Tito Hlɛ 2

1La, ki fna mbe mu Kristo kolo chiriri kre nyina. 2Yo bilɛ loplombo pre pan na pe ti mbe pe yiɛto, mbe jawala ta, mbe jaa na peyɛ yiri kee nu, pe sheli shↄnlie, na koroo, na frↄ nu. 3Chiɛlɛ loplombo pre chↄↄ, yo pe pan na pe peyɛ pe na chiɛlɛ mblɛ pe pe cheche lɛ. Pia na leele kro yuu, ndee mbe kaari gbↄgbↄↄlↄ. Pra kee nyjɛ yi nyu nyina, 4mbe ki ti pe jaa bichabɛɛlɛ pre nyina mbe pe pe pilɛ kori, mbe pe biile kori, 5mbe jawala ta, mbe pe cheche, mbe jaa pe katoo lefɛɛnlɛ mblɛ pe pe pilɛ kee ndru, mbe ki ti mbe ndro wa Nyiɛkpↄↄ kee kre kee sisaa ka ta mbe yo. 6Yirifumblↄ pre chↄↄ yo pe pan na pe jawala ta. 7Ŋu titi kolo kro na, ti mbe pe mu kepele chichie le mbe mu twan. Ta koroo nyina, mu ti mbe mu yiɛ nyina kee nyjɛ mu nyina yire na. 8Ta kee nyjɛ yi fna yuu, mbe ndro wa jaa mu nyu kaanri, mbe ki ti mbe nyifɛɛrɛ mu loŋgoolo pre gbo, ŋgi na, pe n o kee sisaa ka ta mbe yo. 9Tinlɛ fna mbe li pe tafɛɛnlɛ kee na, pe ti mbe pe tafɛɛnlɛ yiɛshↄ pe na kolo kro na, pia na nyu kna na pe ni, 10ndee mbra pe juu. Ki fna mbe pe pe tafɛɛnlɛ pre nyina na pe kepele nyu, mu pe kprafɛɛnlɛ, mbe ki ti mbe o ŋmaashↄfun Nyiɛkpↄↄ wre kee kre pe niŋge ni. 11Ŋgi na, Nyiɛkpↄↄ u dumiɛ kre wↄ fimi na, mbe ndro kro yire ki na mbe ŋmaashↄmu ta. 12Kre dumiɛ ŋga ki o nyina mbe o o kepele nyjɛ yi n fna yire, na waŋgra niŋge yirɛ yire ti, mbe jawala ta, mbe fraka, mbe jaa Nyiɛkpↄↄ kolo wru waŋgra ŋga nu. 13Ŋga o tni mu na o dwan ble ŋga na o kaan kre sri ŋga, kre ble kre oo Nyiɛkpↄↄ, na o ŋmaashↄfun Yesu Kristo wre yɛnyiŋge nya. 14Wre wra uyɛ tɛɛ mu sra wↄ mu o ŋga, imi kie pe mbe u o shↄ mbe yili o sisam kro nu, mbe o pe leele cheche, mblɛ o pe u wolo, mu na chaa mbe ŋga ki fna pe. 15Ta Leele nyina yire kee nyjɛ, mu pe le gbeŋmbaa, mu mu jaŋga ŋga mu ta kro tɛɛ mu pe yiɛ kee yo pe pan. Maa ti mbe ndro mu le fiɛn.

will be added

X\