1 Kena ni wolo, ŋga Nyiɛkpↄↄ o fooro chin kpↄↄ kre na, ni e tali, ŋga ee wa na le ŋga, e eyɛ wru e sra ŋga ki pe cheche e Nyiɛkpↄↄ ŋga mbe ki u yiɛnyi. Kre ki pe kpra sumiɛ ŋga na ki fna e tro mbe u sumi. 2 Yaa eyɛ wru mbe taa waŋgra ŋga na, la, e ti mbe Nyiɛkpↄↄ e kna, mbe e jawala fↄŋgↄ ta, kre ee ŋga Nyiɛkpↄↄ chaa, na ŋga ki nyu, mu tna u pan titi chin. 3 Ŋga Nyiɛkpↄↄ ni dumi kre ndra na, ni yuu e pan kro, wa waa shia uyɛ jawa mbe wɛ imi na u n da na, la, e ti mbe e yiɛ to, mbe e yire shↄnlie ŋga Nyiɛkpↄↄ e ŋga na, mbe jawala chichie jawa. 4 Wejiŋge kokoe nɛɛ, a yi kroo wa na yi tnumu ni nununu. 5 Pan ki nyi chↄↄ, o nɛɛ, ande ŋga wre na Kristo pe nunu ŋga, o pe wejikaara nunu, a o kro keshiaan wa oyɛ na. 6 Kpra Ŋumu wre yire dumiɛ ŋga Nyiɛkpↄↄ o dumi kre na mu o ŋga yirɛ oyɛ yɛ, kena ki fna o yi tnumu tun. Na Nyiɛkpↄↄ kee ki fna o na kpali kre, ki fna o ki kpali na shↄnlie ŋga o ta ni. 7 Na sumi oo sumi kre, ki fna o sumi. A na leele o nyina naa, ki fna o yiɛnyina. 8 A na gbeŋmbaa o leni kre, ki fna o yiɛnyina. A ŋmba u yira taa, mbe u ŋmbrↄ ŋga ka kre, ufun u lɛɛ wↄ u ki ŋga. Ŋmba pe tɛɛ lopom wra leele le kre u gbeŋmba. A ŋmba u yaa leele na kre, wra ki pini yɛshↄↄrↄ ni. 9 E ti mbe e koroo pe kpra ni. E sisam fun, e na chichie piin. 10 E eyɛ kori na lobiile lɛ yire Kristo nu, e eyɛ ŋga buuro. 11 Yaa na gbashia lii, e gbeŋmba e tnumu tun, e yiɛnyina e o Tafun wre sumi. 12 E ti mbe e yiɛshↄ e dankna ŋga e ta kre na, e eyɛ yii kanyana kro nu, e na nyiɛtali nyjila kro nu. 13 E na Nyiɛkpↄↄ leele mblɛ pe shian pre kaan, e na fumblↄ le chichie. 14 Mblɛ pe e piin sisaa kre, e na dwan e na pe kaan, yaa na pe suni. 15 Mblɛ yiɛ ki shↄ kre, e ti mbe yire na pre yiɛshↄ. Mblɛ pe nyɛni kre, e ti mbe yire na pre nyɛni. 16 E ti mbe eyɛ kee eyɛ shian, yaa na eyɛ kpↄↄri, e eyɛ nyjii, a yaa na eyɛ pini kachimblɛ. 17 Na ndro mu pe sisaa kre, maa u fↄlↄ tↄ sisaa ni. E na kee nyjɛ leele chin na yi nyu yire pini. 18 E gbeŋmba na e kepele kro nu, yire na ndro kro we tni wejinyiŋge nu. 19 Ni wolo mblɛ ni kori, yaa na sisaa fↄlↄ toni, e ki ti e Nyiɛkpↄↄ krↄkuↄn ŋga. Ŋgi na, pe ki nyunↄ Nyiɛkpↄↄ hlɛ kre nu mbo, "O Tafun Nyiɛkpↄↄ wre yo na, mbe sisam fↄlↄ tↄ." 20 "Kena na klo mu loŋgo ta kre, u ŋga sro, a na gbↄↄ u ta kre, u ŋga nyumu mbe u gbↄ, na mu pe ma kre, kena mu tia nyifɛɛrɛ u gbo." 21 Yaa ti sisam nduu e na, la, e ti mbe e chichie wɛ e sisam na.
