1 CORINTIOS 11

1Huajca xijchihuaca queja na nijchihua pampa na nijchihua nochi tlen nihueli para nijchihuas tlen Cristo quichijqui. 2Noicnihua, nipaqui pampa nijcaqui innechilnamiquij ica cuali huan inquitoquil'iaj nopa tlamachtili tlen nimechmachtijtoc. 3Pero onca se tlamantli tlen nijnequi nimechilhuis para xijmachilica. Se tlacatl quipiya tequihuejcayotl ica isihua pampa itztoc queja itzonteco, queja Cristo quipiya tequihuejcayotl ica nochi tlacame, huan queja Toteco Dios quipiya tequihuejcayotl ica Cristo o huelis tiquijtose Toteco itzonteco Cristo. 4Intla se tlacatl momaijtohua ica Toteco ipan tlasentilistli o camati itlajtol Toteco huan quiicpahuijtoc isombrero, huajca ax quinext'ia intla quitlepanita Cristo. 5Pero intla se sihuatl momaijtohua ica Toteco ipan tlasentilistli o tlamacht'ia tlajtoli tlen Toteco quimacatoc huan ax motzontzactoc, huajca ax quinext'ia intla quitlepanita ihuehue. Eltoc queja moxintoc nopa sihuatl. 6Huajca intla se sihuatl ax quinequi mocuatzacuas, ma moxima. Pero intla mopinahua para moximas, huajca ma mocuatzacua. 7Ax cuali para se tlacatl mocuatzacuas quema inmosentil'iaj, pampa Toteco quinchijtoc tlacame queja ya iixcopinca huan tlacame quinext'iaj Toteco ihueyitilis, pero se sihuatl tenextil'ia ihuehue ihueyitilis. 8Pampa quema Toteco quichijqui nopa achtohui tlacatl, Ad'an, yaja ax hualajqui ipan se sihuatl, pero nopa achtohui sihuatl, Eva, hualajqui ipan nopa tlacatl. 9Huan Toteco ax quinchijchijqui tlacame para quinpalehuise sihuame, pero quinchijchijtoc sihuame para quinpalehuise tlacame. 10Huajca monequi se sihuatl ma motzontzacua para ma quinextis iniixtla elhuicac ehuani para ihuehue quipiya tequihuejcayotl ica ya. 11Pero yonque eltoc queja nopa, nochi tojuanti tiitztoque san se ipan Jesucristo, huan niyon tlacame, niyon sihuame ax hueli mohueyimatise para itztoque m'as huejhueyi. 12Huan yonque melahuac nopa achtohui sihuatl quisqui ipan itlacayo nopa tlacatl, teipa sihuame quintlacatilt'iaj nochi tlacame, huan yajaya Toteco tlen techchijchijqui nochi tojuanti. 13Huajca ximoilhuica, imojuanti. ¿Cuali para se sihuatl momaijtos ica Toteco, intla ax mocuatzactoc? ¡Ax neli! 14Ipan imoyolo inquimatij para quipinahualtisqu'ia se tlacatl intla quipiyasqu'ia huehueyac itzoncal, 15pero quema se sihuatl quipiya itzoncal huehueyac, huajca se paquilistli huan yejyectzi para ya pampa Toteco quimacatoc itzoncal para ica ya nopa ma motzontzacua. 16Pero intla sequin quinequij monajnanquilise ica ni tlajtoli, ma quimatica para ya ni tojuanti titlamacht'iaj. Nojquiya ya ni quichihuaj nochi toicnihua ipan itiopahua Toteco tlen mosentil'iaj campa hueli. 17Pero monequi nimechilhuis seyoc tlamantli tlen ax nechchihua ma nipaqui imohuaya ica tlen inquichihuaj. Nijcaqui ax inmopalehu'iaj quema inmosentil'iaj, san m'as inmotlapech'iaj. 18Pampa nijcaqui quema inmosentil'iaj, inmotlajcoxelohuaj, huan ica quentzi nijneltoca para melahuac. 19Huan huelis inmoilhu'iaj para monequi inmoiyocanequise para ma monexti ajqueya quichihua tlen quipact'ia Toteco. 20Huajca intla inmotlajcoitaj quema inmosentil'iaj, ax neli inquicuaj Toteco itlacualis, 21pampa nijcaqui miyac tlen imojuanti inmotlayacanalt'iaj huan inquitlalochcuaj tlen inquihualicaj ipan nopa tlacualistli. Niyon ax inquichiyaj para ma ajsica sequinoc tlaneltocani para inquixelose tlen inquihualicaque ica nochi. Huajca sequin tlen teipa ajsij ax tleno quisel'iaj huan mayanaj. Huan sequinoc tlen cualca ajsij moixhuit'iaj huan hasta moihuint'iaj. 22¿Ax inquipiyaj imochajchaj campa huelis intlacuase huan intlaise? ¿Para tlen inquimacaj pinahualistli itiopa Toteco huan inquinpinahualt'iaj imoicnihua tlen teicneltzitzi huan tlen ax tleno quipiyaj para quihualicase? ¿Inmoilhu'iaj para na nipaqui ica tlen inquichihuaj? ¡Ax neli! ¡Ica ya ni, ax nipaqui! 23Pampa elqui yajaya Tohueyiteco tlen nechnextili nopa tlen nimechmachtijtoc tlen itlacualis, huan ya ni tlen nimechilhuijtoc. Tohueyiteco Jes'us quiitzqui se pantzi ipan nopa tlayohua quema Judas quitemactili, 24huan quema quitlascamatqui iTata, quitlajcoitac, huan quinilhui imomachtijcahua: "Xijcuica ni pantzi huan xijcuaca. Ni notlacayo tlen nitemacas quema nimiquis imopampa imojuanti. Xijchijtiyaca ya ni para innechilnamiquise." 25San se Tohueyiteco Jes'us quichijqui ica nopa taza. Quema inijuanti ya tlantoya tlacuaj ica tiotlac, quiitzqui se taza ica xocomecatl iayo huan quiijto: "Ni taza tenextil'ia noeso tlen nijtoyahuas para quipehualtis nopa yancuic tlajtolsencahuali tlen Toteco quichihua ica tlacame. Quema inquiise, xijchihuaca pampa inquiilnamiquij nimijqui imopampa." 26Huan nochipa quema inquicuase ni pantzi huan inquiise ni xocomecatl iayo, inteyolmelahuase para Tohueyiteco mijqui topampa huan queja nopa monequi xijchijtiyase hasta yajaya mocuepas. 27Huajca intla se quicuas nopa pantzi o quiis tlen nopa taza ipan nopa tlacualistli tlen Toteco technextilijtoc, huan ax quichihua queja quinamiqui, yajaya quihuicas tlajtlacoli pampa tlajtlacolchihuas ica ieso huan itlacayo Tohueyiteco. 28Huajca achtohui monequi sesen tlacatl ma moyoltlachili para momacas cuenta intla eltoc tlen ax cuali ipan iyolo. Huan quema quimatis para ax tleno tlen ax cuali eltoc ipan iyolo, ma quicua nopa pantzi huan ma quii tlen nopa taza queja quinamiqui. 29Pampa Toteco quitlatzacuiltis aqui hueli tlacatl intla quiis huan quicuas itlacualis Toteco huan ax moilhuis para nel'ia hueyi ipati itlacayo Tohueyiteco huan tlen yaja techchihuilijtoc. 30Yeca miyac tlen imojuanti ama ax inquipiyaj fuerza, huan inmococohuaj, huan hasta sequin ya mictoque pampa Toteco inmechtlatzacuilt'ia. 31Pero intla cuali timoyoltlachilise huan ax tijcuase ica tlajtlacoli ipan toyolo, huajca Toteco ax techtlatzacuiltis. 32Quema Toteco techtlatzacuilt'ia, techxitlahua para ma timoyolpatlaca huan ma ax tijselica tlatzacuiltilistli ica sequinoc tlacame tlen ni tlaltepactli. 33Huajca noicnihua, quema inmosentilise para inquicuase nopa tlacualistli tlen Toteco technextilijtoc, ximochiyaca se ica seyoc. 34Huan intla se nel'ia mayana, ma tlacuajtehua ichaj para ax intlajtlacolchihuase quema inmosentil'iaj. Huan ica nopa sequinoc tlamantli tlen innechtlajtlanijtoque, nijsencahuas nochi quema niajsiti nopona imohuaya.

will be added

X\