Romae 3

1Kena yira ŋgi Judae wo ta mu wɛ ŋmba u n pe Judae wo na hin? Ndee tnu ŋgi kii wa fɛkↄↄnrↄ nu hin? 2Kolo tataara na kre, ŋga ki yiɛklu yi na, Judae kɛɛ Nyiɛkpↄↄ na u kee kre wru mu le. 3Pe nɛɛrɛ nsra shↄ mu li, a kre wa ti mbe Nyiɛkpↄↄ pe kafnu. 4Na lewo kro pe kafnu kuraa kre, Nyiɛkpↄↄ rɛ, wre pe kprafun nyjila kro nu, imi na pra ki nyunↄ Nyiɛkpↄↄ hlɛ kre nu mu tɛɛ kre mbo, "Leele we chin na Nyiɛkpↄↄ kpra yuu nyjila kro nu, a na u pe kee lii kre, pie nya na u fraka." 5Kena na o sisam ki tia Nyiɛkpↄↄ kpra kiyɛ wↄ chasi kre, oo jaa yo na, na Nyiɛkpↄↄ o ndie tini kena u sisaa pe ree? Imi plɛ yuu ni yuu kre. 6A pan ma ki nyi. Na Nyiɛkpↄↄ n fraka, mni we pe mbe jaa waŋgra leele kro kpra kun hin? 7A kena na ni kafinɛ na Nyiɛkpↄↄ kpra we taa mbe kiyɛ wↄ chasi, mbe ki ti u yɛnyiŋge ta waa, ŋgi kie ti mbe ni pimi li na sisampefun wi mi hin? 8A ŋgi ki tia waa yo na "E ti mbe o sisaa pe mbe ki pan hɛɛra ni hin?" Pan plɛ kala taari o na, na o tɛɛlɛ na yuu na kre kee ŋga o leele nyina. Nyiɛkpↄↄ we pre leele mblɛ gbun pimi ni imi ki fna. 9Kena wre Judae wɛ mblɛ pe n pe Judae na ree? Pan ma ki nyi. Ni klu mu ki yo na wre Judae, na mblɛ pe n pe Judae, o kroo wa sisam nu, 10imi na pe ki nyunↄ Nyiɛkpↄↄ hlɛ kre nu kre mbo, "Lewo n wa mu fraka, hali ndro nunu chom kuraa n wa. 11Ndro n wa na kee nↄↄ ndru, ndee na Nyiɛkpↄↄ haa chaa. 12Pe kro laa Nyiɛkpↄↄ kolo na, na sisam pini, a wa n wa na chichie piin, hali nunu chom kuraa n wa." 13"Pe nyu kayooro ndio na pe gboo faŋga nyaa, a pe ndile ni pe leele fana," "a wↄↄ sisaa tɛɛnrɛ yii wa pe ndile tapan." 14"Suŋgↄ na nyu sisrom kee yi pe nyu nyi." 15"Pee nyaanyaa nyimi knanwoo na, 16a pe koloe pe dↄↄya na kanyana, 17a pe n wejinyiŋge kolo chin." 18"A pe n na Nyiɛkpↄↄ fiɛ." 19Fuŋga o chin na kee ŋga Nyiɛkpↄↄ mbra yuu kre kro, mblɛ pee wa mbra yire jaara kre pan yi paara, imi kie pe mbe leele wa nyu wↄↄ ka ta, mbe ki ti waŋgra leele kro pimi li Nyiɛkpↄↄ yiɛ. 20Ŋgi na, nyjɛ mbra yo o pe kre, ndro wa jaa yire yi na mbe fraka Nyiɛkpↄↄ yiɛ. Nyjɛ mbra yire pini yi na, yie ti mbe lewo chin na u sisaa pe. 21La, Nyiɛkpↄↄ kolo ŋga na u lewo fraka kre, u ki wↄ wↄ mu o nyina, a ki n pe Mbose mbra kolo na. Mbra yire na Nyiɛkpↄↄ kee nyanyofɛɛnlɛ pre kre kolo ŋga dansiɛrɛ li. 22Lewo shↄnlie ŋga u Yesu Kristo shↄnli kre na Nyiɛkpↄↄ u fraka. Nyiɛkpↄↄ ndro ŋmba u Yesu Kristo shↄnli kro fraka. Ŋgi na, u n na leele yoori. 23Leele kro sisaa pe, ki tia pre na Nyiɛkpↄↄ yɛnyiŋge lalaa le. 24Yesu Kristo o shↄ, u saara na Nyiɛkpↄↄ o fraka finfin, o n fna mbra ki ta, u dumiɛ kre saara na yi. 25Nyiɛkpↄↄ wra u tɛɛ mu sra wↄ, mbe u kumu ti lewo sisam tinkɛɛ ta, mbe yire shↄnlie na. Kre kee ŋga nu Nyiɛkpↄↄ u kpra wↄ mu nyina. Fa kre, wra uyɛ yii, mna nyiɛlɛ ka mu wa leele sisam na. 26La, nyjila ŋga nu o nyi ŋga, Nyiɛkpↄↄ n nyiɛlɛ ka mu wa lewo sisam na na, u lewo nyina na u fraka. Kre kolo ŋga na Nyiɛkpↄↄ lewo nyina na wre titi fraka, a ndro ŋmba u Yesu Kristo shↄ mu li kro Nyiɛkpↄↄ u le na u fraka. 27Kena ŋgi ni oo tɛɛ mbe oyɛ kpↄↄ na hin? Yaka n wa. Ŋgi na, oo jaa na oyɛ kpↄↄri mbra yuu na o li mbra yire na ree? Ↄↄnhↄn! Mbra na ma Nyiɛkpↄↄ yila mu o fraka, la, ŋga o Yesu Kristo shↄ mu li kre na yi. 28Ŋga o chin yi na, shↄnlie na Nyiɛkpↄↄ lewo le na u fraka, ki n pe ŋga we taa Mbose mbra na yi. 29Ndee e jawa na Nyiɛkpↄↄ wre, Judae chiin wo wi ra? Mblɛ pe n pe Judae pre Nyiɛkpↄↄ ma na ree? Pe Nyiɛkpↄↄ wi. U pe mblɛ pe n pe Judae wo na. 30Nyiɛkpↄↄ, uu nunu chom, shↄnlie kolo na we Judae le na pe fraka, a shↄnlie kolo na we mblɛ pe n pe Judae pre le na pe fraka na. 31Kena o yire shↄnlie na mu Mbose mbra wa ree? Ↄↄnhↄn! La, mbra yiree wa yi yire haa.

will be added

X\