Romae 4

1Kena kee ŋgi oo yo mbe wru o tolɛɛ Abraham haa hin? 2Na Abraham kee nyjɛ wra pe na Nyiɛkpↄↄ na u le na u fraka kre, we na kee ta mbra uyɛ kpↄↄ, la, wa jaa uyɛ kpↄↄ Nyiɛkpↄↄ yiɛ. 3Nyiɛkpↄↄ kee ŋga pe nyunↄ mu tɛɛ kre yo mbo, "Abraham na Nyiɛkpↄↄ shↄnli, a u shↄnlie kre ndra na, Nyiɛkpↄↄ na u shↄ na u fraka." 4A na lewo tnumu tun kre, pra u fↄtↄↄrↄ le na yira ŋga pe u kɛ yi, la, ki pe fↄtↄↄrↄ ŋga u ta. 5A ŋmba u n uyɛ taa kepele na, la, mu Nyiɛkpↄↄ ŋmba u sisampefɛɛnlɛ le na pe fraka kre shↄnli kre, wrefun wre shↄnlie Nyiɛkpↄↄ we le mbe yo u fraka. 6Ŋunu Devid na yo na lewo ŋmba Nyiɛkpↄↄ shↄ na u fraka, a ki n pe kee nyjɛ u pe na kre, ki pe dwamu mu ufun ŋga. 7mbo, "mblɛ punↄↄ Nyiɛkpↄↄ ti mu pe kɛ, mu pe sisam gbun mu tↄ kre wo yi dwamu." 8Lewo ŋmba sisam o Tafun Nyiɛkpↄↄ wre wa sↄↄnri kre wo wi dwamu. 9Kre dwamu ŋga kee ŋunu Devid yo ŋga, fɛkuɛn chiin woyi ree? Ↄↄnhↄn! Mblɛ fɛnyi pe n knumu kre wo yi na. Ŋgi na, o klu mu yo na, "Abraham na Nyiɛkpↄↄ shↄnli, kra tia wra u shↄ na u fraka." 10Nyjila ŋgi nu kre kee ŋga na pe hin? Kra pe a wra chin mu u fɛŋgɛ kun ree, ndee u fɛkↄↄnrↄ kↄkro na yi hin? U fɛkↄↄnrↄ kↄkro na ma, Nyiɛkpↄↄ na yo na u fraka, ki kↄkro wra u fɛŋgɛ kun. 11Nyiɛkpↄↄ na yo Abraham fraka ki kↄkro wra u fɛŋgɛ kun. U fɛkↄↄnrↄ kre ki nyina na, u shↄnlie na Nyiɛkpↄↄ na u shↄ na u fraka. Ki tia Abraham pe Nyiɛkpↄↄ shↄnlifɛɛnlɛ kro lɛ, a Nyiɛkpↄↄ pe shↄ na pe fraka, hali na pe n pe fɛnyi knumu. 12A mblɛ fɛnyi pe knumu kre, pe lɛ wi Abraham na chↄↄ, ki n pe ŋga pe pe fɛnyi knumu kre na yi, la, ŋga pe taa Abraham shↄnlie ŋga wra ta mna chin mu u fɛŋgɛ kun na kre, kre ki tia. 13Nyiɛkpↄↄ na yo Abraham na u sele leele pan na pe wo yi tra ŋga. Ŋga Abraham na li mbra yire na kre ma kra tia wra yo u pan ma, la, ŋga wra shↄnli, a Nyiɛkpↄↄ na u shↄ na u fraka kre kra tia. 14Nyiɛkpↄↄ nyu ŋga wra yo kre, na mblɛ pe li mbra yire na pre chiin wo yi kre, kena lewo shↄnlie pe finfin, a Nyiɛkpↄↄ nyu ŋga u yo mu tɛɛ kre pe waara. 15Mbra yire, Nyiɛkpↄↄ ndie tiniɛ ni yi paan. Mna mbra n wa kre, pra mbra taan bawa. 16Ki tia shↄnlie na ki yire a nyu yoo kre pan, mbe ki ti o chin na Nyiɛkpↄↄ nyu ŋga u yo kre ki, pe yira ŋga u kɛ finfin, a u Abraham sele leele kro kɛ ki yi. Mblɛ pe li mbra na kre chiin wo ma, la, mblɛ pe shↄnli na Abraham wi kro chaa. Ŋgi na, Abraham wi shↄnlifɛɛnlɛ kro lɛ. 17Imi na pe ki nyunↄ mu tɛɛ Nyiɛkpↄↄ hlɛ kre nu mbo, "Ni mu pe waŋgra tataara lɛ." Nyiɛkpↄↄ nyu kee ŋga wra yo kre na nyu wre titi pan. Wre Nyiɛkpↄↄ wre Abraham na shↄnli, a wre u gboolo nyini, na paara, mbe yirɛ nyjɛ yi n wa fa pan. 18Abraham naa kaan, mna shↄnli, nyjila ŋga ni kaan yira nsraa wa, a kra tia wra pe "waŋgra tataara lɛ". Imi na pe ki nyunↄ mu tɛɛ kre mbo, "Pan mu sele leele we nɛɛ mbe da." 19Wra ta yɛlɛ lafaa, nde ka nsra kun u shↄnlie na, wra u wejikaara le, mna chin na u da kum kɛ na, na u chↄ n se. 20U nsra u shↄnlie wa, a Nyiɛkpↄↄ nyu kee ŋga wra yo kre, u nsra ki li kakra, la, wra faŋga ta shↄnlie nu, na Nyiɛkpↄↄ kaan yɛnyiŋge. 21Wra shↄnli poŋgo na Nyiɛkpↄↄ we jaa kee ŋga wre Nyiɛkpↄↄ yo mu tɛɛ kre pe. 22Kre kra tia Nyiɛkpↄↄ na yire Abraham shↄnlie na mna u shↄ na u fraka. 23Kee kre pe nyunↄ Nyiɛkpↄↄ hlɛ kre nu mu tɛɛ na, "Nyiɛkpↄↄ u shↄ na u fraka kre" wre chiin na ma pra ki nyunↄ. 24Wre mblɛ oo wa mbe Nyiɛkpↄↄ o shↄ na o fraka kre kro pan pra ki nyunↄ, na o shↄnli na Nyiɛkpↄↄ wra o Tafun Yesu wre nyi mu yili kuulo nu. 25Wre Yesu ŋmba wre pra gbo o sisam ndra na, mna u nyi mu u ŋga ŋmaa, mbe u o fraka Nyiɛkpↄↄ yiɛ.

will be added

X\