1 Chronicles 12

1Ama nimechilhuis inintoca sequin soldados tlen tlahuel motemacayayaj tlen yajque mosentilijque ica David ipan Siclag quema motlatijtinemiyaya tlen Tlanahuatijquetl Sa'ul tlen icone Cis. Ni tlacame, ica nopa sequinoc soldados tlen ya itztoyaj ihuaya David, itztoyaj tlen moquetzque m'as nechca David ipan tlatehuijcayotl. 2Nochi ni tlacame cuali quiixmatiyayaj quejatza quitequihuise nopa cuahuitoli, cuatlamintli huan tehuitlatztli. Nochi inijuanti hueliyayaj quimajcahuaj tetl o cuatlamintli ica ininma nejmatl huan ica ininma arraves. Huan nochi eliyayaj iteixmatcahua Tlanahuatijquetl Sa'ul huan hualayayaj tlen nopa hueyi familia Benjam'in. 3Iniachtohui tlayacanca itoca eliyaya Ahiezer. Ininteipa tlayacanca elqui Jo'as, iicni Ahiezer. Inijuanti itztoyaj iconehua Semaa tlen ehuayaya altepetl Gabaa. Nopa soldados tlen ni tlacame quinyacanayayaj itoca eliyayaj: Jeziel huan Pelet, iconehua Azmavet; Beraca huan Jeh'u tlen ehuayaya altepetl Anatot; 4Isma'ias tlen ehuayaya altepetl Gaba'on, se tlatehuijquetl tlen nochi quiixmatiyayaj huan se tlayacanquetl tlen nopa 30 soldados tlen tlahuel motemacayayaj; Jerem'ias, Jahaziel, Johan'an, Jozabad tlen ehuayaya altepetl Gedera; 5Eluzai, Jerimot, Beal'ias, Semar'ias huan Sefat'ias tlen ehuayayaj altepetl Haruf; 6Elcana, Is'ias, Azareel, Joezer huan Jasobeam tlen itztoyaj iteipa ixhuihua Cor'e; 7huan Joela huan Zebad'ias, iconehua Jeroham, tlen ehuayayaj altepetl Gedor. 8Nojquiya sequin soldados ipan nopa hueyi familia Gad tlen tlahuel quiixmatque tlatehuise nojquiya motemacaque ica David quema itztoya ipan nopa lugar temachtli ipan huactoc tlali. Inijuanti quipixque tlahuel miyac yajatili para tlatehuise ica yolixtzajcayotl huan cuatlamintli tlen huehueyac. Tlahuel tetique ni tlacame. Nesiyaya para quipixque fuerza hasta quipixque ininxayac queja tecuani huan motlalohuayayaj chicahuac queja masame ipan cuatitlamitl. 9Inijuanti inintoca eliyayaj: Ezer inintlayacanca, Obad'ias iniompaca tlayacanca, teipa Eliab, 10Mismana, Jerem'ias, 11Atai, Eliel, 12Johan'an, Elzabad, 13Jerem'ias huan Macbanai. 14Ni tlacame tlen nopa hueyi familia Gad nel'ia eliyayaj soldados tlen tetique. Tlen ax m'as quipixqui tetili tlen inijuanti ipati eliyaya queja 100 soldados ipan se tlatehuijcayotl. Huan tlen m'as quipixqui chicahualistli ipati eliyaya queja 1000 soldados. 15Huan ipan nopa achtohui metztli ipan ininxihui, quema nopa atemitl Jord'an mochijtoya huejcatla, nopa tlacame apanoque huan quintojtocaque nochi nopa tlacame tlen itztoyaj ipan nopa tlamayamitl itejteno atemitl ica campa quisa tonati huan ipan nica nali ipan nopa tlamayamitl ica campa calaqui tonati. 16Nojquiya yajque campa motlatijtoya David sequinoc tlacame tlen nopa huejhueyi familias tlen Benjam'in huan Jud'a. 17Huan David quisqui quinnamiquico huan quinilhui: --Intla inhualajtoque ica cuali para innechpalehuise, nimechsel'ia ica nochi noyolo huan timohuampochihuase. Pero intla inhualajtoque para innechcajcayahuase huan para innechtemactilise ininmaco nocualancaitacahua yonque ax nijchijtoc niyon se tlamantli tlen ax cuali, huajca Toteco Dios tlen elqui ininTeco tohuejcapan tatahua ma inmechtlatzacuilti. 18Huan Itonaltzi Toteco hualajqui ipan Amasai, yajaya tlen teipa mochijqui tlayacanquetl tlen nopa 30 soldados. Huan Itonaltzi Toteco quimacac itlajtol huan quej ni quiilhui David icone Isa'i: "David, tojuanti timoaxcahua. Timocahuase monechca. Tihualajtoque ica tlasehuilistli ica ta huan ininhuaya motlapalehuijcahua, Toteco moDios ma mitzpalehui." Huan David quinseli huan quinchijqui ma elica tlayacanani tlen isoldados. 19Nojquiya sequin soldados tlen hualajque tlen nopa hueyi familia Manas'es, nojquiya quicajtejque Tlanahuatijquetl Sa'ul huan motemacaque ica David quema yajaya yahuiyaya para quinpalehuis nopa filisteos para quitehuise Sa'ul. Pero quema David ajsito nopona, inintlayacancahua nopa filisteos ax quinejque para David huan itlacajhua ma tlatehuitij ininhuaya. Moilhuijque m'as cuali para sampa quincuepaltise. Moilhuiyayaj huelis David huan itlacajhua sampa moyoltlalisqu'iaj ihuaya Tlanahuatijquetl Sa'ul huan mosejcotilise sampa ihuaya huan san sejco Sa'ul huan israelitame quinmictisqu'iaj filisteos. 20Huan nica eltoc inintoca nopa tlacame tlen nopa hueyi familia Manas'es tlen motemacaque ica David quema yajaya yajqui ipan altepetl Siclag: Adnas, Jozabad, Jadiaiel, Micael, Jozabad, Eli'u huan Ziletai. Sesen tlen inijuanti eliyaya nopa hueyi tlayacanquetl tlen se mil soldados tlen nopa hueyi familia Manas'es. 21Ni tlacame huan ininsoldados quipalehuijque David ma quinquixti tlaxtequini tlen campa hueli nemiyayaj. Ni tlacame nel'ia motemacayayaj ipan tlatehuijcayotl. Huan David quinchijqui ma elica tlayacanani ipan isoldados. 22Huan mojmostla hualayayaj m'as tlacame huan motemacayayaj ica David hasta teipa quinpixqui tlahuel miyac isoldados. Inijuanti elque queja ininmiyaca ielhuicac ejcahua Toteco Dios. 23Nica ijcuilijtoc inintoca nopa soldados tlen motemacaque ica David ipan altepetl Hebr'on. Ni tlacame tlahuel quinequiyayaj para David ma eli inintlanahuatijca huan ax Sa'ul senquistoc queja Toteco quiijtojtoya para panos. 24Tlen nopa hueyi familia Jud'a itztoyaj 6 mil 800 soldados tlen mocualtlalijtoyaj ica tepos yolixtzajcayotl para quimanahuise inintlacayo tlen cuatlamintli. 25Tlen nopa hueyi familia Sime'on itztoyaj 7 mil 100 soldados tlen tlahuel motemacaj huan tlen tlahuel quipixtoyaj fuerza. 26Tlen nopa hueyi familia Lev'i itztoyaj 4 mil 600. 27Huan ipan ni tlacame itztoya Joiada tlen quinyacanqui 3 mil 700 soldados tlen eliyayaj iteipa ixhuihua Aar'on. 28Se tlen inijuanti quitocajtiyayaj Sadoc. Sadoc elqui se telpocatl tlen tlahuel motemacayaya huan quinnahuatiyaya 22 tlen ihueyi familia tlen tlatehuiyayaj huan nochi 22 nojquiya itztoyaj tlayacanani. 29Tlen nopa hueyi familia Benjam'in tlen eliyayaj huicaltini ica Sa'ul, san itztoyaj 3 mil soldados tlen quipalehuijque David. Hasta ipan ni tonali, miyac tlen nopa familia Benjam'in noja quitoquiliyayaj Tlanahuatijquetl Sa'ul. 30Tlen nopa hueyi familia Efra'in, itztoyaj 20 mil 800 soldados tlen tlahuel quipixque fuerza. Huan sese inijuanti quiseliyayaj miyac tlatlepanitacayotl ipan ifamilia. 31Tlen nopa tlajco nopa hueyi familia Manas'es, quintitlanqui 18 mil soldados para quitlalitij David ma eli tlanahuatijquetl. 32Tlen nopa hueyi familia Isacar, itztoyaj 200 tlayacanani ica ininteixmatcahua. Nochi inijuanti itztoyaj nel'ia tlalnamiquini huan quimatiyayaj quejatza eltoya tlamantli ipan inintlal huan tlaque monequiyaya quichihuase nopa israelitame para monejnemiltise xitlahuac. Huan nochi ininteixmatcahua quitoquiliyayaj senquistoc tlen ni 200 tlacame quiijtohuayayaj. 33Tlen nopa hueyi familia Zabul'on, itztoyaj 50 mil soldados tlen tlahuel motemacayayaj para tlatehuise. Huan inijuanti itztoyaj cuali tlacualtlalilme para quipalehuise David. 34Tlen nopa hueyi familia Neftal'i, itztoyaj se mil tlayacanani huan 37 mil soldados tlen mocualtlalijtoyaj para tlatehuise huan quihuicayayaj ininyolixtzajcayohua huan inincuatlaminhua tlen huejhuehueyac. 35Tlen nopa hueyi familia Dan, itztoyaj 28 mil 600 soldados tlen cuali mocualtlalijtoyaj para tlatehuise. 36Ipan nopa hueyi familia Aser, itztoyaj 40 mil soldados tlen mocualtlalijtoyaj para tlatehuise ica miyac tlamantli tepostli. 37Huan nojquiya ipan nopa seyoc inali atemitl Jord'an ica campa quisa tonati, itztoyaj 120 mil soldados tlen hualajque ipan nopa hueyi familia Rub'en, Gad huan nopa tlajco familia Manas'es. Nochi inijuanti mocualtlalijtoyaj para tlatehuise ica miyac tlamantli tepostli. 38Nochi ni tlatehuijca tlacame tlen tlahuel motemacayayaj, ajsicoj ipan altepetl Hebr'on ica nochi ininyolo para quitlalise David queja inintlanahuatijca para nochi tlali Israel. 39Huan quichijque se hueyi ilhuitl para eyi tonali. Huan tlacuajque ihuaya David pampa ininteixmatcahua quicualtlalijtoyaj se hueyi tlacualistli para quema inijuanti ajsisqu'iaj. 40Huan nopa tlacame tlen huejca ehuani queja tlen hualajque tlen nopa familias tlen Isacar, Zabul'on huan Neftal'i quihualicatoyaj tlacualistli ipan burrojme, camellos, mulas huan huacaxme. Nochi ni tlapiyalime quinmamaltijtoyaj miyac tlacualistli. Ipan ni ilhuitl quihualicaque nochi tlamantli tlacualistli, queja itlajca nopa higo cuahuitl, xocomecatl itlajca tlen huactoc, xocomeca atl, huacaxme huan borregojme pampa nochi tlacame ipan nochi tlali Israel tlahuel paquiyayaj para quitlalise David queja tlanahuatijquetl.

will be added

X\