1 Chronicles 23

1Huan teipa quema David ya quipixqui miyac xihuitl huan eliyaya huehuentzi, quiijto para icone, Salom'on, elis nopa yancuic tlanahuatijquetl ipan tlali Israel. 2Huan quinsentili nochi tlayacanani tlen tlali Israel, huan nochi totajtzitzi huan levitame. 3Huan quinpojque nopa levitame tlen quipiyayayaj 30 xihuitl para huejcapa. Huan ica nochi eliyayaj 38 mil tlacame. 4Huan David quintlapejpeni 24 mil levitame para quintequitlachilise tlen quichijchihuasqu'iaj nopa tiopamitl. Huan 6 mil levitame quintlapejpeni para mochihuase tlayacanani huan jueces. 5Huan quintlali 4 mil levitame para tlamocuitlahuise campa puertas huan seyoc 4 mil para quihueyichihuase TOTECO ica nopa tlatzotzonali tlen David tlanahuatijtoya ma quichijchihuaca para ica quihueyichihuase TOTECO. 6Teipa David quinxelo nopa levitame ica eyi grupos huan sesen grupo quihuicayaya itoca ininhuejcapantata Gers'on, Coat o Merari tlen huejcajquiya itztoyaj huan eliyayaj ieyi conehua Lev'i. 7Teipa David quinxelo nopa grupo tlen iconehua Gers'on ica ome grupos tlen quihuicayaya inintoca nopa ome iconehua Gers'on: Laad'an huan Simei. 8Huan teipa quinxelo nopa grupo tlen iteipa ixhuihua Laad'an ica eyi grupos tlen quihuicayaya inintoca nopa eyi iconehua Laad'an. Inintoca eliyayaj: Jehiel, Zetam huan Joel. Huan Jehiel elqui tlayacanquetl ipan ininfamilia. 9Ya ni elqui nopa tlayacanani ipan nopa familia Laad'an. Huan nojquiya quinxelo nopa grupo tlen iteipa ixhuihua Simei ica eyi grupos. Huan sesen grupo quihuicayaya itoca se icone Simei. Inintoca eliyayaj Selomit, Haziel huan Har'an. 10Huan seyoc nahui iteipa ixhuihua Simei quipixque inintoca: Jahat, Zina, Je'us huan Ber'ia. 11Jahat elqui inintlayacanca nopa familia huan teipa Zina. Pero quinitaque Je'us huan Ber'ia queja san setzi familia pampa ax quinpixque miyac ininconehua. 12Huan ipan iteipa ixhuihua Coat, itztoyaj nahui tlacame tlen mochijque tlayacanani. Se iteipa ixhui itoca eliyaya Amram. Huan Amram quipixqui iteipa ixhui tlen itoca Izhar. Huan Izhar quipixqui iteipa ixhui tlen itoca Hebr'on. Huan Hebr'on quipixqui iteipa ixhui tlen itoca Uziel. 13Huejcajquiya Amram quinpixqui itelpocahua tlen inintoca eliyaya Aar'on huan Mois'es. Huan quiniyocatlalijque Aar'on huan iconehua para nochipa para quitencahuilise TOTECO nopa tlacajcahualistli tlatzejtzeloltic tlen quihualicayayaj tlacame. Nojquiya quintequimacac para quitlatise copali iixpa huan para tetiochihuase ica itequihuejcayo. 14Huan Mois'es tlen elqui itlatequipanojca Toteco Dios quinpixqui ome iconehua huan quinijcuilojque ipan nopa hueyi familia tlen Lev'i. 15Huan iconehua Mois'es inintoca eliyayaj Gers'on huan Eliezer. 16Huan Gers'on quipixqui se icone tlen itoca Sebuel tlen tlayacanqui ipan ifamilia huejcajquiya. 17Huan Eliezer quipixqui setzi icone tlen itoca Rehab'ias. Huan Rehab'ias eliyaya tlayacanquetl ipan ifamilia tlen teipa tlacatqui pampa quinpiyayaya miyac iconehua. 18Huan Izhar quinpixqui miyac iteipa ixhuihua huan Selomit eliyaya inintlayacanca. 19Huan Hebr'on quinpixqui miyac iteipa ixhuihua. Huan iniachtohui tlayacanca itoca eliyaya Jer'ias. Nopa ompa tlayacanquetl elqui Amar'ias, huan teipa Jahaziel huan teipa Jecam'an. 20Huan Uziel quinpixqui miyac iteipa ixhuihua. Huan Mica'ia elqui inintlayacanca. Huan iniompa tlayacanca itoca eliyaya Is'ias. 21Merari huejcajquiya quinpixqui iconehua tlen inintoca eliyayaj Mahli huan Musi. Huan Mahli huejcajquiya quinpixqui iconehua tlen inintoca eliyayaj Eleazar huan Cis. 22Eleazar mijqui, niyon ax quinpixtejqui ioquichpilhua. Pero quinpixqui iichpocahua, huan inijuanti monamictijque ininhuaya ininmachconehua tlen eliyayaj iconehua Cis. 23Musi huejcajquiya quinpixqui iconehua tlen inintoca eliyayaj Mahli, Edar huan Jeremot. 24Huajca nica eltoc inintoca nopa telpocame tlen iteipa ixhuihua Lev'i tlen quinijcuilojque ipan nopa censo para elque tlayacanani tlen ininfamilias. Huan monequiyaya para quipiyase 20 xihuitl para huejcapa para tequipanose ipan nopa tiopamitl. 25David quej ni quiijtojtoya: "Toteco Dios tlen toTeco tiisraelitame, techmacatoc tlasehuilistli ica tocualancaitacahua. Huan yajaya itztos ipan altepetl Jerusal'en para nochipa. 26Huajca ama levitame ayoc monequis quihuicase nopa yoyon tiopamitl huan nochi itlamantzitzi tlen se lugar hasta seyoc." 27Huan ipan itlamiya tlajtol David, yajaya nojquiya quinilhui israelitame para ma quinijcuiloca iteipa ixhuihua Lev'i tlen quipixque 20 xihuitl para huejcapa. 28Huan nopa levitame quipixque inintequi para quinpalehuise iixhuihua Aar'on, nopa totajtzitzi, ipan tlen hueli tlamantli tequitl tlen quinnahuatiyayaj ma quichihuaca ipan ichaj TOTECO. Nojquiya levitame quimocuitlahuijque nochi nopa tlamapamitl huan nochi cuartos huan quinpalehuijque quema tlapajpacchihuayayaj huan ipan miyac tequitl ipan ichaj Toteco. 29Nojquiya eliyaya inintequi levitame para quicualtlalise nopa pantzi tlen tlaiyocatlalili para TOTECO huan nopa harina tlen quitequihuiyayaj ipan tlacajcahualistli, huan nopa pantzi canactzitzi tlen ax quipiya tlasonejcayotl, huan nopa pantzi tlen tlachijchihuali ipan sart'en ica aceite tlen olivo huan nopa sequinoc tlamantli pantzi tlen monequi quisencahuase. Nojquiya eliyaya inintequi para quitlachilise nochi tlamantli tlayejyecoli. 30Huan mojmostla ica ijnaloc huan ica tiotlac elqui inintequi para moquetzase iixpa TOTECO huan huicase huicatl tlen ica quitlascamatilise huan quihueyichihuase TOTECO. 31Huan nojquiya nopa levitame quipixque inintequi para tlapalehuise para quitencahuase tlacajcahualistli tlatlatili para TOTECO ipan nopa tonali para mosiyajcahuase sesen samano, huan ipan nopa tonali quema pehua seyoc yancuic metztli huan ipan nochi ilhuime tlen quichihuaj ipan sesen xihuitl. Huan sesen huelta quema monequiyaya quichihuase se tequitl, nopa levitame hualayayaj ica ininmiyaca tlacame tlen monequiyaya quichihuase nopa tequitl iixpa TOTECO. 32Nojquiya ininmaco nopa totajtzitzi, nopa levitame quipixque inintequi para quimocuitlahuise nopa yoyon tiopamitl campa achtohuiya mopantiyayaj ica TOTECO huan nopa cuartos tlen mocajque tiopan calijtic. Huan ica temachili nopa levitame quinpalehuiyayaj nopa totajtzitzi ipan nochi tlamantli tequitl tlen monequiyaya quichihuase.

will be added

X\