Romae 14

1Ŋmba shↄnlie kii fiɛn kre, e u shↄ e chaa eyɛ nu, a la, yaa na kakra lii u jawala kee na. 2Wa shↄnlie tii mbe wra yirɛ kro lii, la, ŋmba shↄnlie kii fiɛn kre, wre na kaara ka. 3Ŋmba u yirɛ kro lii kre n fna mbe ŋmba wra yi li wre le fiɛn, a ŋmba u kaara fun wre waashia ŋmba u yirɛ kro lii wre le fiɛn. Ŋgi na, Nyiɛkpↄↄ u shↄ. 4Ŋu wi ŋmbi mbe mu jaa wa sumifun gbun pimi ni hin? U Tafun chiin we jaa u ŋga pimi ndee tam. A we tam ta. Ŋgi na, o Tafun wre we jaa u ŋga tam. 5Wa jawa na ble ka kpↄↄ mu wɛ hɛnyi na, a wa na jawa na yi kro yila. Ndro kro u ti mbe u jawala yire gbiŋmbi. 6Ŋmba u ble ka wru mu wɛ ka na kre, u ki piin na o Tafun wre kaan mɛɛ. A ŋmba u yirɛ kro lii kre, u yi lii na o Tafun wre kaan mɛɛ. Ŋgi na, u Nyiɛkpↄↄ kaan mboo ki ndra na. A ŋmba u sro ka fun kre, u ki fun na o Tafun wre kaan mɛɛ, na Nyiɛkpↄↄ kaan mboo ki na. 7Wa n wa o nu mu tni mu uyɛ ŋga, a wa n wa o nu mbe ku mbe uyɛ ŋga. 8Na o tni o, oo wa mu tni mu o Tafun wre ŋga, a na o ku, oo wa o Tafun wre kɛɛ. Kena na o le o, na o ku o, o Tafun wre wolo lɛ wre. 9Ŋgi na, Kristo na ku mu nyi, imi kie pe mbe u pe kuulo na ŋmaafɛɛnlɛ kro Tafun. 10Kena yire, mni e na e ŋmbilɛ gbuun pimi ni hin? A yire mni e na e ŋmbilɛ le fiɛn hin? O kro we yire Nyiɛkpↄↄ yiɛ mbe u o kpra kun. 11Pe ki nyunↄ Nyiɛkpↄↄ hlɛ kre nu mu tɛɛ mbo, "O Tafun Nyiɛkpↄↄ wre yo na, ŋga nii wa ŋga, mi yiɛ ndro kro we kosie kan, mbe mi Nyiɛkpↄↄ ŋga mɛɛ." 12Ki tia, o kro we o kaalɛɛ nyu wↄ Nyiɛkpↄↄ wre yiɛ nununu. 13Kena yaa ti mbe o na oyɛ gbuun pimi ni, la, ki fna o le na waa pe gbronto dnɛ mbe o ŋmbilɛ ŋga, ndee mbe kee ka pe mbe ki ti pe sisaa pe. 14Ŋga mi na o Tafun Yesu pe nunu kre ndra na, ki tia ni chin na yaka n wa mu pe nɛɛrɛ yira, la, na wa shↄ mu li na yira ka pe u pan nɛɛrɛ yira kre, wre pan ki pe nɛɛrɛ. 15Na yira ŋga mu li ndra na, kee ka we mu ŋmbrↄ ta kre, kena mu n na nyaari koroo nu. Kena maa ti sro ŋga mu li ndra na, mbe mu ŋmbrↄ ŋmba na Kristo yila mu ku wre kla. 16Kena maa ti mbe kee ŋga mu kra na ki nyu kre mɛɛ sisaa ta. 17Ŋgi na, Nyiɛkpↄↄ ŋunumu kre n pe aliire na gbↄↄrↄ kee, la, ki pe frakaa, na wejinyiŋge, na yɛshↄↄrↄ kee ŋga Kpra Ŋumu wre kaan. 18Kena ŋmba u Kristo sumi yire kolo nyjɛ na kre, Nyiɛkpↄↄ yiɛshↄ u na, a leele na u le na nyjɛ u piin kre nyu. 19Kena kee nyjɛ yi paan na wejinyiŋge ni, na o ŋmbilɛ gbeŋmba yire na ki fna o yiɛ taa. 20Yaa shia yila sro na mbe Nyiɛkpↄↄ tnumu kla. Sro kro pe cheche, la, ki pe sisaa na mu sro ka li, mbe ki ti mu ŋmbrↄ wa to sisam nu. 21Kena kee ŋga ki fna e na piin yi na, yaa kaara ka, ndee mbe simi gbↄ, ndee mbe kee ka nyini pe, ŋga kie ti mbe e ŋmbilɛ to. 22Kena shↄnlie ŋga mu ta yire kee nyjɛ nu kre, ti ki kro ŋu na Nyiɛkpↄↄ lalaa. Kee ŋga lewo le na ki nyu, a wra ki pini kre, na u n uyɛ gbun pini ni ki na kre, u yiɛshio. 23La, na mu mu jawala pe shiin sro ŋga mu li na kre, na mu ki li, Nyiɛkpↄↄ we mu gbun pimi ni. Ŋgi na, mu n ki li shↄnlie ni. A kee ŋga pee nu shↄnlie n wa kre pe sisaa.

will be added

X\