1 CORINTIOS 13

1Yonque nihuelisqu'ia nicamatisqu'ia tlajtoli tlen tlacame huan elhuicac ehuani camatij, ax tleno nopati intla ax niteicnel'ia. Quema nicamatisqu'ia nopa tlajtoli elisqu'ia queja san nitamborhuijhuitequi o niteposhuijhuitequi. 2Yonque nijpiyasqu'ia chicahualistli para nicamatisqu'ia Itlajtol Toteco queja se tiocamanalojquetl, huan yonque nijmatisqu'ia nochi tlen ohui huan yonque nijpiyasqu'ia miyac tlaneltoquili hasta nihuelisqu'ia niquilhuisqu'ia se tepetl ma moijcueni huan nel'ia moijcuenisqu'ia, intla ax niteicnel'ia, ax tleno nopati. 3Yonque nitemajmacasqu'ia nochi tlen nijpixtoc para oncas inintlacualis teicneltzitzi, o yonque nitemacasqu'ia notlacayo para ma quitlatica, intla ax niteicnel'ia, ax tleno nechpalehuisqu'ia iixpa Toteco. 4Se tlen teicnel'ia quipiya iyolo ininhuaya sequinoc huan quinchihuil'ia tlen cuali. Yajaya ax quinequi tlen sequinoc quipiyaj. Ax mohueyimati, niyon ax momachil'ia achi cuali que sequinoc. 5Se tlen teicnel'ia moyolilhu'ia achtohui quema tlananquil'ia. Ax camati san quej hueli. Ax itzcuinti huan ax yolquentzi. Niyon ax quichihuil'ia cuenta quema seyoc quichihuil'ia tlen ax cuali. 6Tlen teicnel'ia ax quema paqui ica tlen ax cuali, san paqui ica tlen melahuac. 7Se tlen teicnel'ia quiijiyohu'ia nochi tlamantli tlen huala huan motemach'ia para ajsis tlen cuali. Nochipa quichiya para sequinoc ma quichihuaca tlen cuali huan mocahua temachtli yonque tlen hueli quipanotihuala. 8Teicnelijcayotl nochipa eltos huan ax quema tlamis. Pero ajsis hora quema tlacame ayoc camatise tlajtoli tlen Toteco quinmacas queja quichihuaj tiocamanalohuani. Ajsis hora tlacame ayoc camatise tlajtoli tlen ax momachtijtoque. Ajsis hora quema Itonal Toteco ayoc quinmatiltis tlacame tlen ohui. 9Ama san se quentzi tijmatij, huan quema se camati itlajtol Toteco queja se tiocamanalojquetl, san huelis camatis se quentzi. 10Pero quema tlen senquistoc cuali hualas, nochi tlen pilquentzi tlamis. 11Quema niitztoya niconetzi nicamatiyaya queja se conetl, nimoilhuiyaya queja se conetl, huan nijmachiliyaya tlamantli queja se conetl. Pero quema nimotlacachijqui, niquiyocacajqui nopa tlamantli tlen coneme quichihuaj. 12San se ica tojuanti. Ama eltoc queja tijtlachil'iaj Toteco ipan se tescatl campa tzintlayohua huan ax hueli tiquitaj cuali, pero teipa quema yajaya mocuepas, timoixtlachilise. Amantzi niquixmati se quentzi, pero teipa niquixmatis senquistoc queja Toteco senquistoc nechixmati. 13Huajca onca eyi tlamantli tlen huejcahuas. Monequi tijpiyase tlaneltoquili. Monequi timotemachise para panos nochi tlen Toteco quiijto panos, huan monequi titeicnelise, pero nopa tlen m'as hueyi ipati ica ni eyi tlamantli eltoc ya ni, monequi titeicnelise.

will be added

X\