1 CORINTIOS 2

1Huajca, noicnihua, quema achtohui niyajqui campa imojuanti para nimechilhuis itlajtol Toteco, ax nimechcamahui ica huejhueyi tlajtoli, niyon ax nimochijqui queja nineltlalnamiqui. 2Nimoilhui para m'as cuali para san nimechcamahuis tlen Jesucristo huan queja yaja mijqui ipan cuamapeli topampa huan ax tleno m'as nimechilhui. 3Huan quema niitztoya imohuaya, ax nijpixqui chicahualistli. Nimomajmatiyaya huan nihuihuipicayaya imoixtla. 4Huan ax nimechcamahuiyaya ica yejyectzi tlajtoli tlen quinexti itlalnamiquilis se tlacatl, pero quema nimechcamahuiyaya, ichicahualis Itonal Toteco monexti ipan notlajtol. 5Pampa ax nijnequiyaya ximotemachica ipan inintlalnamiquilis tlacame, pero quena ipan ichicahualis Toteco. 6Pero quema tiquincamahu'iaj tlaneltocani tlen cuali quimachil'iaj Itlajtlol Toteco, tiquincamahu'iaj ica tlajtoli tlen quinext'ia miyac tlalnamiquilistli. Pero totlajtol ax quinext'ia nopa tlalnamiquilistli tlen eltoc ipan ni tonali, niyon ax quinext'ia nopa tlalnamiquilistli tlen quinpact'ia tlayacanani tlen itztoque ama pampa inijuanti san panoni. 7Pero tiquincamahu'iaj tlacame ica tlajtoli tlen quinext'ia itlalnamiquilis Toteco tlen achtohuiya axaca quimachiliyaya. Quena, huejcajquiya quema aya pehuayaya tlaltepactli, Toteco moyolilhui huan quisencajqui nochi nopa cuajcualtzi tlamantli tlen techchihuilisqu'ia teipa ipan Cristo, pero ax quincahuili tlacame ma quimatica hasta ipan ni tonali. 8Huan niyon se tlayacanquetl ipan ni tlaltepactli ax quimachili tlen quichihuayaya Toteco, pampa intla quimachilijtosqu'iaj, ax quicuamapeloltijtosqu'iaj Tohueyiteco tlen onpano quipiya chicahualistli. 9Eltoc queja ijcuilijtoc ipan Itlajtol Toteco campa quiijtohua: "Axaca quiitztoc, niyon quicactoc, niyon moilhuijtoc, queja onpano yejyectzi nopa tlamantli tlen Toteco quisencajtoc para quinmacas nopa tlacame tlen quiicnel'iaj." 10Pero tojuanti tijmatij tlen nopa yejyectzi tlamantli pampa Toteco technextilijtoc ica Itonaltzi, pampa Itonaltzi quimati huan quitlachil'ia nochi tlen moilhu'ia Toteco huan technextil'ia hasta nopa tlamantli tlen m'as hueyi tlen moilhu'ia Toteco. 11Axaca hueli quimati tlen seyoc tlacatl moilhu'ia, pero itonal nopa tlacatl, quena, quimati nochi tlen eltoc ipan iyolo. Nojquiya axaca quimati tlen moilhu'ia Toteco, san Itonal Toteco, quena, quimati. 12Huan Toteco ax techmacatoc se tonaltzi tlen hualajqui ipan ni tlaltepactli. Yajaya techmacatoc Itonaltzi para huelis tijmatise nochi nopa tlamantli tlen techmacac san tlapic quema techmaquixti. 13Huan tiquinilhu'iaj tlacame tlen nopa tlamantli quema titecamahu'ia itlajtol. Pero quema tiquincamahu'iaj, ax tijtequihu'iaj tlajtoli tlen huala ipan totlalnamiquilis titlacame, san tijtequihu'iaj tlajtoli tlen Itonal Toteco techmacht'ia. Quena, queja nopa tijtequihu'iaj tlajtoli tlen Itonal Toteco techmaca para tiquinmachtise tlacame nochi tlen melahuac para inintonaltzitzi. 14Pero tlacame ipan ni tlaltepactli tlen aya quineltocaj Toteco huan aya quipiyaj Itonaltzi ipan ininyolo ax quimachil'iaj, niyon ax quisel'iaj, tlen Itonal Toteco tlamacht'ia, pampa quicaquij para san se huihuiyotl. Nel'ia inijuanti ax hueli quimachilise tlen Itonal Toteco tlamacht'ia pampa monequi quipiyase Itonal Toteco ipan ininyolo para quicaquise huan quimachilise. 15Pero se tlacatl tlen quipiya Itonal Toteco ipan iyolo, quena, yajaya quiyecohua huan quimachil'ia nochi ni tlamantli tlen Itonal Toteco tlamacht'ia, pero sequinoc tlacame ipan ni tlaltepactli ax hueli quimachil'iaj nopa tlacatl. 16¿Quejatza huelis quimachilise? Ipan Itlajtol Toteco ijcuilijtoc campa quiijtohua: "¿Ajqueya hueli quimachil'ia itlalnamiquilis Toteco? Axaca hueli quimachtis Toteco tlaque monequi quichihuas." Pero tojuanti, quena, tijmachil'iaj ni tlamantli pampa tijpiyaj itlalnamiquilis Cristo.

will be added

X\