Romae 6

1Kena mni oo yo hin? O kro mbra hankɛ lee mbe Nyiɛkpↄↄ dumiɛ nɛɛ ra? 2Ki n fna ma! Mni kie pe mbe wre mblɛ o ku mu yili sisam nu kre je mbe kro sisam nu tɛ hin? 3Ndee mu n chin na wre mblɛ ndra pe je, a wre na Yesu Kristo pe nunu kre, na pe o ndra je, a wre na wre ku ra? 4Kena o ndra jee kre tia wre na wre chaa mu ku, a pe o chaa mu le. Imi kie pe Kristo nyiɛ ŋga u lɛ na u yɛnyiŋge jaŋga tɛɛ mna u nyi mu yili kuulo nu kre ti mbe o ŋmaa fↄŋgↄ ta. 5Kena na wre na wre pe nunu mu ku, imi na wra ku kre, pan chↄↄ wre na wre we pe nunu mbe nyi mbe ŋmaa ta. 6O chin na o kepele lɛɛ kre na Kristo chaa mu ku kanyana kum kaan kre na, imi kie pe mbe o sisam kepele kre kla, mbe waa pe sisam tinlɛ na. 7Ŋgi na, na lewo ku, kena u shↄ sisam kɛɛ. 8La, na o chaa mu ku na Kristo ni kre, o shↄ mu li na wre na wre we chaa mbe tni. 9Ŋgi na, o chin na Kristo nyi mu yili kuulo nu, a wa ku na fio, kumu n jaŋga ni u na na. 10Kumu ŋga wra ku kre, wra ku mu sisam jaŋga gbo, a wa ku na fio. A ŋmaa ŋga u ta kre, u ki ta mu tni mu Nyiɛkpↄↄ ŋga. 11Pan chↄↄ ki fna mbe yire titi eyɛ jawa na e ku mu yili sisam nu, mu ŋmaa ta mu Nyiɛkpↄↄ ŋga, mu yire Yesu Kristo na. 12Kena yaa ti mbe sisam ŋunumu li e wejinyi nyjɛ yie jaa ku kre na, mbe ti e taa e niŋge yirɛ kro. 13Yaa e wejiŋge kokoo ka wru mbra sisaa pini, mbe ki kaari kefↄↄn peyira. La, e eyɛ wru e Nyiɛkpↄↄ ŋga, na leele mblɛ e ku, a u e nyi lɛ. E eyɛ wru e Nyiɛkpↄↄ ŋga poŋgo, mbe u e tɛɛ mbe kee nyjɛ yi fraka pe. 14Sisam n fna mbe ŋunumu li e na. Ŋgi na, e n wa mbra jaara, Nyiɛkpↄↄ dumiɛ nu e nyi. 15Kena ŋgi oo pe hin? Ŋga oo wa Nyiɛkpↄↄ dumiɛ nu, a o n wa mbra jaara kre ndra na, o kro mbra sisam piin ra? Pan ma ki nyi. 16E n chin na na e eyɛ wru mu ndro wa ŋga na tinlɛ lɛ yire, kena tinlɛ lɛ yire mu ufun ŋga ree? Kena na e eyɛ nyjii mu sisam ŋga ki shie lewo ni kumu nu ŋga kre, ki tinlɛ lɛ yire. A na e eyɛ nyjii mu kolo ŋga ki lewo fraka Nyiɛkpↄↄ yiɛ ŋga kre, ki tinlɛ lɛ yire. Kolo ŋga ee eyɛ nyjii mbe ŋga kro, ki tinlɛ lɛ yire. 17La, Nyiɛkpↄↄ mboo. Ŋgi na? Sisam tinlɛ na lɛ yire fa, a fuŋga e e lolonyi kro tɛɛ mu kpra kee ŋga Nyiɛkpↄↄ e ŋga kre loo, 18a ki tia e eyɛ ta, mu shↄ sisam kɛɛ, mu eyɛ wru mu pe tinlɛ mu kee ŋga ki fraka ŋga. 19E kala nↄↄ loohaa sheli, kre ki tia ndaa paara e pan imi, mbe e ki nↄↄ loo. Fa kre, e na eyɛ kaari tinlɛ poŋgo mna sisam kee nyjɛ kro ŋga. Pan chↄↄ ki fna mbe eyɛ pe tinlɛ mbe kee nyjɛ yi fraka ŋga poŋgo, mbe pe cheche. 20Nyjila ŋga e na pe sisam tinlɛ kre, na e kee ka ma na kee nyjɛ yi fraka ni. 21Kee nyjɛ yi e pini nyifɛɛrɛ aŋga ŋga, ŋga e naa yi pini fa kre tnu ŋgi e na ta yi nu hin? Yire kee yire taahaa yi kumu. 22La, fuŋga Nyiɛkpↄↄ e shↄ mu yili sisam kɛɛ, a e pe u tinlɛ. Tnu ŋga ee ta yi na ee fraka, a ki taahaa yi na ee blenyini ŋmaa ta. 23Sisam fↄtↄↄrↄ yi kumu, la, Nyiɛkpↄↄ yira ŋga u o kaan finfin yi blenyini ŋmaa, o Tafun Yesu Kristo wre saara na.

will be added

X\