1 Chronicles 4

1Huan Jud'a quipixqui icone tlen itoca Fares, huan quipixqui iixhui Hezr'on, huan iteipa ixhuihua Carmi, Hur huan Sobal. 2Huan Sobal quipixqui icone tlen itoca Rea'ia. Huan Rea'ia quipixqui icone tlen itoca Jahat tlen teipa elqui itata Ahumai huan Lahad. Nochi ni tlacame mochijque nopa tlacame tlen quintocajtijque zoraitame. 3Huan ya ni iconehua Hur tlen elqui itata Etam, Jezreel, Isma, Ibdas huan se ininsihua icni tlen itoca Haze Lelponi. 4Huan Hur nojquiya elqui itata Penuel tlen teipa elqui itata Gedor, huan Ezer tlen teipa elqui itata Husa. Nochi ya ni elque iteipa ixhuihua Hur, iachtohui cone Efrata tlen ica pejqui nopa altepetl Bel'en. 5Asur tlen elqui itata Tecoa quinpixqui ome isihuajhua. Se tlen itoca Hela huan nopa seyoc tlen itoca Naara. 6Huan isihua Naara quintlacatilti iconehua tlen inintoca eliyayaj: Ahuzam, Hefer, Temeni huan Ahastari. Ni tlacame hualajque tlen nopa sihuatl Naara. 7Huan isihua tlen itoca Hela quitlacatilti Zeret, Jezoar huan Etn'an, 8huan Cos tlen elqui itata Anub huan Zobeba. Nojquiya Cos elqui ininhuejcapantata nopa familias tlen hualajque teipa ipan Aharhel, icone Harum. 9Jabes elqui achi m'as tlalnamiqui tlen nochi sequinoc iicnihua. Huan inana quitocajti Jabes (Jabes quiijtosnequi "Tlacuajcualocayotl"), pampa quiijto: "Nijtlacatilti ica miyac tlacuajcualocayotl". 10Huan Jabes momaijto ica Toteco Dios tlen toTeco tiisraelitame huan quiilhui: "Nimitztlajtlan'ia xinechtiochihua miyac huan xijhueyili notlal. Xinechpalehui ipan nochi tlen nijchihua. Xinechmanahui tlen nochi tlamantli tlen ax cuali para ax tleno nechcocos." Queja nopa momaijto Jabes, huan Toteco quicajqui huan quimacac tlen quitlajtlani. 11Quelub tlen elqui iicni S'ua, elqui itata Mehir. Huan Mehir teipa quipixqui icone tlen itoca Est'on. 12Huan Est'on teipa elqui itata Bet Rafa, Paseah huan Tehina. Huan Tehina teipa quipehualti nopa altepetl tlen itoca Nahas. Nochi ya ni elque nopa tlacame tlen Reca. 13Cenaz quinpixqui iconehua tlen inintoca eliyayaj Otoniel huan Sera'ias. Huan Otoniel quinpixqui iconehua tlen inintoca eliyayaj Hatat huan Meonotai. 14Huan Meonotai quipixqui se icone tlen itoca Ofra. Huan Sera'ias quipixqui se icone tlen itoca Joab, tlen elqui ininhuejcapantata nopa tlacame tlen teipa itztoyaj ipan nopa tlamayamitl tlen itoca Carisim. Carisim quinequi quiijtos Tlasencahuani. Quena, queja nopa quitocajtiyayaj pampa nopona itztoyaj tlacame tlen quimatiyayaj quichihuase nochi tlamantli tlen yejyectzitzi. 15Huan Caleb tlen elqui icone Jefone quinpixqui iconehua tlen inintoca eliyayaj Iru, Ela huan Naam. Huan Ela elqui itata Cenaz. 16Jehalelel quinpixqui iconehua tlen inintoca eliyayaj: Zif, Zifa, Tir'ias huan Asareel. 17Esdras quinpixqui iconehua tlen inintoca eliyayaj: Jeter, Mered, Efer huan Jal'on. Huan Mered mocuili Bitia, iichpoca Fara'on tlen tlanahuati ipan tlali Egipto. Huan ininconehua elque Mar'ia, Samai huan Isba. Huan Isba quipixqui se icone tlen itoca Estemoa. 18Nojquiya Mered quipiyayaya seyoc isihua tlen hualayaya ipan nopa hueyi familia Jud'a. Nopa sihuatl itoca eliyaya Jehuda'ia. Huan Jehuda'ia quintlacatilti Jered, Heber huan Jecutiel. Huan teipa Jered quipixqui icone itoca Gedor. Huan teipa Heber quipixqui icone itoca Soco huan Jecutiel quipixqui icone tlen quitocajti Zanoa. 19Hod'ias quipixqui isihua tlen elqui isihua icni Naham. Huan yaja quintlacatilti ome iconehua. Se itoca Keila tlen mochijqui se garmita tlacatl. Huan nopa seyoc icone itoca eliyaya Estemoa huan yaja mochijqui se maacateo tlacatl. 20Sim'on quinpixqui iconehua tlen inintoca eliyayaj: Amn'on, Rina, Ben Han'an huan Til'on. Huan Isi quinpixqui iconehua tlen inintoca eliyayaj Zohet huan Ben Zohet. 21Sela, icone Jud'a, quinpixqui iconehua tlen inintoca eliyaya Er huan Laada. Huan tlen Sela hualajque nopa familias tlen tequitiyayaj ica lino yoyomitl ipan tlali Bet Asbea. Huan Er quipixqui icone tlen itoca Leca. Huan Laada quipixqui icone tlen itoca Maresa. 22Huan Sela quipixqui iteipa ixhui, Joacim. Huan iteipa ixhuihua Sela itztoyaj ipan altepetl Cozeba. Huan Sela nojquiya quinpixqui iconehua, Jo'as huan Saraf. Huan Saraf mosihuajti ica se sihuatl tlen tlali Moab huan mochijqui se tequihuejquetl ipan nopa tlali. Teipa mocuepque ipan altepetl Lehem. Quicuique inintoca nochi tlen nica ijcuilijtoc tlen miyac amatlajcuiloli tlen quiijcuilojque tlahuel huejcajquiya. 23Nochi ni tlacame quiixmatiyayaj quichihuase miyac tlamantli ica soquitl. Itztoyaj ipan nopa altepetini Neta'in huan Gueder'a. Nojquiya, quiixmatiyayaj quejatza quitocase xochitl huan quiyectlalise xochi mili. Huan nochi inijuanti quitequipanojque nopa tlanahuatijquetl. 24Sime'on quinpixqui iconehua tlen inintoca eliyayaj: Nemuel, Jam'in, Jarib, Zera huan Sa'ul. 25Huan Sa'ul quipixqui se icone tlen itoca Salum. Huan Salum teipa quipixqui se icone tlen itoca Mibsam. Huan Mibsam quipixqui icone tlen itoca Misma. 26Misma quipixqui icone tlen quitocajtiyayaj Hamuel. Huan Hamuel quipixqui icone tlen itoca Zacur. Zacur quipixqui se icone tlen itoca Simei. 27Simei quinpixqui 16 iconehua huan 6 iichpocahua. Pero nopa telpocame ax quinpixque miyac ininconehua huan yeca ininfamilias ax momiyaquilijque queja iteipa ixhuihua Jud'a. 28Huan Simei quinpixqui iixhuihua tlen itztoyaj ipan nopa altepetini tlen inintoca eliyayaj: Beer Seba, Molada, Hazar Sual, 29Bilha, Ezem, Tolad, 30Betuel, Horma, Siclag, 31Bet Marcabot, Hazar Susim, Bet Birai huan Saaraim. Quena, nochi ni altepetini eltoya iniaxca iixhuihua Sime'on hasta quema David pejqui tlanahuat'ia. 32Huan nojquiya itztoyaj ipan seyoc macuili altepetini tlen inintoca: Etam, A'in, Rim'on, Toqu'en huan As'an. 33Huan nojquiya itztoyaj ipan pilaltepetzitzi tlen quiyahualojtoyaj huejca hasta altepetl Baal. Quena, ni iixhuihua Sime'on itztoyaj ipan ni altepetini huan mocajqui ijcuilijtoc inintoca ipan amatl huan quejatza tlacajtihualajque iniixhuihua. 34Sequinoc iteipa ixhuihua Sime'on eliyayaj Mesobab, Jamlec, Jos'ias tlen elqui icone Amas'ias, 35huan Joel. Nojquiya Sime'on quipixqui se iixhui, Jeh'u, tlen elqui icone Josib'ias, tlen elqui icone Sera'ias, tlen elqui icone Asiel; 36huan quinpixqui iixhuihua tlen inintoca eliyayaj Elioenai, Jaacoba, Jesoha'ia, Asa'ias, Adiel, Jesimiel, Bena'ia, 37huan Ziza tlen elqui icone Sifi, tlen elqui icone Al'on, tlen elqui icone Jeda'ias, tlen elqui icone Simri, tlen elqui icone Sema'ias. 38Tlen nica ijcuilijtoc inintoca itztoyaj tlayacanani ipan ininfamilias. Huan pampa ininfamilias monelmiyaquilijque, 39inijuanti quisque huan yajque hasta Gedor ipan sejcoyoc nopa tlamayamitl para campa quisa tonati. Yajque para quitemose sacatl para inintlapiyalhua. 40Huan quipantijque miyac sacatl tlen cuali. Huan oncayaya miyac paquilistli huan tlasehuilistli ipan nopa tlali pampa achtohuiya iixhuihua Cam itztoyaj nopona. 41Huan ni tlayacanani ipan iixhuihua Sime'on tlen quipiyaj inintoca ijcuilijtoc nica, calajque ipan nopa tlamayamitl ipan nopa tonali quema Tlanahuatijquetl Ezequ'ias tlanahuatiyaya ipan tlali Jud'a. Huan mocuilijque nopa tlali huan quixolejque nochi ininyoyoncalhua huan ininmilhua tlen eliyaya iniaxcahua iixhuihua Cam. Quintzontlamiltijque nopa tlacame nopona huan moaxcatijque nopa tlali huan nopona mocajque para itztose pampa quipixqui yejyectzi sacatl para inintlapiyalhua. 42Huan seyoc 500 tlen ni tlacame tlen eliyayaj iixhuihua Sime'on tlen calajque ipan nopa tlali teipa yajque ipan nopa tepetl tlen itoca Seir. Huan tlayacanani ipan nopa tlacame tlen yajque nopona itztoyaj: Pelat'ias, Near'ias, Refa'ias huan Uziel. Nochi ya ni eliyayaj iconehua Isi. 43Huan inijuanti quintzontlamiltijque nochi nopa amalecita tlacame tlen noja mocajtoyaj yoltoque. Queja nopa iixhuihua Sime'on moaxcatijque nopa altepetl huan nopona itztoque hasta ama.

will be added

X\