1 Kpra kee mbe yo e pan kre. Kristo wo wi mi, kala ma ni fnɛ. Kpra Ŋumu wre saara na, ni jawala titi chin na kala ma ni fnɛ. 2 Fooro ni yii kpↄↄ, a ni gbun na ni fiiri, ni leele ndra na. 3 Na kie na nyu, mbe ndaa yire ni leele pre titɛɛ, mbe Nyiɛkpↄↄ na ni sun, mbe ndaa kun Yesu na. 4 Nyiɛkpↄↄ leele lɛ, a u pe wↄ na u biile lɛ, mu pe ŋga u yɛnyiŋge kre, wra nyu nunu pe na pe ni, mna pe ŋga mbra yire. A pre pra kpra sumiɛ kre ta, pre pra Nyiɛkpↄↄ nyu ŋga wra yo na we pe kre ta. 5 Pe tolɛɛlɛ pra pe leele mblɛ kee ki shian, a ŋga Yesu na pan na wejikaara ni kre na, pe sele kre nu wra yili. Nyiɛkpↄↄ ŋmba jaŋga ki wɛ yirɛ kro na kre, wre wo yi dwamu nyjila kro nu. Amin. 6 La, ki n pe na Nyiɛkpↄↄ nyu ŋga u yo mu tɛɛ kre n ja mu pe. Ŋgi na, ki n pe Israel leele kro Nyiɛkpↄↄ wↄ na u wolo lɛ. 7 A ki n pe Abraham sele leele kro lɛ Nyiɛkpↄↄ biile. Nyiɛkpↄↄ na yo Abraham pan mbo, "Isaki sele leele lɛ mu nanae." 8 Ki nyina na Abraham biile mblɛ wra se imi na lewo sii kre, Nyiɛkpↄↄ biile ma, la, Nyiɛkpↄↄ nyu ŋga wra yo kre biile pre lɛ Abraham nanae. 9 Nyiɛkpↄↄ nyu ŋga wra yo kre nyina na, "Nyjila ŋga ki fna nu mbe ndruu pan, a Saara we biblↄ se." 10 A kre chiin ma, la, ŋga Rebeka na o tolɛɛ Isaki na siire ta kre, 11 Nyiɛkpↄↄ na yo Rebeka pan mbo, "Lopom wre we ble wre sumi." Nyjila ŋga ni wra yo u pan ma kre, na u n ta mu se na biile. Nyjila ŋga ni wra yo u pan ma kre, na u n ta mu se tun, a na biile pre wa n ta mu chichie, ndee sisaa ka pe tun. La, Nyiɛkpↄↄ na yire wre titi chaara na mna biile pre wa wↄ, 12 kee ŋga pra pe ma kra tia. La ki nyina na Nyiɛkpↄↄ titi, u chaara na u yire na mblɛ u cha woni. 13 Imi na pe ki nyunↄ Nyiɛkpↄↄ hlɛ kre nu mu tɛɛ mbo, "Ni Jakↄb wↄ, mu Esau je." 14 Kena mni oo yo na hin? Kena o yo na Nyiɛkpↄↄ n fraka ree? Pan ma ki nyi. 15 Ŋgi na, wra yo Mbose pan mbo, "Ŋmba fooro ni chaa mbe chin kre, wre fooro mbe chin, a ŋmba ni chaa, wre kanyana kii wa ni na." 16 Kena ki n pe ŋga lewo chaa, ndee ŋga u pini na yi, la, Nyiɛkpↄↄ fooro chiɛn na yi. 17 Pra ki nyunↄ Nyiɛkpↄↄ hlɛ kre nu na, Nyiɛkpↄↄ na yo Farao pan mbo, "Ni mu pe ŋunu, mbe mu tɛɛ mbe ni kee pe, mbe yire mu na mbe ni jaŋga nyina, mbe ki yire ki na mbe ni mɛɛ kpali waŋgra nu." 18 Kena ŋmba fooro Nyiɛkpↄↄ chaa mbe chin kre, wre fooro u chini, a ŋmba u chaa kpan, wre we ti mbe u ndie kan. 19 E wa we yo ni pan na, "A na pan ki nyi kre, mni ki pe a Nyiɛkpↄↄ na yuu na lewo ndie kan hin? Ŋmbi we jaa ŋga Nyiɛkpↄↄ chaa kna hin?" 20 A lewo wi ŋmbi, mbe u jaa Nyiɛkpↄↄ nyu kaanri hin? Yira ŋga pe faanri we jaa ki faanrifun wie mbo, "Mni a mu ni faanri imi ree?" 21 Chuɛ faanrifun n wa jaŋga ni choo na, mbe jaa choo nunu kre tɛɛ mbe chuɛ shiin faanri, mbe ka tɛɛ mbra keshian yirɛ piin, mbe ka tɛɛ mbra yirɛ wɛɛ piin ree? 22 Pan chↄↄ Nyiɛkpↄↄ chaa mbe u krↄ kuↄn nyina, mbe leele u jaŋga nya. Ki tia u frↄ tataara mblɛ pe tia u krↄ kun, a ki fna u pe kla kre na. 23 A chaa u chaa mbe u yɛnyiŋge kpↄↄ kre nyina mblɛ fooro u chin kre pan, wre mblɛ u gbeele mbe o u yɛnyiŋge kre ta kre. 24 Wre mblɛ u yeeri kre, ki n pe Judae chiin u yeeri, hali mblɛ pe n pe Judae pre kro chaa. 25 Kee ŋga Nyiɛkpↄↄ yo Hosea hlɛ kre nu yi kre mbo, "Mblɛ pe nsra pe ni leele kre, mbe pe yeeri ni leele, a waŋgra ŋga ni nsra kori kre, mbe ki yeeri 'ni waŋgra ŋga ni kori.' " 26 "A lawee ŋga nu chↄↄ pra yo pe pan mbo, 'Ni leele ma yire kre, bawa chↄↄ pie pe yeeri Nyiɛkpↄↄ ŋmba uu wa ŋmaa ni wre biile.' 27 Yisaia na yo Israel leele pan mbo, 'Hali na Israel leele nɛɛ na epo nyu tanyiɛ yi, chiɛri plɛ ŋmaa pie shↄ.' 28 Ŋgi na, o Tafun wre we leele kee li tra na mna mbe kↄ nyaanyaa." 29 Imi na Yisaia na ki yo mu tɛɛ kre mbo, "Na o Tafun, jaŋgafun Nyiɛkpↄↄ wre nsra tolɛɛlɛ ti o pan, kaa pan oo na kla na Sodom na Gomora leele lɛ." 30 Kena mni oo yo na hin? Mblɛ pe n pe Judae, a pe n naa chaa mbe fraka Nyiɛkpↄↄ yiɛ kre, Nyiɛkpↄↄ yire shↄnlie na mu pe fraka. 31 La, Israel leele mblɛ praa mbra chaa mbe yire yi na mbe fraka kre nsra yi ta. 32 Ŋgi na, pe nsra yire shↄnlie na, la, mbra na pra yire. Pe gbro dnɛ kre na, 33 imi na pra ki nyunↄ Nyiɛkpↄↄ hlɛ kre nu kre mbo, "Le, ni dnɛ teeri Ziↄn na, ŋga kie ti leele na gbroi, kre dnɛ ŋga kie ti mbe pra tuuri, a ŋmba we u shↄ mbe li kre, wa ti mbe nyifɛɛrɛ u gbo."
