Romae 11

1Ndaa wie na, kena Nyiɛkpↄↄ u leele pre je ree? Pan ma ki nyi. Mi titi, Israel ndro wi mi, a Abraham nana wi mi, a ni yiri Benjamin sele nu. 2Nyiɛkpↄↄ n u leele mblɛ wra klu mu wↄ pre je. Elaija kee kre pra nyunↄ Nyiɛkpↄↄ hlɛ kre nu mu tɛɛ kre, e n ki chin ra? Wra Israel leele kefuɛn yo Nyiɛkpↄↄ pan mbo, 3"Ni Tafun, pe mu kee nyanyofɛɛnlɛ pre gbo peii, mu mu sragbuɛnlɛɛ yire juari, mi chiin ni kro, a pra ni chaa mbe gbo na." 4Kee ŋgi Nyiɛkpↄↄ na yo u pan hin? Mbo, "Ni leele kagbeŋ kↄↄnashin ti niyɛ pan tɛ, pre pe n kosie kan mu sɛɛn Baal sumi." 5Pan ki nyi chↄↄ nyjila ŋga nu o nyi ŋga nu, leele mblɛ Nyiɛkpↄↄ wↄ kre, chiɛri plɛɛ wa, u dumiɛ kre saara na. 6U dumiɛ kre na ki yire, ŋga lewo pe na ma. Na ŋga lewo pe na Nyiɛkpↄↄ na yila mu u dumi kre, kena kaa u dumiɛ kre n pe dumiɛ titi. 7Kena mni oo yo hin? Yira ŋga Israel leele naa chaa kre, pe nsra ki nya. Chiɛri mblɛ wra wↄ kre, pre pra ki nya, la, hamblɛ pre na ndikana pe. 8Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Nyiɛkpↄↄ pe ŋga ndikana ŋumu, hali mu pan mu su aŋga, pe n na nyaa na pe nyiɛlɛ ni, a pe n na ndru na pe ndiile ni." 9A ŋunu Devid na yo fa mbo, "Ti mbe pe yɛliire kaari pɛlɛ pe pan, mbe pe gbro mbe to, mbe mu pe ndie tini. 10Ti mbe pe nyiɛlɛ tↄ, mbe pia na nyaa, mu pe kru mu le kanyana nu nyjila kro nu." 11A ndaa wie na, kena ŋga Judae pre na gbro kre, pra to mbe pia yiri na ra? Pan ma ki nyi. Ŋga pra hakɛ le kre ndra na, mblɛ pe n pe Judae kre na ŋmaashↄmu ta, mbe ki ti mbe Judae pre yiɛnyina. 12Judae hakɛ ki tia waŋgra ŋga dwamu kpↄↄ ta. Kena na pe kolo laarↄ ki mblɛ pe n pe Judae pre ŋga dwamu waa, kena na Judae pre kro waa pan, a pe kro chaa, pe dwamu we kpↄↄ titi. 13Fuŋga rɛ, yire mblɛ e n pe Judae kre, yire pan ni paara. Pe ni wↄ bituŋu yire mblɛ e n pe Judae kre pan, a mbe niyɛ kpↄↄ ni tnumu nu. 14Aada kre kie ti mbe ni wolo Judae pre yiɛnyina, mbe ki ti mbe pe plɛ ŋmaashↄmu ta. 15Ŋgi na, na pe jeere kre na Nyiɛkpↄↄ leele mblɛ pe n pe Judae wru nↄↄlↄ waa, kena na waa ndru mu pe shↄ, mni nyini kie taa hin? Pan kie pe na gboolo pe nyi mu ŋmaa ta. 16Na sra paanu mimi kre ka pe cheche Nyiɛkpↄↄ pan kre, mu chin na pan ki kro poŋgo pe cheche. A na tiŋge didinyi pe cheche Nyiɛkpↄↄ pan kre, mu chin na pan chↄↄ ki klɛ nyi na. 17Olive tiŋge ŋga pe luu kre, pe ki klɛ kuari mu wo, mu olive tiŋge ŋga kii wa nyaa kre klɛ yɛ le yi titɛɛ. Yire mblɛ e n pe Judae kre, pan e nyi na kre olive tiŋge nyaa wo kre yi. Fuŋgaami ŋga, dwamu kpↄↄ ŋga Judae ta kre, yire na pre wo yi. 18Kena yaa eyɛ kpↄↄ mblɛ pe kuari mu wo na tinyi klɛ yi kre yiɛ. Mni ee pe mbe eyɛ kpↄↄ pe yiɛ hin? Tiŋge kre klɛ lɛ yire, yire ma e tiŋge kre didinyi yii, didinyi yire yi yire yii. 19La, mu jaa yo na klɛ pe kuari mu wo, a ki tia mi lawee ta mu le. 20Ki pe kpra na pra pe kuari mu wo, ŋga pe nsra shↄ mu li kre ndra na, a ŋga ŋu shↄ mu li kre ki tia ŋu lawee ta. La, maa ki tɛɛ mbe muyɛ kpↄↄ, ta dↄↄtaa. 21Tiŋge kre titi klɛ yire kuraa, Nyiɛkpↄↄ nsra tia a yira yiyɛ wru mu li, kena mu jawa na, na ŋu kala sisaa pe we ŋu ti ra? 22Kee ŋga tia o chin imi Nyiɛkpↄↄ lɛɛ tna mu da, na imi u leele ndie tinii mu da. Mblɛ pe to kre, u pe ndie tinii, la, na e u shↄ mu li nyjila kro nu, we nyu e na. A na e n pe ma, we e kuari mbe wo na. 23A na Judae pre waa ndru mu pan mu shↄ mu li kre, we ndruu pe wru mbe le pe tni haa wa. Ŋgi na, uu wa jaŋga ni na we ndruu pan na pe ni na. 24Yire mblɛ e n pe Judae kre, pan e nyi na olive tiŋge ŋga kii wa nyaa, a pe ki klɛ kuari mu wo kre yi. Pe pan mu e le katoo olive tiŋge ŋga pe luu kre klɛ titɛɛ, la, kaa pan ma ki nyi fa. Judae pre, pan pre nyi na olive tiŋge ŋga pe luu katoo kre yi, kia sheli Nyiɛkpↄↄ pan na we ndruu klɛ nyjɛ pe kuari mu wo yire wru mbe le yi titɛɛ. 25Wolo, kekpra ka ndra e na, ni chaa mbe e ki chin, kie ti mbe e e jawala laa e kachindɛ kee na. Kre yi na, Judae pre ndikana kre, kia kro nyjila kro nu, na mblɛ pe n pe Judae a Nyiɛkpↄↄ pe wↄ kre nyu waa fni kre, Judae pre ndikana kre nyu we to. 26Kolo ŋga na Nyiɛkpↄↄ we Judae shↄ yi kre. Pe ki nyunↄ Nyiɛkpↄↄ hlɛ kre nu mu tɛɛ mbo, "Ŋmaashↄfun wre we yiri Ziↄn na mbe pan, we pan mbe ndrashelee kee kro wↄ mbe yili Jekↄb nanae nu. 27Nyu nunu ŋga mi na pre we pe yi na, mbe pe sisaa laa pe na." 28Ŋga Judae Nyiɛkpↄↄ ketaan kre je kre ndra na, ki tia pe Nyiɛkpↄↄ yii loŋgo, a ki tia yire mblɛ e n pe Judae kre lawee ta. La, Nyiɛkpↄↄ wre titi chaara na, u yila pe tolɛɛlɛ pre na mu Judae pre wru mu pe u nↄↄlↄ. 29Ŋgi na, na Nyiɛkpↄↄ ndro wↄ mu u dwan mu kↄ, wre Nyiɛkpↄↄ na ndru mbe u jawala chinɛ. 30Yire mblɛ e n pe Judae kre, e na ndikana pe Nyiɛkpↄↄ na fa. La, fuŋgaami Nyiɛkpↄↄ e fooro chin, ŋgi na, Judae ndikana pe. 31Pan ki nyi chↄↄ, foorochiɛn ŋga e ta kre na Judae yila mu Nyiɛkpↄↄ kee kre je, kre kie ti mbe u pre fooro chin na chↄↄ. 32Ŋgi na, Nyiɛkpↄↄ ndro kro le na u ndie kan, ki tia ki pe na nyuŋgo pe ndro kro yii mu le, mbe u yire u foorochiɛn na mbe ndro kro fooro chin. 33Nyiɛkpↄↄ yɛtaara, na u kachindɛ, na u jawala kpↄↄ titi. Ndro wa ja mbe u ndra kee chin, ndee mbe u kolo chin fio. 34Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Ŋmbi u o Tafun jawala chin hin? A ŋmbi we jaa u ŋga jawala hin? 35Ŋmbi u da mu u ŋga yaka, a ki fna mbe u ki fↄlↄ tↄ mbe ufun ŋga hin? " 36Ŋgi na, wre u yirɛ kro wa, a wre na yirɛ kro yire mu pan, a u wee yi kro. Nyiɛkpↄↄ wo yi yɛnyiŋge nyjila kro nu. Amin.

will be added

X\