1 CORINTIOS 9

1Na niitlayolmelajca Toteco huan nimalacantoc queja sequinoc. Na niquitztoc Tohueyiteco Jes'us. Inmojuanti intlatzquijtoque ipan Tohueyiteco pampa nopa tequitl tlen nijchijqui campa imojuanti. 2Intla sequinoc quiijtohuaj ax neli niitlayolmelajca Toteco, inquimatij para quena, nel'ia niitlayolmelajca. Nimechilhui itlajtol Toteco huan inquineltocaque, huan yeca imojuanti intenextil'iaj para niitlayolmelajca Tohueyiteco. 3Ica inijuanti tlen tlajtlani tlaque tequihuejcayotl nijpiya, queja ni niquinnanquilis. 4¿Ax inquimatij na huan tlen nohuaya nemij tijpiyaj tequihuejcayotl para tijselise san tlapic tlen tiquise huan tijcuase pampa tiquincamahu'ia tlacame itlajtol Toteco? 5¿Ax inquimatij tijpiyaj tequihuejcayotl para tijpiyasqu'iaj tosihua tlen quineltoca Toteco huan tijhuicasqu'iaj tohuaya ipan totequi queja sequinoc itlayolmelajcahua Toteco quichihuaj, huan queja quichihua Pedro huan iicnihua Tohueyiteco Jes'us? 6¿O huelis inmoilhu'iaj para san Bernab'e huan na ax tijpiyaj tequihuejcayotl para tijcahuase totequi tlen ica timopanolt'iaj? 7Se soldado ax monequi quichihuas seyoc tequitl para tlaxtlahuas itlacualis. Axaca quitoca xocomecatl ipan imil huan teipa ax quipiya mano para quicuas. Axaca quinmocuitlahu'ia chivojme huan ax quipiyaj mano quiis ininlechi. 8Ax san niquijtohua ni pampa queja nopa nimoilhu'ia, pero itlanahuatilhua Mois'es nojquiya queja nopa quiijtohuaj. 9Ijcuilijtoc ipan itlanahuatilhua Mois'es campa quiijtohua: "Amo xijcamailpi nopa huacax tlen ipan moquejquetza trigo para quiyolquixtis." ¿Inmoilhu'iaj Toteco techmacac ni tlajtoli pampa moilhuiyaya san tlen huacaxme huan tlen tlacuasqu'iaj? ¡Ax neli! 10Yajaya moilhuiyaya nojquiya tlen tojuanti tlen tiitequipanojcahua. Quena, Toteco quiita para quinamiqui se tlen tlapoxahua ipan mila, o se tlen pixca, ma tequitis cuali pampa quimati quiselis se parte tlen nopa pixquistli. Huan quinamiqui para tojuanti tiitequipanojcahua, ma tijselica tlen ica tipanose tlen nopa tlacame tiquinpalehu'iaj. 11Tojuanti tijtoctoque itlajtol Toteco campa imojuanti huan ya nopa tlen tlahuel monequi para imotonaltzitzi, huajca ax se hueyi tlamantli intla intechmacasqu'iaj tlen ica tipanose. 12Intla quinamiqui quema inquinmacaj nopa sequinoc tlen ama inmechmacht'iaj tlen ica panose, achi m'as quinamiqui intechmacase tojuanti tlen achtohui timechilhuijque tlen Cristo. Pero yonque tijpiyaj tequihuejcayotl para tijselise tlen ica tipanose, ax tijtequihuijtoque nopa tequihuejcayotl. San tiquijiyohu'iaj, huan ax timechilhu'iaj quema techpolohua se tlajquiya. Tijchihuaj ya ni pampa ax tijnequij tijchihuase niyon se tlamantli tlen huelis quitzacuilis nopa cuali tlajtoli tlen Cristo. 13¿Ax inquimatij nopa israelitame tlen tlatequipanohuaj ipan ichaj Toteco ica nopa tlamantli tlen tlatzejtzeloltique, quicuaj nopa tlacualistli tlen tlacame quihuicaj ipan itiopa Toteco? Nojquiya tlen tlatequipanohuaj iixtla nopa tlaixpamitl, quicuaj tlen nopa tlacajcahualistli tlen tlacame temacaj ipan tlaixpamitl. 14Queja nopa nojquiya Toteco quisencajtoc para tojuanti tlen tiquincamahu'ia itlajtol Toteco ma tijselica tlen ica tipanose tlen nopa tlacame tlen tiquinpalehuijtoque ma tlaneltocaca. 15Pero ax nijtequihuijtoc niyon quentzi ni tequihuejcayotl tlen itequipanojcahua Toteco quipiyaj. Huan ax nimechtlajcuilhuil'ia ya ni para nimechtlajtlanis xinechpanoltica. Nijpiya miyac paquilistli para niteilhuis itlajtol huan ax tleno nijsel'ia tlen imojuanti. Nipaqui pampa nitequiti para nijpiyas tlen ica nipanos. Huan nijnequisqu'ia nimiquis intla se tlacatl nechtzacuilisqu'ia para ma ayoc nimopanolti noselti. 16Ax hueli nimohueyimatis pampa nitlacamanalos itlajtol Toteco pampa yajaya Toteco nechtequimacac huan nechilhui ma nijchihua. Ninelteicneltic na intla ax nitlacamanalosqu'ia itlajtol. 17Intla nitlacamanalos itlajtol ica nopaquilis, nijselis notlaxtlahuil. Pero yonque ax nijnequisqu'ia, noja monequi nitlacamanalos itlajtol, pampa Toteco quitlali nomaco ni tequitl huan monequi nijchihuas. 18Huan ¿tlaque tlaxtlahuili nijsel'ia? Notlaxtlahuil eltoc nopa paquilistli tlen nijpiya pampa axaca monequi tlaxtlahuas tlen nijtequihu'ia quema nitecamahu'ia itlajtol, yonque nel'ia nijpiya tequihuejcayotl para sequinoc nechpanoltisqu'iaj pampa niitequipanojca Toteco. 19Yonque nimalacantoc huan ax niiaxca niyon se tlacatl tlen nechcojtoc para ma nieli niitequipanojca, na nimochijtoc niinintequipanojca nochi tlacame para huelis niquintlanis m'as tlacame para Cristo. 20Quema niitztoc ininhuaya sequinoc israelitame, nimochihua queja se tlen inijuanti para huelis niquintlanis para Cristo. Nojquiya nimochihua quema niitztoc ininhuaya tlen quintoquil'iaj itlanahuatilhua Mois'es. Quena, yonque nopa tlanahuatili ayoc quipiyaj tequihuejcayotl noca na, ica nopaquilis nijtoquil'ia para huelis niquintlanis tlacame tlen quintoquil'iaj nopa tlanahuatili. 21Quema niitztoc ininhuaya tlacame tlen ax quiixmatij itlanahuatil Mois'es, ax nicamati queja niquixmatisqu'ia nopa ley. Pero ax nijchihua tlamantli tlen ax cuali tlen itlanahuatil Toteco techilhu'iaj ma ax tijchihuaca. San nijtoquil'ia nopa tlanahuatili tlen Cristo techmacatoc para huelis niquintlanis para Cristo nopa tlacame tlen ax quimatij itlanahuatilhua Mois'es. 22Quema niitztoc ininhuaya tlacame tlen sequinoc quintlaijiyohuilt'iaj pampa ax quipiyaj chicahualistli, nimochihua queja se tlen ax quipiya chicahualistli para huelis niquintlanis para Cristo. Huan san se nijchihua ica nochi tlacame. Miyac nimoyolilhu'ia queja nimochihuas ica sesen tlacatl para huelis niquinpalehuis sequin para ma momaquixtica. 23Huan nochi nijchihua para ma momahua nopa cuali tlajtoli, huan para huelis nijselis nojquiya nopa tlatiochihualistli tlen itlajtol temaca. 24Campa tlacame motlalohuaj para quiitase ajqueya tlatlanis, yonque miyac tlacame motlalohuaj, san setzi quitlanis nopa tlen quitencajtoque quimacase nopa tlatlanquetl. Huajca imojuanti nojquiya xitequitica chicahuac ipan Toteco para intlatlanise. 25Nochi tlacame tlen motlalohuaj tlamiyacapa para quiitase ajqueya tlatlanis, monahuat'iaj chicahuac huan quicahuaj miyac tlamantli tlen hueli quinquixtilis ininchicahualis. Queja nopa quichihuaj pampa quinequij quitlanise nopa xochi corona yonque teipa nopa xochi corona pilinis. Pero ica tojuanti, titequitij chicahuac ipan itequi Toteco pampa yajaya techmacas se corona tlen ax quema pilinis. 26Huajca na nimochihua queja se tlen motlalohua xitlahuac hasta campa ontlami ojtli. Queja se tlen quipiya itequi para tlatehuis tlamiyacapa huan quichihua ica nochi ichicahualis, na nojquiya nitequiti ica nochi noyolo quema nijchihua itequi Toteco. 27Queja se tlen tlatehu'ia quichihua para itlacayo ma eli tetic, na nijnahuat'ia notlacayo huan nijchihua ma eli notequipanojca. Niquinilhuijtoc miyac tlacame quejatza ma quitoquilica ipaquilis Toteco, huan ax nijnequi nijchihuas se tlamantli tlen ax senquistoc cuali huan quichihuas para ax hueli nijselis tlen Toteco quitencajtoc para quimacas nopa tlatlanquetl.

will be added

X\