Romae 1

1Mi Pↄↄl, Yesu Kristo sumifun wre pan hlɛ ŋga yiri. Nyiɛkpↄↄ u ni wↄ na ni pe bituŋu, mu ni tun na ni u ketaan kre kpali. 2Ketaan kre, Nyiɛkpↄↄ na yire u kee nyanyofɛɛnlɛ na mna ki kee yo fafa, a pra yi nyunↄ u hlɛ cheche kre nu mu tɛɛ. 3Nyiɛkpↄↄ Pↄ o Tafun Yesu Kristo wre, u kee yi ketaan kre, Ŋunu Devid sele nu pra u se, wejikaara ni na lewo wi. 4U Ŋumu Cheche wre saara na, pra u wↄ mu nyina jaŋga ni, mu nyina na Nyiɛkpↄↄ Pↄ wi yɛŋgɛ, ŋga wra ku mu nyi kre na. 5U saara na o dumiɛ ta, mu pe bitumblↄ, mbe ki ti o ti mbe waŋgra kro leele u shↄ mbe li, mbe li u kee na. 6A yire mblɛ e yiri Rom na, a Nyiɛkpↄↄ e yeeri na e pe Yesu Kristo wolo kre kro, e chaa. 7Kena yire mblɛ Nyiɛkpↄↄ kori Rom na, mu e yeeri na e pan mbe pe u wolo kre, e kro ni nyunↄi hlɛ ŋga. O Lɛ Nyiɛkpↄↄ wre, na o Tafun Yesu Kristo wre, pe e dumi, mbe e ŋga wejinyiŋge. 8Ŋga ki yiɛklu, ni yire Yesu Kristo na, na ni Nyiɛkpↄↄ kaan mboo e ndra na. Ŋgi na, waŋgra kro e shↄnlie kre ndru. 9Nyiɛkpↄↄ ŋmba ni sumi na ni loloŋgo kro ni, na u pↄ wre ketaan kre kpali kre, we jaa ni dansiɛrɛ li na nyjila kro nu na ni nyiɛtali, ni e sↄↄnri. 10Na ni nyiɛtali nyjila kro nu kre, ni tali na, na ki tna Nyiɛkpↄↄ pan kre, u ti mbe ni kolo ta mbe paan e shaari. 11Ni e chaa mbe nya, mbe o ka ya oyɛ shↄnlie na, mbe e faŋga ta. 12Kee ŋga ni nyina yi na, o kro we ya oyɛ na, yire we ka ya mi shↄnlie na, mbe mi ka ya e shↄnlie na. 13Ni wolo, ni chaa mbe e chin na nyjila tataara nu, ni chaa mbe pan mbe e nyaa shaari, la, kaalɛɛ yɛ yi ni toni kolo. Ni chaa mbe tnumu ŋga ni tun e nu kre tnu nya, imi na kra pe e ŋmbilɛ mblɛ pe n pe Judae pre nu kre. 14Ni fↄlↄ li Nyiɛkpↄↄ yiɛ, ki fna mbe ni ketaan kre kpali leele kro nu, mblɛ yiɛ ki nyaa, na mblɛ yiɛ ki n nyaa, mblɛ pe chin, na mblɛ pe n chin kro nu. 15Ki tia ki pe ni keshian na mbe ketaan kre kpali yire mblɛ ee wa Rom na kre pan na. 16Ni n na nyifɛɛrɛ piin ketaan kre na. Ŋgi na, ketaan kre pe Nyiɛkpↄↄ jaŋga ŋga na u yire mbe u shↄnlifɛɛnlɛ kro ŋmaashↄ, Judae pie yiɛklu mbe hamblɛ chiin taa. 17Ŋgi na, ketaan kre tia o chin na Nyiɛkpↄↄ tia o fraka yiɛ. Ki kro yi na oo nↄↄhle na shↄnlie ni mbe sɛ kↄ. Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Ŋmba u shↄ mu li, a Nyiɛkpↄↄ u fraka kre, we ŋmaa ta." 18Nyiɛkpↄↄ u krↄkuↄn ŋga ki yiri nyjeeri kre wↄ fimi na, kra paan sisampefɛɛnlɛ mblɛ sisam ki kpra kee kre toni, mbe pia chin pre na. 19Nyiɛkpↄↄ pe ndie tinii. Ŋgi na, kpra kee kre, pe ki chin chasi. Wre titi u pe nyina ki yi. 20Mu yire ŋga Nyiɛkpↄↄ waŋgra gbeele, u yirɛ nyjɛ praa nya nyiɛlɛ ni kre, yi kro nyaa, u blenyini jaŋga, na imi na u kepele nyi kro, lewo yi nyaa yirɛ nyjɛ wre Nyiɛkpↄↄ gbeele yire nu, ki tia lewo n wa nyu wↄↄ ka ni. 21Pe Nyiɛkpↄↄ chin, la, pia u ŋga mɛɛ ŋga ki fna na u ni, mbaa yo mboo pie u ŋga. Kewɛɛ pe jawa, a pe n na kala nↄↄ ndru. 22Pe yuu na pe kala chin, la, jijiele lɛ. 23Ŋga ki fna mbe praa Nyiɛkpↄↄ ŋmba wraa ku fio wre sumi kre, pe wre ti, mu yirɛ pe, a yɛ leele mblɛ pie jaa ku wru, a yɛ hanyiɛlɛ wru, a yɛ puɛ yurɛ wru, a yɛ pe na yurɛ mblɛ pe fulo lɛ, na yire sumi. 24Yire kee nyjɛ pe pini kre ndra na, Nyiɛkpↄↄ kɛ laa pe na, a pra nɛɛrɛ kee nyjɛ pe lolonyi chaa pini, na nyifɛɛrɛ kaalɛɛ pini pe wejikaara ni. 25Pe Nyiɛkpↄↄ kekpra wru mu pe kafinɛ, mu na yirɛ nyjɛ u gbeele yire sumi, mu wre ŋmba u yi gbeele wre ti. Wre ki fna mbe praa kaan mɛɛ nyjila kro nu. Amin! 26Yire kaalɛɛ nyjɛ leele pini kre ndra na, Nyiɛkpↄↄ kɛ laa pe na, mu pe wa nyifɛɛrɛ niŋge kolo na, hali a pe chiɛlɛ bilɛ sinlɛ kolo ŋga Nyiɛkpↄↄ wa kre ti, na nyjɛ yi n fna pini. 27Pan chↄↄ, pe bilɛ chiɛlɛ sinlɛ kolo ti, na sni na peyɛ ni. Pe yire nyifɛɛrɛ niŋge kee nyjɛ pini. Pe sisam kepele nyjɛ ndra na, Nyiɛkpↄↄ we pe ndie tini imi na ki fna. 28Ŋga leele n Nyiɛkpↄↄ kee wru mu le pe jawala nu kre ndra na, Nyiɛkpↄↄ pe ti a pra taari pre titi sisam jawala kee na. Ki tia kee nyjɛ yi n fna mbe praa pini kre, yire pe pini. 29Kee nyjɛ yi n fraka kre, yire yii wa pe nu, sisam, jajaara, na kɛyira. A nyibinyiɛ sisaa, na linkuuro, na kakrↄ, na fanaa, na jawala fↄↄn, na kroyoo 30na kabaara, na Nyiɛkpↄↄ prara, nyibishelee na yɛkpↄↄmu, na nyukpↄↄmu kee bribri yi pe nyi. Nyjila kro nu sisam pe jawa mbe pe, pra pe sefɛɛnlɛ kee loo. 31Pe n kala chin, a pra kpra li, a pe n peyɛ kori, a pe n peyɛ fooro chin. 32Pe chin na Nyiɛkpↄↄ mbra yo na leele mblɛ pe yire kee nyjɛ pini kre, kumu ki fna na pe ni. A yire kee nyjɛ chiin pee na ma pe kro kple, pe plɛ gbeŋmba pra yi pini na yaa.

will be added

X\