Romae 7

1Ni wolo Judae, ni chin na kee ŋga ni paan mbe yo ŋga ee ki nↄↄloo, ŋgi na, e kro mbra kee chin. Na lewoo ŋmaa ni kre, kena mbra u pↄ. 2Pan chↄↄ mbra chlↄ leŋgefun pↄ mu mbra u plↄ na, nyjila ŋga ni uu ŋmaa ni. La, na blↄ wre waa ku, kena chlↄ wre shↄ mbra ŋga ki u pↄ mu mbra u plↄ na kre kɛɛ. 3La, na blↄ wree ŋmaa ni, a chlↄ wre waa sɛ blↄ fuŋu wru kre, pie u yeeri leŋgeere klafun. A na u plↄ wre waa, ku kena u shↄ mbra kre kɛɛ. Kena na waa sɛ blↄ fuŋu leŋge pia u yeeri leŋgeere klafun na. 4Ni wolo, pan ki nyi chↄↄ mu e ŋga, e yire Kristo na mu ku mu yili mbra yire kɛɛ, a ki tia e pe lefuŋu wolo, wre ndro wre Nyiɛkpↄↄ na nyi mu yili kuulo nu, mbe ki ti o kee pe tnu ni mbe Nyiɛkpↄↄ ŋga. 5Nyjila ŋga nu o naa wa sisam nu kre, sisam kooloe nyjɛ mbra yire fun kre kro, o naa yi piin mbe sɛ kumu nu. 6La, fuŋgaami ŋga, Nyiɛkpↄↄ o shↄ, a o ku mu yili mbra ŋga kra o pↄ fa kre nu. Ki tia o n na Nyiɛkpↄↄ sumi mbra lɛɛ yire pe nyunↄ mu tɛɛ yire kolo na na, la, Kpra Ŋumu wre kofↄŋgↄ kre na o sumi. 7Kena mni oo yo hin? O yo na mbra yire pe sisam kolo ree? Pan ma ki nyi. La, na mbra yire ma, kaa mba na yira ŋga pe yeeri sisam chin. Na mbra yire nsra yo na "Maa ti mu yiɛ nyina ndro yira na" mba na chin na ki pe sisaa. 8Sisam yire mbra na mu tia jajaara kee ŋga mu chin ŋga kro kolo ta mu tni ni nu. Na mbra ma, kaa sisam n jaŋga ni. 9Ŋga ni nsra mbra chin kre, na ni le, la, ŋga ni mbra yire chin kre, sisam kolo ta mu tni ni nu, a ki tia ni ku. 10Mbra nyjɛ Nyiɛkpↄↄ le mbe yi pan ŋmaa ni kre, kumu ni yi pan mi pan. 11Sisam yire mbra na mu kolo ta mu ni fana, mu ni gbo. 12Kena mbra yire, yaka n wa yi na, yi pe cheche, mu fraka, mu nyu. 13A kena yira ŋga ki nyu, kre ki ndru mu pan kumu ni mu ni ŋga ŋgaa? Kre ma, la, sisam ki yire chichie na mu pan na ki ni. Sisam ki pan kumu ni ni na, mu yire ki na mu kiyɛ wↄ mu nyina. Kena mbra yire na ki yire a ni chin na sisam pe yira sisaa titi. 14O chin na Nyiɛkpↄↄ mbra yire pe cheche, la, mi pe lewo na nyjuro, ki tia ni pe sisam tnu. 15Ni n na kee ŋga ni pini nↄↄ ndru. Ŋgi na, ŋga ni chaa ma ni piin, la, kee ŋga ni n na chaa ni pini. 16Kena na kee ŋga ni n na chaa mbe pe ni pini kre, kena ni shↄ mu li na mbra yire nyu. 17Kena mi titi jaŋga ni ma ni yire kee yire piin, la, sisam ŋga kii wa mu tni ni nu kre yi. 18Fuŋga ni chin na chichie ka n wa mu tni ni wejikaara nu, ŋgi na, ni chaa mbe chichie pe, la, mba jaa ki pe. 19Chichie ŋga ni chaa mbe pe kre, ni n na kre piin, la, sisam ŋga ni n na chaa kre, kre ni piin. 20Kena na ŋga ni n na chaa mbe pe kre ni piin waa, kena mi titi pan ma ki yiri na, la, sisam ŋga kii wa mu tni ni nu kre yi. 21Kena ni nya na na ni yo mbe chichie pe kpan, sisaa ki kaari nyjila kro nu. 22Ni Nyiɛkpↄↄ mbra kori ni jawala nu. 23La, ni mbra fↄŋgↄ ka nya ni nu, a kra wii na mbra ŋga kii wa ni jawala nu kre ni, mu ni pↄ mu sisam mbra ŋga kii wa mu tni ni nu kre ŋga. 24Ni yiɛ je! Kena ŋmbi we ni shↄ mbe yili wejiŋge ŋga ki shie na ni ni kumu nu ŋga kɛɛ hin? 25Ni Nyiɛkpↄↄ kaan mboo, na u yire o Tafun Yesu Kristo na mu ni shↄ. Mi titi jawala nu kre, Nyiɛkpↄↄ mbra ni sumi, la, wejikaara nu kre, sisam mbra ni sumi.

will be added

X\