1 CORINTIOS 14

1Huajca achi m'as xijchihuaca fuerza xiquinicnelica sequinoc, pero nojquiya xijnequica miyac para Itonal Toteco ma inmechmaca se yajatili o se tlalnamiquilistli tlen yajaya quimaca se tlacatl para huelis quichihuas itequi. Huan achi m'as xijnequica para Itonal ma inmechmaca nopa chicahualistli queja se tiocamanalojquetl para incamatise itlajtol Toteco. 2Pampa se tlen quipiya chicahualistli para camatis ica seyoc tlajtoli tlen ax momachtijtoc, quicamahu'ia Toteco, pero ax quincamahu'ia tlacame pampa tlacame ax hueli quimachil'iaj. Yajaya san camati tlamantli tlen ixtacatzi tlen Itonal Toteco quimacatoc para ma quiijto. 3Pero se tiocamanalojquetl camati itlajtol Toteco huan quinpalehu'ia tlacame para ma moscaltica ipan Toteco, huan quinfuerzajmaca huan quinyolchicahua tlaneltocani. 4Huajca se tlen camati seyoc tlajtoli, mopalehu'ia iselti para achi m'as quineltocas, pero se tlen camati para Toteco, quinpalehu'ia nochi nopa tlasentilistli tlen tlaneltocani para achi m'as quineltocase Tohueyiteco. 5Na nipaquisqu'ia intla nochi imojuanti inhuelisqu'iaj incamatisqu'iaj ica sequinoc tlajtoli, pero achi m'as nipaquisqu'ia intla inquipiyasqu'iaj chicahualistli queja se tiocamanalojquetl para incamatisqu'iaj para Toteco. Pampa achi m'as ipati se tlen camati para Toteco que se tlacatl tlen camati seyoc tlajtoli intla axaca hueli quiixtoma tlen quiijtohua para huelis quinpalehuis ma moscaltica nochi nopa tlasentilistli tlen tlaneltocani. 6Noicnihua, intla niyasqu'ia campa imojuanti huan nicamatisqu'ia ica seyoc tlajtoli tlen ax inquimachil'iaj, ¿quejatza nimechpalehuisqu'ia? Pero quena, nimechpalehuis intla nimechilhuis nopa tlen Toteco nechnextilijtoc, o nimechmatiltis achi m'as tlen melahuac, o nimechilhuis itlajtol Toteco tlen yaja nechmacatoc, huan nochi nimechilhuisqu'ia ipan imotlajtol tlen inquimachil'iaj. 7Nimechmacas se huicaltili. Intla se tlapitza o tlatzotzona, huan axaca hueli quimachil'ia tlaque huicatl quitzotzona, huajca san tlapic. 8Huan ipan se tlatehuijcayotl intla yajaya tlen tlapitza ax quimati quipitzas nopa huicatl para quinnotzas tlacame ma mosentilica, huajca axaca quimatis intla monequi mosentilise para tlatehuise, o axtle. 9San se ica imojuanti. Intla ax inquiijtohuaj tlajtoli tlen nochi huelis quimachilise, axaca quimatis tlen inquiijtohuaj huan san tlapic imotlajtol. 10Melahuac onca miyac tlamantli tlajtoli tlen tlacame camatij ipan ni tlaltepactli. Huan sesen tlajtoli quipiya tlen quinequi quiijtos para tlen quimachil'iaj. 11Pero intla ax nihueli nijmachil'ia tlen sequinoc quiijtohuaj, yajaya tlen camatij nechitase queja nisejcoyoc ejquetl huan na niquinitas nojquiya para inijuanti sejcoyoc ehuani. 12Huajca imojuanti tlen tlahuel inquinequij chicahualistli tlen Itonal Toteco temaca, xijnequica nopa tlamantli chicahualistli tlen achi m'as quinpalehuis sequinoc ipan itiopa Toteco para m'as ma moscaltica. 13Intla se hueli camati tlajtoli tlen ax momachtijtoc, ma quitlajtlani Toteco para nojquiya huelis quiixtomas tlen quiijtojtoc. 14Pampa intla nimomaijtohua ica Toteco ica tlajtoli tlen ax nijmachil'ia, huajca eltoc queja notonal momaijtohua pero notlalnamiquilis ax tleno quichihua. 15¿Tlaque nijchihuas huajca tlen m'as cuali? M'as cuali nimomaijtos ica notonal huan nijtequihuis tlajtoli tlen nijmachil'ia. Huan nihuicas ica notonal huan nihuicas ica tlajtoli tlen nijmachil'ia. 16Pampa intla inquipaquilismacaj Toteco ica imotonal pampa incamatij tlajtoli tlen ax inmomachtijtoque, nopa tlacame tlen itztoque ipan tlasentilistli imonechca ax huelis quiijtose: "Queja nopa ma eli", huan quihueyichihuase Toteco imohuaya, pampa ax quimachil'iaj tlen inquiijtohuaj. 17Huajca, yonque inquitlascamatij Toteco ica yejyectzi ica nopa tlajtoli tlen inhuelij incamatij, ax tleno quinpalehu'ia sequinoc para ma moscaltica ipan Toteco. 18Nijtlascamati Toteco para achi m'as nicamati ica tlajtoli tlen ax nimomachtijtoc que nochi imojuanti. 19Pero quema niitztoc ipan tlasentilistli ipan tiopa, m'as cuali niquijtosqu'ia san macuili tlajtoli ica notlalnamiquilis huan ica tlajtoli tlen nochi quimachil'iaj huan niquinpalehuis sequinoc, huan ax para niquijtosqu'ia majtlactli mil tlajtoli tlen axaca huelis quimachilis. 20Noicnihua, amo ximoilhuica queja coneme, pampa coneme san se quentzi quimachil'iaj. Cualtitoc xiitztoca queja coneme ica tlen ax cuali, pampa coneme san pilquentzi quimatij tlen ax cuali, pero ipan sequinoc tlamantli ximoilhuica queja huejhueyi tlacame tlen quipiyaj cuali inintlalnamiquilis. 21Ipan Itlajtol Toteco ijcuilijtoc campa Toteco quiijto: "Niquincamahuis ni notlacajhua tlen ax nechneltocaj ica tlajtoli tlen ax quimachilise, pampa elis sejcoyoc ehuani tlen quincamahuise notlajtol, pero yonque queja nopa elis, ni tlacame ax nechchihuilise cuenta." Queja nopa quiijto Tohueyiteco. 22Huajca quema Itonal Toteco temaca chicahualistli para camatise sequinoc tlajtoli, ax se tlanescayotl para tlaneltocani, pero eltoc se tlanescayotl para tlen ax quineltocaj. Pero quema Itonal Toteco temacas chicahualistli queja se tiocamanalojquetl para se tlacatl camatis itlajtol Toteco tlen yaja quimacatoc, ax elis se tlanescayotl para tlen ax quineltocaj, ya nopa para tlaneltocani. 23Huan quema nochi nopa tiopamitl tlen tlaneltocani mosentil'iaj, intla nochi camatisqu'iaj tlajtoli tlen axaca quimachil'ia, huan intla ajsisqu'iaj tlacame tlen ax quineltocaj Tohueyiteco, o tlen ax quema hualajtoque ipan nopa tlasentilistli, inijuanti moilhuisqu'iaj para intlapolohuaj. 24Pero intla nochi tlen camatij ipan tlasentilistli, camatise itlajtol Toteco ica tlajtoli tlen nochi quimachil'iaj, huan calaquisqu'iaj tlacame tlen ax quineltocaj Toteco, o tlen ax quema hualajtoque ipan tlasentilistli, huajca quena, quicaquise huan quimachilise para quipiyaj inintlajtlacolhua pampa itlajtol Toteco quinteilhuis. 25Nempa quiitase tlen quitlatiyayaj ipan ininyolo huan queja fiero moilhuiyayaj. Yeca nopa tlacame tlen san paxalohuaj motlancuaquetzase para quihueyichihuase Toteco huan quiijtose para nel'ia Toteco itztoc imohuaya. 26Huajca noicnihua, ¿tlaque nimechilhu'ia monequi inquichihuase ipan imotlasentilis? Quema inmosentil'iaj, itztoque sequin tlen quinequij huicase se tiohuicatl tlen Salmos, itztoque sequin tlen quinequij tlamachtise Itlajtol Toteco, huan itztoque sequin tlen quinequij teilhuise nochi tlen Toteco quinnextilijtoc. Itztoque sequin tlen quinequij camatise ica tlajtoli tlen ax momachtijtoque, huan itztoque sequin tlen quinequij tlaixtomase tlen quinequi quiijtos nopa tlajtoli. Cualtitoc nochi ya ni, pero monequi nochi tlen inquichihuaj quinpalehuis nochi tlaneltocani para ma moscaltica ipan Toteco. 27Huajca intla sequin quinequij camatise tlajtoli tlen ax momachtijtoque, ma camatica san ome o eyi, pero ax m'as. Huan ma camatica sesentzitzi, huan nojquiya monequi itztos se tlen quipiya chicahualistli para quiixtomas nopa tlajtoli para quinilhuis nochi nopa tlacame tlen quiijtojtoque. 28Huan intla axaca hueli quinixtomilis sequinoc tlen quinequi quiijtos nopa tlajtoli, huajca axaca ma camati tlajtoli ipan se tlasentilistli tlen sequinoc ax quimachil'iaj. Inijuanti tlen quinequiyayaj camatise ica seyoc tlajtoli ma ax tleno quiijtose ipan nopa tlasentilistli, o inijuanti huelis momaijtose ica Toteco ipan ininyolo. 29Nojquiya san ome o eyi tiocamanalohuani ma camatica itlajtol Toteco, huan nochi sequinoc ma moyolilhuica tlen quiijtohuaj huan ma moilhuica intla Itonal Toteco nel'ia quinmacatoc inintlajtol o axtle. 30Pero teipa intla itztoc seyoc tlen mosehu'ia nopona huan Toteco quinextil'ia se tlamantli para quiijtos, huajca ma ayoc molinis yajaya tlen camatiyaya achtohui. Ma quicahuili camatis ne seyoc. 31Queja nopa, san sesentzitzi, nochi tiocamanalohuani huelis camatise. Huan nochi sequinoc tlacame huelis quicaquise huan quimachilise m'as huan nopa tlajtoli quinyolchicahuas. 32Pampa se tiocamanalojquetl tlen quipiya chicahualistli para camatis para Toteco, hueli quinahuat'ia itonaltzi huan mochiyas hasta quema quitocaros para camatis. 33Pampa ipan se tlasentilistli, Toteco ax quinequi para nochi ma san quichihuaca tlen quinequise huan tlahuejchihuase san sejco. Yajaya quinequi ma onca tlasehuilistli huan quinequi sesentzitzi ma panotiyaca queja inmosencajtoque para panos. Nojquiya xijchihuaca queja quichihuaj itlatzejtzeloltijca tlacajhua Toteco tlen mosentil'iaj ipan nochi sequinoc tiopantini, 34huan amo xiquincahuilica sihuame ma camatica ipan tlasentilistli pampa ax quinamiqui. Monequi sihuame quincahuilise ininhuehuejhua ma quinyacanaca queja quiijtohuaj itlanahuatil Toteco. 35Huan intla sihuame quinequij quimatise se tlamantli, ma quintlajtlanica ininhuehuejhua ipan ininchajchaj, pampa ax quinamiqui intla se sihuatl camatis ipan tlasentilistli. 36Amo ximoilhuica para Itlajtol Toteco pejqui ica imojuanti huan san imojuanti tlen inquineltocaj, pampa itztoque miyac tlen quiselijtoque itlajtol campa hueli. 37Huajca intla sequin imojuanti inmoilhu'iaj para intiocamanalohuani, o inmoilhu'iaj Itonal Toteco achi m'as inmechyacana que sequinoc, xijmachilica para ni tlen nimechtlajcuilhu'ia nica eltoc tlen Toteco tlanahuat'ia. 38Huan intla se ax quimachil'ia para ya ni tlen Toteco tlanahuat'ia, ma axaca quichihuili cuenta. 39Huajca noicnihua, xijnequica para Itonal Toteco ma inmechmaca chicahualistli para xielica tiocamanalohuani para incamatise para Toteco, pero nojquiya amo xiquintzacuilica tlen quinequij camatise tlajtoli tlen ax momachtijtoque. 40Pero ipan tlasentilistli xijchihuaca nochi queja quinamiqui huan nochi ma camatica sesentzitzi queja inmosencajtoque para ma pano.

will be added

X\