 10Huan Asa tlanahuati 40 xihuitl ipan altepetl Jerusal'en. Itoca ihueyi nana eliyaya Maaca iichpoca Absal'on. 11Asa quichijqui tlen cuali iixpa TOTECO queja ihueyi tata David quichijtoya. 12Quinquixti nopa tlacame tlen quintocajtiyaya sodomitame para ayoc ma quichihuaca tlen hueli. Huan quinijcueni nochi tlaixcopincayotl tlen itata quinchijchijtoya. 13Huan nojquiya quiquixtili ihueyi nana, Maaca, itequihuejcayo tlen quipiyayaya queja nopa tenan sihua tlanahuatijquetl pampa quichijtoya se tlaquetzali ica nopa tlaixcopincayotl para nopa tiotzi Asera. Huajca Asa quitzontejqui nopa tlaquetzali huan quitlati nechca nopa atlajtli tlen itoca Cedr'on. 14Pero campa tepetini ax senquistoc quinijcueni nochi nopa miyac tlaixpamitl tlen ax elqui queja tlanahuatili campa quihueyichijque TOTECO huan tlaixcopincayotl san sejco. Pero Asa nejnenqui ica iyolo cuali iixpa TOTECO nochi iyolis. 15Nojquiya Asa quitlali ipan itiopa TOTECO nopa oro, plata huan tlamantli tlen tlahuel patiyo tlen itata huan ya quiiyocatlalijtoya para quimacas TOTECO. 16Huan ipan nochi iyolis Tlanahuatijquetl Asa oncayaya tlatehuijcayotl ica Baasa, nopa tlanahuatijquetl ipan tlali Israel. 17Huan Tlanahuatijquetl Baasa calajqui ipan tlali Jud'a huan quichijqui nel'ia cuali tlachijchihuali nopa altepetl Ram'a para nopona mocahuase isoldados para quimocuitlahuise nopa ojtli. Huan quitzajqui nopa ojtli para axaca huelis quisas, niyon calaquis tlen itlal Tlanahuatijquetl Asa ipan tlali Jud'a. 18Huajca quema Baasa calactoya ipan tlali Jud'a, Tlanahuatijquetl Asa quicuic nochi plata huan oro tlen eltoya ipan itiopa TOTECO huan ipan ichaj, huan quitlali nochi ininmaco itlatequipanojcahua. Huan quintitlanqui ma quiitatij Tlanahuatijquetl Ben Adad ipan altepetl Damasco ipan tlali Siria, tlen eliyaya icone Tabrim'on huan iixhui Hezi'on. Huan quiilhui: 19"Ma tijchihuaca se tlajtolsencahuali san sejco queja totatahua quipixque. Xiquita nimitztitlanil'ia regalos tlen oro huan plata. Xijxolehua ama nopa tlajtolsencahuali ica nopa tlanahuatijquetl Baasa tlen tlali Israel para yajaya ma nechtlalcahui huan ayoc nechcuatotonis." 20Huan Ben Adad quiseli nochi tlen quiilhuijtoya nopa tlanahuatijquetl Asa huan quintitlanqui nopa tlayacanani tlen soldados para ma quintehuitij se quesqui altepetini ipan tlali Israel. Huan quintlanqui nopa altepetini tlen Ij'on, Dan, Abel Bet Maaca huan Cineret huan nochi altepetini tlen tlali Neftal'i. 21Huan quema Baasa quimatqui ya nopa, ayoc quisencajqui altepetl Ram'a. Huan mocuepqui ipan altepetl Tirsa ipan itlal. 22Huajca Tlanahuatijquetl Asa tlatitlanqui ma quinnotzatij nochi Jud'a ehuani para ma mosentilise huan para ma ax polihui niyon se. Huan quintequimacac ma quiquixtica nochi tetini huan nochi cuatini tlen Tlanahuatijquetl Baasa quitequihuiyaya para quichihuas m'as cuali nopa altepetl Ram'a. Huan Tlanahuatijquetl Asa quitequihui ya nopa para quinsencahuas altepetini Geba huan Mizpa ipan inintlal iixhuihua Benjam'in. 23Nopa sequin tlamantli tlen panoc ipan itequi Asa, huan nochi ichicahualis huan nochi tlen quichijqui, huan nopa altepetini tlen quinsencajqui, eltoc ijcuilijtoc ipan nopa amatlapohuali tlen itoca Tlen Quichijque Nopa Tlanahuatiani Ipan Tlali Jud'a. Quema eliyaya huehuentzi, quipixqui se cocolistli ipan iicxihua. 24Huan teipa mijqui huan quitlalpachojque campa ihuejcapan tatahua quintlalpachojtoyaj ipan Jerusal'en ipan nopa barrio tlen itoca Ialtepe David. Teipa pejqui tlanahuat'ia icone tlen itoca Josafat. 25Quema Asa yohuiyaya para ome xihuitl tlanahuat'ia ipan tlali Jud'a, Nadab, icone Jeroboam, pejqui tlanahuat'ia ipan tlali Israel. Huan Nadab tlanahuati para ome xihuitl. 26Pero quichijqui tlen ax cuali iixpa TOTECO, huan quichijqui tlajtlacoli queja itata quichijtoya. Huan nojquiya quinchijqui nochi israelitame ma tlajtlacolchihuaca. 27Pero Tlanahuatijquetl Baasa, icone Ah'ias, tlen huala ipan ihueyi familia Isacar, motlalanqui ininhuaya sequinoc ihuampoyohua huan quimicti Nadab nepa ipan Gibet'on, se altepetl tlen filisteo tlacame pampa Nadab huan nochi iisraelita soldados quiyahualojtoyaj nopa altepetl Gibet'on para quitehuis. 28Baasa quimicti Nadab quema Asa yohuiyaya para eyi xihuitl tlanahuat'ia ipan tlali Jud'a. Huan teipa Baasa mochijqui tlanahuatijquetl ipan tlali Israel. 29Huan nima quema Baasa pejqui tlanahuat'ia, quinmicti nochi iteixmatcahua Jeroboam queja TOTECO quiijtojtoya ica itlatequipanojca Ah'ias tlen ehua ipan altepetl Silo para panos. Huan axaca quicajqui ma itzto. 30Queja ni elqui pampa Jeroboam tlahuel tlajtlacolchijtoya huan quichijqui para ma tlajtlacolchihuaca nochi israelitame. Huan tlahuel quicualani TOTECO ininDios israelitame. 31Nochi sequinoc tlamantli tlen panoc ipan itequi Nadab huan nochi tlen quichijqui eltoc ijcuilijtoc ipan nopa amatlapohuali tlen itoca Tlen Quichijque Nopa Tlanahuatiani Ipan Tlali Israel. 32Huan nochi tonali ipan inintlanahuatilis oncayaya tlatehuijcayotl ica Tlanahuatijquetl Asa ipan Jud'a huan Baasa tlanahuatijquetl ipan tlali Israel. 33Huan quema Tlanahuatijquetl Asa yohuiyaya para eyi xihuitl tlanahuat'ia ipan tlali Jud'a, pejqui tlanahuat'ia Baasa, icone Ah'ias, ipan tlali Israel nepa ipan altepetl Tirsa. Huan Baasa tlanahuati 24 xihuitl. 34Huan quichijqui tlen ax cuali iixpa TOTECO huan quisenhuiquili quitoquili ifiero ojhui huan itlajtlacol Jeroboam pampa quinmacayaya israelitame miyac tlaixcopincayotl para ma ica quihueyichihuaca Toteco huan yeca quinchijqui ma tlajtlacolchihuaca.

will be added

X\