Tito Hlɛ 3

1Mu leele pre sↄↄnri mbe pe peyɛ nyjii mbe waŋgra loplombo na jaŋgafɛɛnlɛ ŋga, mbra pe kee ndru, mbe peyɛ kna na pie kee ŋga ki nyu kro pe. 2Yo pe pan na pia na kefuɛn yuu leele na, pia na tuni, pe peyɛ nyjii, mbe peyɛ pe komm mbe ndro kro ŋga. 3Ŋgi na, nyjila ka nu na jijiele lɛ wre na chↄↄ, a o na pe ndikambla, na tro mna ki n fna. O sisam niŋge, na o yɛshↄↄrↄ yirɛ na o pe tinlɛ. O naa linku kee pini, a kɛyira naa wa o nu, leele na o pra, a o na pe pra. 4La, ŋga o na o ŋmaashↄfun Nyiɛkpↄↄ wre fooro chiɛn, na u koroo kre nya kre, 5wra o shↄ. Ki n pe kee chiriri ka o na pe, la, wre titi wraa chaa mna o fooro chin, mna o sisam je mu laa o na, mna yire Kpra Ŋumu wre wra o ŋga wre na mna o ŋga ŋmaa fↄŋgↄ. 6Nyiɛkpↄↄ na yire Yesu Kristo na mna o ŋga Kpra Ŋumu wre imi na ki fna, 7mbe ki yire u dumiɛ kre na mbe o fraka Nyiɛkpↄↄ yiɛ, mbe paan blenyini ŋmaa ŋga na o kaan kre ta. 8Kee nyjɛ ni yo ŋga krɛrɛ, yi pe kpra. Ni chaa mbe mu yire kee nyjɛ yo chiriri mbe pe loo, mbe ki ti mbe mblɛ pe Nyiɛkpↄↄ shↄ mu li kre, mbe pe yi pe keshian, mbe yire yi na mbe ŋga ki fna pe. Yire kee nyjɛ nyu, mu pe tnu ni mu lewo ŋga. 9La, ŋu rɛ, maa na jijiere kakra lii a mblɛ pe pe tolɛɛlɛ mɛɛ yeerii, na paaraa, na kakrↄ tuni Mbose mbra yire na kre, mu yɛ kun pe na. Yire kee yire krɛrɛ tnu ka n wa yi nu. 10Ndro ŋmba u leele lalaa klai kre, u jaari mbe ki da gbee shiin, na u je na pini ma tɛ kre, maa shia nyu kun na u ni na. 11Na ndro pini ma kre, mu chin na sisam pefun wi, a wre ndro wre fun kolo kre na, mu uyɛ gbun pimi ni. 12Na ndaa Atema, ndee Tichiko tun mu pan kre, gbeŋmba na mu pan ni pan Nikopoli na, ŋgi na, ni ni jawala pe na zaara nyjila kre we ni da wa. 13Gbeŋmba mu ya mbra twanfun ŋmba pe yeeri Zena wre, na Apolo na, mbe pe jaa pe kolo kre kun, le na pie yirɛ nyjɛ yi pe shian kro ta. 14A o leele pre le mbe praa chichie pini mbe jaa ya mblɛ pe shian na, pia na peyɛ leni kee nyjɛ nu tnu n wa nu. 15Mblɛ mi na pree wa mna kre kro mu shaari. O wolo mblɛ wre na pre shↄnliee nunu kre shaari o pan. Yire na Nyiɛkpↄↄ dumiɛ e tni nyjila kro nu.

will be added

X\