1 Chronicles 10

1Nopa filisteos quintehuijque nopa israelitame huan cholojtejque nopa israelitame. Huan nopa filisteos quinmictijque miyac israelitame ipan nopa tepetl Gilboa. 2Huan nopa filisteos quintoquilijque Sa'ul huan iconehua, huan quinmictijque iconehua tlen inintoca eliyayaj: Jonat'an, Abinadab huan Malquis'ua. 3Teipa nochi nopa filisteos quimajcahuayayaj cuatlamintli campa Sa'ul huan quiajsique huan tlahuel quicocojque. 4Teipa Sa'ul quitzajtzili itemach huan quiilhui: "Xijquixti momachete huan xinechmicti nimantzi pampa hueli hualase filisteos huan nechchihuilise miyac tlamantli para nechpinahualtise." Pero itemach majmahuiyaya huan ax quinequiyaya quimictis. Huajca Sa'ul quicuic imachete huan mosentlapalhuili ipan itlacayo huan mijqui. 5Huan quema itemach quiitac para Sa'ul ya momicti, yajaya nojquiya momicti ica imachete. 6Huan ijquiyampa ipan san setzi tonali mijqui Sa'ul huan eyi iconehua. Huan nopona tlanqui nochi tlen eliyaya tlen ixinajcho tlen mochijtosqu'iaj tlanahuatijquetl teipa tlen ya. 7Quema quimatque nopa israelitame tlen itztoyaj ipan nopa tlamayamitl para cholojtoyaj ininsoldados huan para Sa'ul huan eyi iconehua ya mijque, quicajtejque inialtepehua huan nojquiya cholojque. Huajca nopa filisteos moaxcatijque nopa altepetini huan mocajque nopona. 8Huan mostlaijqui nopa filisteos mocuepque para quicuise nochi tlamantli tepostli tlen quicajque nopa israelita soldados tlen mijque ipan tlatehuijcayotl. Huan quema quipejpentiyahuiyayaj nopa tlamantli, quinpantijque inintlacayohua Sa'ul huan iconehua ipan tepetl Gilboa. 9Huajca quicuique iyolixtzajca Sa'ul tlen itlacayo huan quitzontequilijque itzonteco. Huan nimantzi quintitlanque tlayolmelahuani ipan nochi inintlal para ma quinyolmelahuaca tlacame huan ininteteyohua para ya mijqui Tlanahuatijquetl Sa'ul. 10Teipa quintlalijque iteposhua Sa'ul ipan itlapepecholhua nopa tiopamitl tlen ininteteyohua. Huan itzonteco quicuapilojque ipan nopa tiopamitl tlen nopa inintotiotzi tlen itoca Dag'on. 11Huan nopa israelitame ipan altepetl Jabes ipan tlali Galaad quimatque nochi tlen nopa filisteos quichihuilijtoyaj Sa'ul. 12Huajca nochi nopa tlacame tlen tlahuel motemacayayaj motlalanque huan quicuitoj tlen mocajqui tlen itlacayo Sa'ul huan inintlacayo iconehua. Huan quinhualicaque huan nopona quintlalpachojque iniomiyohua itzintla se ahua cuahuitl ipan Jabes. Huan mosajque para chicome tonali para quinnextilise tlatlepanitacayotl. 13Huajca queja nopa mijqui Sa'ul pampa ax quitlepanitac TOTECO huan mosisinijtoya ica ya. 14Nojquiya mijqui pampa ax quitlajtlani TOTECO ma quiconsejomaca, pero yajqui campa nopa sihuatl tlen quincamahu'ia mijcatzitzi. Yeca TOTECO quintzontlamilti huan nopa tlanahuatilistli tlen quipiyayaya, quimactili David tlen elqui icone Isa'i.

will be added

X\