1 CORINTIOS 4

1Huajca quema inmoilhu'iaj tlen Apolos huan na, xijmachilica para tojuanti san tiitequipanojcahua Tohueyiteco Cristo tlen techtequimacatoc para ma titlayacanaca para titlamachtise nopa tlamantli tlen achtohuiya axaca quimatiyaya tlen Toteco. 2Inquimatij quema se tecojtli quitequimaca se itequipanojca ma eli se tlayacanquetl ipan se tequitl, monequi nopa tequitiquetl ma eli temachtli huan quitlamichihua nochi tlen iteco quiilhuijtoc ma quichihua. 3Huelis innechitaj para niitztoya temachtli ipan notequi, o huelis axtle. Para na, ax hueyi ipati tlaque imojuanti o tequihuejme moilhu'iaj quema nechtequitlachil'iaj. Niyon na ax nimotequitlachil'ia, 4pampa yonque noyolo ax nechteilhu'ia para nijchijtoc tlen ax cuali, ax ya nopa tlen ipati. San ipati tlen Toteco quiijtos quema yajaya nechtequitlachilis. San yajaya quiijtos intla cuali o ax cuali tlen nijchihua. 5Huajca ayoc xitetlajtolsencahuaca huan xiquijtoca ajqueya quichihua tlen cuali huan tlen ax cuali ipan itequi Toteco quema noja aya ajsi hora. Xijchiyaca hasta hualas Tohueyiteco para tetlajtolsencahuas. Quema Toteco hualas, yajaya quipannextis tlamantli tlen ama motlatijtoc ipan iyolo sesen tlacatl, pampa ipan nopa tonal Toteco quipannextis nochi tlen sesen tlacatl moilhuiyaya ipan iyolo huan para tlen quichijqui tlen quichihuayaya. Huajca ipan nopa tonal, quena, Toteco quinhueyitlalis nopa tlacame intla quinamiqui. 6Huajca noicnihua, nica nicamatiyaya tlen Apolos huan na san para xijmachilica ax cuali para miyac inquihueyitlalise se tlacatl huan ax queja ijcuilijtoc ipan Itlajtol Toteco. Ax cuali para inquichicoicnelise se itlamachtijca Toteco huan inmohueyimatise pampa inmechmachtijtoc huan inquihuejcamajcahuase seyoc. 7¿Ajqueya inmechilhui para achi m'as inquimatij queja sequinoc? Nochi tlen inquimatij, Toteco inmechmacatoc nopa tlalnamiquilistli. Nochi tlen inquipiyaj inquiselijtoque ipampa ya. Huajca, ¿para tlen inmohueyimatij queja inquipantijtosqu'iaj nopa tlalnamiquilistli ica imoseltitzitzi? 8Nesi queja inmoilhu'iaj inquipiyaj nochi tlen inquinequij tlen temaca Toteco. Inmoilhu'iaj intlapijpixtoque. Yonque tojuanti aya titlanahuat'iaj, inmoilhu'iaj ya intlanahuatiani. Nipaquisqu'ia intla nel'ia ajsitosqu'ia nopa tonali quema Toteco inmechchihuas intlanahuatiani, pampa ipan nopa tonali tojuanti nojquiya tiitztose titlanahuatiani huan tijpiyase tequihuejcayotl queja imojuanti. 9Pero quemantzi nimoilhu'ia Toteco techtlalijtoc tiitlayolmelajcahua inintepotzco nochi tlaneltocani. Tiitztoque queja tlacame tlen se tlatlanquetl quinpannext'ia tlamiyacapa para quintlantoc ipan tlatehuilistli huan san timochiyaj ajqueya techmictis. Eltoc queja nochi techtlachil'iaj hasta nopa elhuicac ehuani nojquiya. 10Tlacame techitaj tiitlayolmelajcahua queja tihuihuitique pampa tiquicnel'iaj Cristo, pero imojuanti inmochihuaj queja tlen m'as intlalnamiquij. Tojuanti ax tijpiyaj chicahualistli, pero imojuanti quena, inmochihuaj queja miyac inquipiyaj. Tlacame ipan ni tlaltepactli inmechtlepanitaj, pero tojuanti techtlaijilhu'iaj. 11Hasta ama tiitlayolmelajcahua Toteco techpolohua tlen ica tipanose. Timayanaj, tiamiquij huan ax tijpiyaj tlen ica timopiquise. Ax tijpiyaj tochaj tlen nel'ia toaxca huan miyac huelta tlacame techhuijhuitequij. 12Tojuanti ica miyac tlaijiyohuili titequititoque ica toma para tijtlanise tlen ica tipanose. Quema tlacame techtelchihuaj, tijtlajtlan'iaj Toteco ma quintiochihua. Quema techtlaijiyohuilt'iaj, tiquijiyohu'iaj. 13Tijpiyaj toyolo huan tiquincamahu'iaj ica cuali nopa tlacame tlen toca camatij. Tlacame techitaj queja tlasoli ipan ni tlaltepactli. San quinequij techtepehuase pampa moilhu'iaj ax tleno topati. Quena, queja nopa eltoc hasta ama. 14Ax nimechtlajcuilhuil'ia ni tlamantli para nimechpinahualtis, pero nijnequi nimechmatiltis tlen melahuac pampa initztoque queja innoconehua tlen nimechicnel'ia. 15Huan yonque inquipiyaj majtlactli mil tlamachtiani tlen inmechmacht'iaj tlen Cristo, ax inquipiyaj miyac imotatahua, pampa san na niimotata ipan Cristo Jes'us pampa achtohui nimechilhui itlajtol Toteco huan inquineltocaque. 16Huajca ica nochi noyolo nimechtlajtlan'ia, xijtoquilica tlen na nijchijtoc huan queja nopa xijchihuaca. 17Huan yeca nijtitlantoc Timoteo ma yohui inmechitati para inmechpalehuis inquichihuase tlen na nijchihua. Yajaya niquicnel'ia miyac queja nocone huan temachtli quitoquil'ia Toteco. Yajaya inmechilnamiquiltis tlen nijchijtinentoc para nijtoquilis Cristo Jes'us. Huan tlen inmechilhuis eltoc tlen niquinmacht'ia tlaneltocani ipan nochi tiopantini tlen mosentil'iaj campa hueli. 18Sequin imojuanti inmohueyimatij huan inmoilhu'iaj ax quema niyas sampa nepa campa initztoque para nijmatis tlaque inquichihuaj. 19Pero, quena, ax huejcahuas para niyas nopona, intla queja nopa quinequi Toteco. Huan niquitas intla inijuanti tlen mohueyimatij nel'ia quipiyaj ichicahualis Toteco o intla san quinpact'ia mohueyimatise quema camatij. 20Pampa tlacame tlen quicahuil'iaj Toteco ma quinnahuati ax san camatij, pero quipiyaj chicahualistli. 21Huan ¿tlaque inquinequij ma nijchihua? ¿Inquinequij ma niya nimechtlacahualtiti ica tlen ax cuali inquichihuaj? O ¿inquinequij inquichihuase tlen cuali huan nimechcamahuiti ica cuali huan ica tlaicnelijcayotl?

will be added

X\