Tito Hlɛ 1

1Mi Pↄↄl, Nyiɛkpↄↄ sumifun, na Yesu Kristo bituŋu wre pan hlɛ ŋga yiri. Nyiɛkpↄↄ na ni wↄ, mna ni tun na ni sɛ ka ya u leele mblɛ u wↄ kre shↄnlie na, mbe pe nyina kpra kee ŋga kii wa o sumiɛ kre nu. 2Kre kpra kre, blenyini ŋmaa dankna ni ki paan. Nyiɛkpↄↄ ŋmba u n pe kafnu kre, wre wra kre ŋmaa ŋga kee nyu yo, mna chin mu yirɛ kro nↄↄhle. 3Nyjila ŋga wra tɛɛ kre ŋga kra da kre, wra ki wↄ mu nyina u ketaan kre nu. U ketaan kre, wra ki le ni kɛɛ, a ndaa yire o ŋmaashↄfun Nyiɛkpↄↄ wre nyu kee na mna ki kpali. 4Ni kpra pↄ Tito, ŋmba mi na wree wa shↄnlie nunu nu kre, wre ni kre hlɛ ŋga nyunↄi mbe sɛ ŋga. O lɛ Nyiɛkpↄↄ, na o ŋmaashↄfun Yesu wre pe mu ŋga dumiɛ, na wejinyiŋge. 5Ndaa mu ti Kreta na mbe mu kee nyjɛ yi fna mbe pe wa yire le mbe yi mbra nunu, mbe sumifɛɛnlɛ pre loplombo wↄ chia kro na. 6Kee nyjɛ ni mu nyina yire sↄↄnri, sumifɛɛnlɛ pre lopom n fna mbe pe u kee sisaa ka ta mbe yo. U chↄ fna mbe pe nunu, a u biile fna mbe pe shↄnlifɛɛnlɛ, ki n fna mbe pe nyibie sheli, ndee mbe pe pe ndikambla. 7Ŋga u Nyiɛkpↄↄ tnumu le kre ndra na, ki n fna mbe pe u kee sisaa ka ta mbe yo. U n fna mbra uyɛ kpↄↄri, ndee mbe u krↄ na kuun nyaanyaa, ndee mbe pe gbↄgbↄↄ, ndee mbe pe kakↄtuŋu, ndee mbe u yiɛ na nyinai swa na. 8U fna mbe pe lewo ŋmba u ja na fumblↄ le, mu chichie kori. U fna mbe pe lewo jawalafun mbe fraka, mbe pe cheche, mbe pe lewo ŋmba we jaa uyɛ yii mbe kee ŋga ki n fna gbeele. 9Ki fna mbe kpra kee ŋga pe u nyina kre, mbe u ki yii kɛshiin, mbe jaa leele gbeŋmba, mbe pe nyina kee kre, mbe leele mblɛ pe paara na kee kre taanla pre nyina kee nyjɛ na pe punu. 10Ŋgi na, leele tataaraa wa na taanri, na plɛ fana na kewɛɛ ni, Judae mblɛ pe chaa shↄnlifɛɛnlɛ pre nu kre, pre pe yire kee yire pini. 11Ki fna mbe mu ti mbe pe nyu tↄ, mbe kee yire pe yuu yire ti, ŋgi na, kee nyjɛ yi n fna mbe pe nyina kre, pe yire yi na mu na sele poponyi jawala klai, yire nyifɛɛrɛ kooloe yire na pe troi na swa chaa. 12Pre Kretae pre wa, wra pe pe kee nyanyofɛɛnlɛ pre wa, wre wra da mu yo mbo, "Kretae kafinɛfɛɛnlɛ bribri lɛ, pan pe nyi na yurɛ sisaala lɛ, pe gbashia kpↄↄ, a pan pe liliire sisaa lii." 13Kala ŋga wra yo kre na pe kpra. Kre kee ŋga ndra na, e pe yiɛ kee yo pe pan chichie mbe ki ti pe sheli shↄnlie nu. 14Mbe pia kro mbe Judae mbuura kee yire yii kɛshiin, mbe ndie tɛɛ leele mblɛ pe kpra kee kre je kre pan. 15Leele mblɛ pe pe cheche kre, yira kro pe pe pan cheche, la, leele mblɛ nu sisam nyi, a pe n shↄnli kre, yaka n wa mu pe cheche pe pan, ŋgi na, pe jawala na pe lɛɛ kee pe sisam bribri. 16Pe yuu na pe Nyiɛkpↄↄ chin, la, pe kepele n na nyina ma. Pe Nyiɛkpↄↄ pra, mu pe ndikambla, pe n fna mbe jaa kee chiriri ka pe.

will be added

X\