Wↄnnyinakee 5

1A ndaa hlɛ ka nya ŋmba wraa wa mu tni ŋujↄↄn kre na kre kalie, a pra nyunↄ ki lam na ki krↄ na, mu ki nyu yii na yirɛ ni gbee nununu kↄↄnashin. 2A ndaa nyjeeri bituŋu faŋgafun wa nya, a wraa gble leni na yuu mbo, "Ŋmbi u fna mbe jaa hlɛ kre nyu yirɛ yire knumu, mbe ki nyaa hin?" 3A pe nsra ndro ta nyjeeri wa, ndee tra mna, ndee tra tapan, ŋmba we jaa hlɛ kre nyu yirɛ yire kunumu mbe ki lam nyaa mbe le. 4A ndaa nyɛni chichie. Ŋgi na, pe nsra ndro ta ŋmba u fna mbe hlɛ kre nyaa mbe ki lam le. 5Bawa loplombo pre wa na kna mna yo ni pan mbo, "Maa nyɛni! Le, ŋmba pe yeeri 'Blɛkpↄↄ', a u yiri Juda sele nu kre, ŋmba u yiri ŋunu Devid sele nu kre, u wi mu yili, mbe jaa pan mbe hlɛ kre nyu yii yirɛ nununu kↄↄnashin yire knumu mbe ki nyaa." 6Bawa ndaa yiɛ wa mu nya na Mbↄↄpↄ waa wa mu yire yurɛ jijirɛ pre, na loplombo pre, na ŋujↄↄn kre lalaa. Mbↄↄpↄ wre na pe na pra da mu u gbo. Na u nyamblɛɛ kↄↄnashin, a u nyiɛlɛɛ kↄↄnashin, nyjɛ yi yire Nyiɛkpↄↄ Ŋumu kↄↄnashin nyjɛ wra tun waŋgra kro nu kre titɛɛ. 7A Mbↄↄpↄ wre na sɛ hlɛ kre shↄ ŋmba wraa wa mu tni ŋujↄↄn kre na kre kalie. 8Ŋga wra hlɛ kre shↄ kre, a yurɛ jijirɛ pre na loplombo fulo na jijirɛ pre na lɛɛlɛ mu kosie kan Mbↄↄpↄ wre yiɛ. Na juruu wa pe kro kɛɛ, mu swa nyiɛ kotie yɛ sembremu yii yii kɛɛ, a pe tuwe ndiom tɛɛn yɛ le le yi nu, a yi pe Nyiɛkpↄↄ leele nyiɛtalaa. 9A pra mɛɛ fↄŋgↄ kↄ mbo, "Ŋu mu fna mbe jaa hlɛ kre yii mbe ki nyu yii yirɛ yire knumu. Ŋgi na? Pra mu gbo, a mu yire mu kumu na, mu mu nyimi tɛɛ mu leele ndra lↄ mu Nyiɛkpↄↄ ŋga. Leele mblɛ ndra mna lↄ kre, plɛ yili sele nyjɛ yii wa tra na kre kro nu, na yolo kro nu, na waŋgra kro nu. 10Ŋu mu pe kro pe ŋulo na sↄfue, a pra o Nyiɛkpↄↄ wre sumi, mbe ŋunumu li tra." 11A ndaa ndru mna yiɛ wa mu le, mna Nyjeeri bitumblↄ kagbeŋ kagbeŋ tataara nya. Pra nɛɛ chiin ndro wa jaa pe tↄↄnri, na pee wa mu yire mu Nyiɛkpↄↄ ŋujↄↄn na yurɛ jijirɛ pre, na loplombo fulo na jijirɛ pre pre le lalaa. 12A pra mana kpↄↄ tɛɛ na mɛɛ koni na yuu mbo, "Mbↄↄpↄ ŋmba pra gbo kre, u fna mbe jaŋga ta, mbe uyɛ ta, mbe kachindɛ na faŋga ta, kena e u ŋga yɛnyiŋge na mɛɛ na dwamu." 13A ndaa loo na yira ŋga kii wa nyjeeri wa kro, na nyjɛ yiraa wa tra kro, na nyjɛ yiraa wa tra tapan kro, na nyjɛ yiraa wa epo tapan kro, na yirɛ nyjɛ mu chin ŋga kro, a yiraa yuu mbo, "E ti mbe o ŋmba uu wa mu tni ŋujↄↄn kre na kre, na Mbↄↄpↄ wre ŋga mɛɛ, mbe pe ŋga kpↄↄmu na jaŋga na yɛnyiŋge nyjila kro nu." 14A yurɛ jijirɛ pre na kna mbo, "Amin!" A loplombo pre na kosie kan mna pe sumi.

will be added

X\