1 Kings 10

1Nopa sihua tlanahuatijquetl tlen tlali Sab'a quicajqui para nochi tlacame campa hueli camatiyaya tlen Tlanahuatijquetl Salom'on pampa TOTECO tlahuel quitiochijtoya ica miyac tlalnamiquilistli. Huajca yajqui altepetl Jerusal'en para quiyejyecos itlalnamiquilis ica miyac tlajtlani huan tlamantli tlen ohui. 2Huajca nopa sihua tlanahuatijquetl ajsico ipan altepetl Jerusal'en ica miyac itlapalehuijcahua huan tlahuel miyac camellos tlen quimamajtihualayayaj miyac tlamantli tlaajhuiyacayotl huan tlahuel miyac oro huan piltetzitzi tlen pajpatiyo. Huan quema nopa sihuatl quiitac Salom'on, quicamahui tlen nochi tlen moilhuijtoya ipan iyolo para quitlajtlanis. 3Huan Salom'on quinanquili nochi tlen quitlajtlani. Huan ica nochi tlen quitlajtlani, ax tleno elqui ohui para Salom'on. 4Huan nopa sihua tlanahuatijquetl tlen tlali Sab'a quiitac nochi itlalnamiquilis Salom'on, huan nopa hueyi cali tlen quichijtoya para ipan itztos. 5Huan quiitac nochi nopa tlacualistli tlen eltoya ipan icuamesa huan nopa caltini tlen ipan itztoyaj itlapalehuijcahua huan quejatza inijuanti quimatque tequitij nelcuali huan ininyoyo nelyejyectzitzi tlen moquentiyayaj. Huan quiitac nochi tlen quitequipanohuayayaj Salom'on nojquiya tlahuel yejyectzitzi ininyoyo. Huan quiitac nopa tlacajcahualistli tlen Salom'on temacayaya ipan Ichaj TOTECO huan tlahuel quisentlachili. 6Huan nopa sihua tlanahuatijquetl quiilhui Salom'on: "Nel'ia melahuac tlen nijcajqui ipan notlal tlen nochi tlen tijchijtoc huan tlen nochi motlalnamiquilis. 7Pero ax nijneltocayaya hasta quema nihualajqui. Huan ama, quena, nijneltoca pampa niquitztoc ica noixtiyol. Nel'ia tlahuel hueyi motlalnamiquilis huan nochi nopa ricojyotl tlen tijpiya, huan tlen nijcactoya eltoc nelquentzi ica tlen niquitztoc. 8Motlacajhua huan motlatequipanojcahua nochipa yolpactoque pampa itztoque nochipa moixtla huan quicaquij motlalnamijcayo. 9Ma tijhueyichihuaca TOTECO Dios tlen mitztlapejpeni huan mitztlalijtoc para titlanahuatis ipan tlali Israel. TOTECO tlahuel quinicnel'ia israelitame huan para nochipa quinicnelis huan yajaya mitztlalijtoc tiinintlanahuatijca para xitetlajtolsencahua xitlahuac huan para ma mochihua tlen melahuac nica." 10Huajca nopa sihua tlanahuatijquetl tlen tlali Sab'a quimacac Tlanahuatijquetl Salom'on 3 mil 960 kilos tlen oro, huan miyac tlaajhuiyacayotl huan piltetzitzi tlen tlahuel patiyo. Ax quema ajsitoya ininmaco israelitame miyac tlaajhuiyacayotl queja nopa regalo tlen nopa sihua tlanahuatijquetl tlen tlali Sab'a, quimacac Tlanahuatijquetl Salom'on. 11Huan nopa huejhueyi barcos tlen quinemiltiyaya Tlanahuatijquetl Hiram quihualiquilijque Salom'on miyac oro tlen tlali Ofir. Huan nojquiya quihualicaque miyac cuatini tlen itoca s'andalo huan piltetzitzi tlen yejyectzitzi. 12Ica nopa cuahuitl tlen s'andalo Salom'on quichijqui miyac tlaquetzali para nopa tiopamitl huan para nopa sequinoc caltini tlen ipan itztos. Nojquiya quisencajqui arpas huan salterios para nochi tlen quimatiyayaj tlatzotzonaj. Nopa imiyaca cuahuitl s'andalo ax quema ajsitoya ipan Israel queja nopa. 13Huan Tlanahuatijquetl Salom'on quimacac nopa sihua tlanahuatijquetl tlen tlali Sab'a nochi tlen ya quinejqui huan tlen quitlajtlani iyoca tlen ya quimacatoya queja se regalo. Huan teipa nopa sihua tlanahuatijquetl mocuepqui ipan itlal ininhuaya itlatequipanojcahua. 14Nopa oro tlen quiseliyaya Salom'on sesen xihuitl eliyaya 22 mil kilos. 15Huan ax quipohuayaya tlen quiixtlahuayayaj piso nopa tlanamacani, huan tlen nochi nopa huejhueyi tlanahuatiani tlen tlali Arabia tlaxtlahuayayaj para panose ipan itlal huan tlen tequihuejme tlen nochi itlalhua quiseliyayaj. 16Nopa tlanahuatijquetl Salom'on tlanahuati ma quichihuaca 200 tepos yolixtzajcayotl tlen huejhueyi queja tlen quitequihu'iaj soldados para momanahuise. Huan quinilhui ma quichihuaca ica oro tlen quitejtejtzontoque. Huan ietica sesen tepos yolixtzajcayotl eliyaya eyi kilos tlen senquistoc oro. 17Huan tlanahuati ma quichihuaca 300 yolixtzajcayotl tlen ax m'as huejhueyi nojquiya ica oro tlatepacholi huan sesen tepos yolixtzajcayotl quipixqui ietica nechca ome kilos tlen senquistoc oro. Huan quintlali nopa yolixtzajcayotl ipan nopa hueyi cali tlen quitocajtijque "Cuatitlamitl tlen L'ibano". 18Nojquiya Salom'on tlanahuati ma quichihuaca se tlapechtli huejcapa ihuaya se isiya huan ica leones huan nochi elqui senquistoc tlachijchihuali ica marfil. Huan tlanahuati ma quiixaltica ica oro tlen m'as cuali. 19Huan para ajsis ipan nopa siya tlen huejcapa quipiyayaya chicuase escalones. Huan icuitlapa isiya eliyaya quentzi tolontic. Huan isiya quipixqui campa quitlalisqu'ia ima ipan sesen lado. Huan inechca ima nopa siya ica inejmatl huan ica iarraves quichijque se tecuani tlen itoca le'on tlen ijcatoc. 20Huan nojquiya ipan nopa chicuase escalones quipixqui 12 leones tlen ijcatoque, chicuase ipan sesen lado. Se le'on ipan sesen lado sese escalones. Huan niyon se siya tlen ipan mosehu'ia se tlanahuatijquetl ipan ni tlaltepactli ax elqui nelyejyectzi queja nopa tlen quichijtoya Salom'on. 21Huan nochi nopa vasos tlen ipan quiic nopa Tlanahuatijquetl Salom'on eliyaya senquistoc oro. Huan tlen quitequihuiyayaj ipan nopa cali tlen quitocajti "Cuatitlamitl tlen L'ibano" nochi eliyaya senquistoc oro. Ax tleno tlen plata quipixqui, pampa quema Salom'on itztoya, quiitayayaj nopa plata queja ax tleno ipati eliyaya. 22Pampa ipan hueyi atl Tlanahuatijquetl Salom'on quipiyayaya huejhueyi barcos tlen nemiyayaj ica Hiram ibarcos tlen Tarsis para tlanamacase huan tlacohuase. Huan sesen eyi xihuitl ajsiyayaj huan quihualicayaya oro, plata, marfil, monos huan pavos reales. 23Huajca queja ni Salom'on quipixqui m'as tlalnamiquili huan m'as ricojyotl que nochi sequinoc tlanahuatiani ipan tlaltepactli. 24Huan nochi tlacame tlen campa hueli ipan tlaltepactli quinequiyayaj quiitase Salom'on huan quitlacaquilise itlalnamiquilis tlen Toteco Dios quimacatoya. 25Huan sesen xihuitl nopa tlacame tlen quipaxalohuayayaj quihuiquiliyayaj miyac regalos. Quihualicaque miyac tlamantli tlen oro, plata, yoyomitl tlen yejyectzitzi, tepostli para tlatehuijcayotl, tlaajhuiyacayotl, cahuayojme huan mulas. 26Huan Salom'on quinsentili miyac tlatehuijca carros huan cahuayojme. Quipixqui mil 400 tlatehuijca carros huan 12 mil cahuayojme. Huan quintlali ipan altepetini para tlatehuijca carros huan sequin quintlali nechca ya ipan altepetl Jerusal'en. 27Huan nopa Tlanahuatijquetl Salom'on quichijqui ma onca miyac plata queja elisqu'iaj san tlen hueli tetini ipan altepetl Jerusal'en. Huan cuahuitl tlen tiocuatini tlen patiyo quipixqui campa hueli ipan tlali Jud'a hasta elqui queja ax tleno ininpati queja nopa cuatini sic'omoro tlen axaca huelis quitequihuis pampa ax xitlahuac. 28Nojquiya Salom'on quincojqui cahuayojme tlen tlali Egipto huan tlen tlali Cilicia huan quiniscalti. Nopa tlacohuani tlen quitequipanohuayayaj Salom'on yajque tlali Cilicia para quincohuase queja ininpati eliyayaj. 29Ipan nopa tonali hueliyaya quicohuase tepos carros tlen tlali Egipto ica nechca 7 kilos tlen plata tomi. Huan se cahuayo ipati eliyaya nechca ome kilos tlen plata tomi. Huan ni carros huan cahuayojme Salom'on quinnamaquiltiyaya nochi nopa tlanahuatiani tlen nopa heteos huan nopa Siria ehuani.

will be added

X\