1 Chronicles 24

1Huan quej ni quinxejxelojque ica pamitl nopa totajtzitzi, inijuanti tlen eliyayaj iteipa ixhuihua Aar'on. Huejcajquiya Aar'on quinpixqui iconehua tlen inintoca eliyayaj Nadab, Abi'u, Eleazar huan Itamar. 2Pero Nadab huan Abi'u mijque achtohui quema aya miquiyaya inintata. Yeca teipa san mocajqui Eleazar huan Itamar para tequitise queja totajtzitzi. Huan tlen inijuanti pejqui ome pamitl tlen iixhuihua Aar'on. 3Huan tlahuel miyac xihuitl teipa, quema nechca para miquis David, yajaya quitlajtlani itlapalehuil Sadoc huan Abimelec para quinxejxelose nopa totajtzitzi ica miyac pamitl queja tlaque tequitl quichihuasqu'iaj. Sadoc elqui iteipa ixhui Eleazar tlen huejcajquiya huan Ahimelec elqui iteipa ixhui Itamar. 4Huan nochi iteipa ixhuihua Eleazar tlen itztoyaj totajtzitzi, quinxejxelojque ipan 16 pamitl pampa itztoyaj 16 tatame tlen itztoyaj tlayacanani tlen quinpixque miyac ipan ininfamilias. Huan iteipa ixhuihua Itamar tlen itztoyaj totajtzitzi quinxejxelojque ica 8 pamitl pampa san quinpixqui 8 tlayacanani ica miyac ipan ininfamilias. 5Sesen tequitl tlen monequiyaya se pamitl tlen totajtzitzi ma quichihuaca temacaque ica rifa o ica nopa dados tlatzejtzeloltic. Ax quinequiyayaj para quinchicoicnelise sequin huan sequinoc axtle. Ipan iteipa ixhuihua Eleazar huan ipan iteipa ixhuihua Itamar sentic itztoyaj miyac cuajcuali tlayacanani ica miyac yajatili para quitequipanose Toteco Dios ipan tiopamitl. 6Huan Sema'ias, icone Natanael tlen elqui se levita, tequitiyaya queja tlajcuilojquetl para quiijcuilos inintoca tlen huetzque ipan sesen pamitl huan tlaque elisqu'ia itequi sesen tlacatl para quichihuas. Huan Sema'ias tlajcuilo iixpa Tlanahuatijquetl David huan iniixpa Sadoc, tlen elqui hueyi totajtzi, huan iixpa Ahimelec tlen icone Abiatar, huan iniixpa totajtzitzi tlen itztoyaj tlanahuatiani ipan ininfamilias huan iniixpa nopa tlayacanca levitame. Huan quema monequiyaya quinquixtise nopa dados ipan caxitl, achtohui quinquixtilis se tlen iteipa ixhui Eleazar huan teipa quinquixtilis se tlen iteipa ixhui Itamar. Huan queja nopa quitlapejpenijque pamitl tlen totajtzitzi ica suertes. 7Quema tetequimacayaya nopa pamitl ica rifa, queja ni yajtiyajque inintoca tlen catl'ia pamitl achtohui tequitis hasta catl'ia pamitl quitocarohua para teipa tequitis hasta nochi tlanque. Nopa pamitl tlen achtohui tequitis itoca elqui Joiarib. Teipa tequitis Jeda'ias, 8teipa Harim, teipa Seorim, 9teipa Malqu'ias, teipa Mijam'in, 10teipa Cos, teipa Ab'ias, 11teipa Jes'ua, teipa Secan'ias, 12teipa Eliasib, teipa Jaquim, 13teipa Hupa, teipa Jesebeab, 14teipa Bilga, teipa Imer, 15teipa Hezir, teipa Afses, 16teipa Peta'ias, teipa Hezequiel, 17teipa Jaqu'in, teipa Gamul, 18teipa Dela'ia huan teipa Maaz'ias. 19Nochi tlacame ipan sesen pamitl quinilhuijque ma hualaca para tequipanose ipan nopa tiopamitl quema quintocarohua quichihuase. Huan nochi monequi tequitise queja TOTECO Dios tlen ininTeco israelitame achtohui quiilhui ininhuejcapantata Aar'on ma quichihua. 20Nica eltoc inintoca nopa sequinoc tlayacanca tlacame tlen hualajque ipan nopa hueyi familia Lev'i. Subael elqui inintlayacanca iteipa ixhuihua Amram, Jehed'ias elqui inintlayacanca iteipa ixhuihua Subael. 21Is'ias elqui inintlayacanca iteipa ixhuihua Rehab'ias. 22Selomot huan icone, Jahat, elque inintlayacancahua iteipa ixhuihua nopa izharita tlacame. 23Jer'ias elqui inintlayacanca iteipa ixhuihua Hebr'on. Huan Amar'ias eliyaya nopa iniompaca tlayacanca, huan teipa Jahaziel nopa expa tlayacanca huan Jecam'an nopa teipa tlayacanquetl. 24Mica'ia elqui inintlayacanca iteipa ixhuihua Uziel. Samir elqui inintlayacanca iteipa ixhuihua Mica'ia. 25Is'ias, iicni Samir, nojquiya elqui tlayacanquetl ipan iteipa ixhuihua Mica'ia. Zacar'ias elqui inintlayacanca iteipa ixhuihua Is'ias. 26Mahli huan Musi elque inintlayacancahua iteipa ixhuihua Merari. Beno elqui inintlayacanca iteipa ixhuihua Jaaz'ias. 27Beno, Soham, Zacur huan Ibri elque inintlayacancahua iteipa ixhuihua Merari tlen nojquiya elqui iixhuihua Jaaz'ias. 28Eleazar elqui inintlayacanca iteipa ixhuihua Mahli, pero Eleazar ax quinpixqui itelpocahua. 29Jerameel elqui inintlayacanca iteipa ixhuihua Cis. 30Mahli, Edar huan Jerimot elque inintlayacancahua iteipa ixhuihua Musi. Nochi ni tlacame eliyayaj iteipa ixhuihua Lev'i tlen huejcajquiya huan eliyayaj tlayacanani ipan ininfamilias. 31Levitame quiselijque inintequi ipampa rifa queja nojquiya quichijque iixhuihua Aar'on tlen eliyayaj totajtzitzi. Ax quichihuilijque cuenta quesqui xihuitl quipiyayaya se tlacatl o tlaque tlanahuatili quipiya. Huan nopa rifa quichijque iixtla nopa Tlanahuatijquetl David, Sadoc, Ahimelec huan nopa sequinoc huejhueyi totajtzitzi huan levitame.

will be added

X\