Romae 8

1Kena fuŋga mblɛ pe pe Kristo wolo kre wa pimi li na. 2Ŋgi na, jaŋga ŋga ki yiri Kpra Ŋumu wre nu, na ŋmaa kaan Kristo Yesu nu kre, ki ni shↄ mu yili sisam jaŋga na kum kɛɛ. 3Nyiɛkpↄↄ na kee ŋga mbra yire nsra ja mu pe kre pe, ŋgi na, o naa pↄlɛ, o nsra ja mu li mbra yire na. Bawa wra wre titi pↄ tun, a wra pan na wejikaara ni na lewo wi, mna pan mu sisam jaŋga gbo o wejikaara nu. 4A imi kie pe mbe wre mblɛ o taa Kpra Ŋumu wre na, a o n taa wejikaara sisam na kre jaa li kee chichie nyjɛ mbra yire chaa kre na. 5Mblɛ pee wa mu tni wejikaara sisam nu kre, pe jawalaa wa mu taa wejikaara sisam yirɛ na, a mblɛ pee wa mu tni Ŋumu wre nu kre, pe jawalaa wa mu taa Ŋumu wre yirɛ na. 6Na mu mu jawala taa sisam kepele na, mu kↄlↄ yi kumu, la, na mu jawalaa wa Ŋumu wre kepele na, mu wo yi ŋmaa na wejinyiŋge. 7Ŋgi na, ŋmba u u jawala taa sisam kepele na kre, u loŋgo wi Nyiɛkpↄↄ. Ŋgi na, ufun n taa Nyiɛkpↄↄ mbra na, a wa jaa taa yi na fio. 8A mblɛ pe taa sisam kepele na kre, Nyiɛkpↄↄ yiɛ wa jaa shↄ pe na fio. 9La, yire n taa sisam kepele na. Na Nyiɛkpↄↄ Ŋumu wree wa e nu wala, ŋga Ŋumu wre we yo na ee taa. Kpra na, ŋmba nu Kristo Ŋumu wre n wa kre, u n pe Kristo wo. 10La, na Kristoo wa e nu sisam ndra na ee ku, nde Ŋumu wre saara na ee ŋmaa ta. Ŋgi na, Nyiɛkpↄↄ o fraka u yɛ pan. 11Na Nyiɛkpↄↄ ŋmba wra Yesu nyi mna yili kuulo nu wre Ŋumuu wa e nu wala, kena wre Nyiɛkpↄↄ ŋmba wra Yesu Kristo nyi mu yili kuulo nu kre, we e wejikaara nyjɛ yie ku kre ŋga ŋmaa, mbe yire u Ŋumu ŋmba uu wa e nu wre na. 12Kena ni wolo, fↄlↄ ŋga kii wa o na yi na, waa taa o sisam kepele na na. 13Ŋgi na, na mu taa sisam kepele na kre, mu ku. La, na mu yire Kpra Ŋumu wre na mu tia mu sisam kepele nyjɛ yii wa mu nu yire ku kre, mu ŋmaa ta. 14Mblɛ pe taa Nyiɛkpↄↄ Ŋumu wre na kre, Nyiɛkpↄↄ wre biile lɛ. 15Kpra Ŋumu ŋmba Nyiɛkpↄↄ e ŋga wre wa e pe tinlɛ, mbe ti e na fiɛ, la, we e pe Nyiɛkpↄↄ biile, mbe o yire Ŋumu wre na mbra Nyiɛkpↄↄ yeeri "Ndoo". 16Nyiɛkpↄↄ Ŋumu wre, na o ŋumu o dansiɛrɛ li na Nyiɛkpↄↄ biile lɛ wre. 17Ŋga o pe u biile ŋga, Nyiɛkpↄↄ dwamu ŋga u tɛɛ na u leele sri kre, oo ki ta, mbe o kro na Kristo u dwamu ŋga Nyiɛkpↄↄ tɛɛ u pan kre ta. Na o kala nya u ndra na wala, wre na wre we chaa mbe u yɛnyiŋge kre ta. 18Ni shↄ mu li na fuŋgaami kanyana nyjɛ o nyaa ŋga wa jaa da yɛnyiŋge ŋga Nyiɛkpↄↄ we wↄ mbe o nyina kre ni. 19Ŋgi na, yirɛ nyjɛ Nyiɛkpↄↄ gbeele yire kroo wa na sri mu na ble ŋga nu Nyiɛkpↄↄ we u biile wↄ mbe nyina kre sri. 20Yirɛ nyjɛ Nyiɛkpↄↄ gbeele kre, u yi sun mu tia yi pe yirɛ wɛɛ, a imi na yi chaa ma, la, pan Nyiɛkpↄↄ chaa mbe yi pe. La, dankna naa wa, 21na yirɛ nyjɛ Nyiɛkpↄↄ gbeele kre, we yi shↄ mbe yia fↄↄn, mbe pan na yi ni wre Nyiɛkpↄↄ yɛnyiŋge yɛtaara kpↄↄ ŋga we u biile ŋga kre nu. 22O chin na waŋgra yirɛ kroo wa na jiin, na nyɛni kro, na chlↄ se nyjila da, hali mu pan mu su aŋga na. 23Yirɛ nyjɛ Nyiɛkpↄↄ gbeele yire kro, hali wre mblɛ o klu mu Ŋumu wre ta finfin kre, wre chↄↄ jiin lɛɛ, na u sri mbe u pan mbe o wↄ mbe nyina na u biile lɛ wre yɛŋgɛ, mbe o oyɛ ta. 24Ŋgi na, ŋga Nyiɛkpↄↄ o ŋmaa shↄ kre, kre dankna ŋga o ta. La, na mu yira ŋga na mu dankna nyaa nyini ni kre, kena dankna yira ma na. Ŋmbi u kaan yira ŋga u ta na tɛ hin? 25Yira ŋga na o kaan kre, na o n na ki nyaa kre, kena o frↄ wru mbra ki sri. 26Pan chↄↄ Kpra Ŋumu wre yaa o na, o pↄlɛm nu. Ŋgi na, o n chin imi ki fna o na nyiɛtali, la, Ŋumu wre titi u Nyiɛkpↄↄ tali na o kaan, imi waa jaa tali mbe da. 27A Nyiɛkpↄↄ ŋmba u leele lolonyi nyaa kre, u chin ŋga Ŋumu wre jawa. Ŋgi na? Ŋumu wre u Nyiɛkpↄↄ tali u leele pan imi wre Nyiɛkpↄↄ chaa. 28O chin na yirɛ nyjɛ yi pini ŋga kro, Nyiɛkpↄↄ yi pini mbe yi nyu mbe mblɛ pe u kori ŋga, mblɛ u yeeri u chaara na kre. 29Mblɛ Nyiɛkpↄↄ na klu mu chin fa na pie pe u wolo kre, wra pe wↄ mbe pe pe na u Pↄ wre wi, imi kie pe mbe u Pↄ wre pe yɛklo u wolo tataara pre nu. 30A mblɛ Nyiɛkpↄↄ wↄ mu tɛɛ kre, u pe yeeri, a mblɛ u yeeri kre, u pe fraka, a mblɛ u fraka kre, u pe ŋga u yɛnyiŋge. 31Kena kee ŋgi oo yo na hin? Na Nyiɛkpↄↄ wa o kro, ŋmbi we jaa o pe yaka hin? 32Wre ŋmba u nsra je u Pↄ wre ŋgaa na, la, mna u tɛɛ mu sra wↄ mu o kro ŋga kre, kena wa o ŋga yirɛ kro mbe ya ree? 33Kena ŋmbi we ja mbe kala taa Nyiɛkpↄↄ leele mblɛ u wↄ kre na hin? Nyiɛkpↄↄ wre u pe ŋga tam. 34Kena ŋmbi we jaa o gbun pimi ni na hin? Yesu Kristo ree? Ↄↄnhↄn! Wre wra ku mu o ŋga, a pra u nyi mu yili kuulo nu mu o ŋga, a uu wa mu tni Nyiɛkpↄↄ kalie kre. Bawa u nyi na tali na o kaan. 35Ŋgi kie ja mbe Kristo koroo ŋga u o kori kre kla hin? Kanyana ree, ndee wejiwrɛ hin? Ndee prara, ndee klo, ndee yirɛ laarↄ, ndee yɛnyiɛ, ndee kumu hin? 36Imi na pe ki nyunↄ Nyiɛkpↄↄ hlɛ kre nu mu tɛɛ mbo, "Mu saara na, kumu kanyana nu o nyi nyjila kro nu, pe o pe na mbaala mblɛ pe shie mbe sɛ gbo lɛ." 37A nde nyjɛ krɛrɛ nu kre, o yire ŋmba u o kori wre na mu wi mu yili. 38Ŋgi na, ni shↄ mu li na kumu, ndee ŋmaa, ndee nyjeeri bitumblↄ, ndee jaŋga, ndee yirɛ nyjɛ yii wa fuŋgaami, ndee mbakↄ yirɛ, ndee faŋga, 39ndee nyjeeri, ndee tra, ndee yirɛ nyjɛ u gbeele kro, ka n wa mbe ja mbe koroo ŋga Nyiɛkpↄↄ yire o Tafun Yesu Kristo na mu o kori kre kun.

will be added

X\