Romae 15

1Wre mblɛ shↄnlie ki kpↄↄ kre, o fna mbra mblɛ shↄnlie kii fiɛn kre leni gbeŋmbaa, mbe waa oyɛ yiɛnyi. 2Ki fna mbe mu kee mu ŋmbrↄ yiɛnyi, u chichie na, imi kie pe mbe ka ya u shↄnlie na. 3Ŋgi na, Kristo nsra uyɛ yiɛnyi, imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Wra tɛɛlɛɛ nyjɛ pra Nyiɛkpↄↄ tɛɛlɛ yire wru mu taa uyɛ na." 4Kee nyjɛ pe nyunↄ Nyiɛkpↄↄ hlɛ kre nu mu tɛɛ fa kre, pe yi nyunↄ mu tɛɛ mbe yi o nyina, mbe o na kaan, mbe frↄ, na gbeŋmbaa ŋga kee kre o leni kre ta. 5Kena Nyiɛkpↄↄ ŋmba u frↄ kaan, na gbeŋmbaa leni kre, u ti mbe e jaa jawala nunu ta, nyjila ŋga e taa Kristo kee yire na ŋga, 6mbe ki ti e kro chaa mbe mana nunu tɛɛ mbe Nyiɛkpↄↄ, o Tafun Yesu Kristo lɛ wre ŋga yɛnyiŋge. 7Kena e eyɛ yii chiechie, imi na Kristo e yii, mu tia e na Nyiɛkpↄↄ kaan yɛnyiŋge kre. 8Ŋgi na, ni yuu e pan na, Kristo na pan mu pe sumifun mu Judae ŋga, mna pe nyina na Nyiɛkpↄↄ pe kprafun. Imi kie pe mbe Nyiɛkpↄↄ kee ŋga wra yo o tolɛɛlɛ pan kre pe yɛŋgɛ, 9mbe ki ti mblɛ pe n pe Judae kre yire Nyiɛkpↄↄ foorochiɛn na mbe u ŋga mɛɛ. Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Kena mbe mu ŋga mboo mblɛ pe n pe Judae pre nu, mbe mɛɛ kↄ mbe mu mɛɛ yile." 10A kee kre ndru mu yo mbo, "Yire mblɛ e n pe Judae kre, e ti mbe yire na Nyiɛkpↄↄ leele mblɛ u wↄↄ preɛshↄ." 11Kee kre yo na mbo, "Yire mblɛ e n pe Judae kre, e Nyiɛkpↄↄ ŋga mɛɛ. E ti mbe ndro kro u ŋga mɛɛ." 12A Yisaia na ndru mu yo mbo, "Jɛsi nana we pan, wre we yiri mbe paan ŋunumu li mblɛ pe n pe Judae pre na, a wre na pie na kaan." 13Kena Nyiɛkpↄↄ ŋmba na o kaan wre, u e shↄnlie ŋga e ta le, mbe e ŋga yɛshↄↄrↄ, na wejinyiŋge, mbe kpra Ŋumu wre jaŋga ti mbe e dankna kpↄↄ ta nyjila kro nu. 14Ni wolo, mi titi shↄ mu li na kee chiriri yii wa e nu, a e kee yire kro chin, ki tia e ja na eyɛ nyina. 15La, ni hlɛ ŋga nu rɛ, ni gbun ta, mu kaalɛɛ yɛ wↄ mu yi nyunↄ na e sↄↄnri. Ni gbun ta, ŋgi na, Nyiɛkpↄↄ ni dumi, 16mu yo ni pan na ni pe Yesu Kristo sumifun, mblɛ pe n pe Judae pre pan. Ni sumi na Judae sↄfu wi, na ketaan ŋga ki yiri Nyiɛkpↄↄ pan kre yuu, mbe ki ti mblɛ pe n pe Judae pre, mbe pe pe na sra wↄ yira ŋga Kpra Ŋumu pe cheche, a Nyiɛkpↄↄ yiɛshↄ ki na yi. 17Kena ŋga mi na Yesu Kristo ta mu pe nunu ŋga, mbe jaa niyɛ kpↄↄ Nyiɛkpↄↄ sumiɛ nu. 18La, mba nyu nyaa mbe kee ka yo, fↄna ŋga Kristo yire ni na mbe pe, mbe ki ti mblɛ pe n pe Judae pre yire ni nyu kee, na ni kepele, 19na kawako kee nyjɛ yi Nyiɛkpↄↄ jaŋga nyina na, mbe paan ndie tɛɛ Nyiɛkpↄↄ kee kre na. A ŋga ndaa yire Jerusalɛm na na shie Ilirikum na kre, na pan ni Kristo ketaan kre kpali na shie. 20Ŋga ni chaa yi na, mbe ketaan kre kpali mbe tro mna pe n da mu Kristo kee loo tun, mbe kia kↄↄ pan na ni sɛ nyuŋgo sin mu taa wa nyuŋgo nↄↄ na. 21Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Mblɛ pan pe n da mu u kee yo tun kre, pie u kee loo. Mblɛ pe n da mu u kee loo kre, pie nↄↄ loo ta." 22Kre kee ŋga ndra na, ni n kolo ta mbe paan e shaari. 23La, fuŋga, ŋga ni tnumu kↄ kre tra ŋga nu ŋga, a kie pe yɛlɛ tataara yi ŋga, ndaa chaa mbe paan e shaari kre ndra na, 24ni shↄ mu li na mbe pan fuŋga. Ni chaa na mbaa tro na shie Spein na kre, mbe ni e nyaa shaari. Na mbaa yɛshↄↄrↄ chiɛri li e pan wa kre, mbe e ya ni na, mbe ni jaa sɛ. 25La, fuŋgaami ŋga rɛ, ni shie Jerusalɛm na mbe sɛ Nyiɛkpↄↄ leele pre ŋga yirɛ. 26Ŋgi na, Makedonia na Achia wolo tↄↄ waari yɛshↄↄrↄ ni na shie mbe sɛ pↄlɛfɛɛnlɛ mblɛ pee wa mu chaa Jerusalɛm sumifɛɛnlɛ nu pre ŋga. 27Pre titi, ki tna pe pan na pe ma pe, a pan ki fna pe pe. Ŋgi na, pe Judae pre Ŋumu dwamu kre ka ta, kena pre fna mbe pe sumi na wejiyirɛ ni. 28Kena na mbaa kre tnumu ŋga kↄ, maa sɛ swa ŋga pe waari kre kro ni mu pe ŋga kre, mbe paan tro mbe sɛ Spein na. 29A ni chin na na ni pan e jaara kre, mbe pan na Kristo dwamu kpↄↄ ni mbe e ŋga. 30Ni wolo, ni e tali o Tafun Yesu Kristo wre, na Kpra Ŋumu wre koroo nu na, e ti o Nyiɛkpↄↄ tali mbe u ya ni na. 31E Nyiɛkpↄↄ tali, mbe u ni shↄ mbe yili Judea leele mblɛ pe n shↄnli pre kɛɛ. A e Nyiɛkpↄↄ tali mbe kee ŋga mbe sɛ pe Jerusalɛm na kre Nyiɛkpↄↄ leele mblɛ pee wa wa kre yiɛ nyi. 32Kena na ki tna Nyiɛkpↄↄ pan, mbe ni ndruu pan e nu yɛshↄↄrↄ ni mbe wuu chiɛri. 33Kena yire na Nyiɛkpↄↄ ŋmba u o kaan wejinyiŋge kre e tni. Amin.

will be added

X\