Wↄnnyinakee 3

1"Nyunↄ mu sɛ Saadie pre bituŋu wre ŋga na, 'Kee ŋga ŋmba uu Nyiɛkpↄↄ ŋumu kↄↄnashin yire, na wↄɛlɛɛ kↄↄnashin yire ni kre yuu yi kre. Ni e kepelee chin, mu chin na ee wa mɛɛ ni kra ki nyina na e shↄnli, la, e shↄnlie kre ku. 2Kena e nyi, e e shↄnlie ŋga ki paan mbe ku kre le gbeŋmbaa. Ŋgi na, e kepele kro ma yi pe chichie Nyiɛkpↄↄ yiɛ. 3Kena kee nyjɛ pra e ŋga na nyjɛ e na loo yire, e yi sↄↄnri e li yi na, e e jawala chinɛ e laa e sisam kro. Na e je, a e n nyi, mbe pan mbe e fo na juo wi, yaa chin nyjila ŋga ni mbe pan. 4La, e chiɛri plɛɛ wa Saadie na wa, a pe n peyɛ tↄ na nɛɛrɛ ni. Ki tia mi na pre we nyaari dodonyi finyi nu, ŋgi na, pe fna ma. 5A mblɛ pie wi mbe yili kre, pan pie nyaari dodonyi finyi nu, a mba pe mɛɛ wↄ ŋmaa hlɛ kre nu. Pre mbe wↄ mbe ni Lɛ wre na u bitumblↄ pre nyina, na ni wolo lɛ. 6Na muu ndie ni kre, ŋga Kpra Ŋumu wre yuu sumifɛɛnlɛ pre pan kre loo.' " 7"Nyunↄ mu sɛ Filadelfia sumifɛɛnlɛ pre bituŋu wre ŋga na, 'Kee ŋga ŋmba u pe chehe mu pe kprafun, ŋmba kɛɛ Devid safwa kre nyi, na u krↄ nyaa mbe ndro wa jaa ki tↄ, a na u krↄ tↄ, mbe ndro wa jaa ki nyaa kre yuu yi kre. 8Ni e kepele chin, mu chin na e jaŋgaa fiɛn, ande ee wa mu taa ni kee kre kro, a e n ni je. E le, ni krↄ nyaa mu tɛɛ e pan, ŋga ndro wa wa jaa tↄ fio. 9E le, Sutna wolo kafinɛfɛɛnlɛ pre, mblɛ pe peyɛ yeeri Judae, a pe n pe Judae kre, mbe ti mbe pe paan kosie kan e yiɛ, kre pie chin na ni e kori. 10Ŋgi na, e frↄ mu li ni kee kre na, ki tia kanyana ŋga ki paan waŋgra kro na, mbe paan leele kro pe mbe le kre, mbe e shↄ mbe yili ki nu. 11Ni paan fuŋgaami, kena e yire chichie, e e shↄnlie yii kɛshiin, mbe ndro waa shia e fↄtↄↄrↄ ŋga ee ta kre shↄ e kɛɛ. 12Ŋmba we wi mbe yili kre, mbe u pe Nyiɛkpↄↄ suminyuŋgo kre lam kaan, mbe wa yili ki nu na fio. Mbe ni lɛ Nyiɛkpↄↄ wre mɛɛ nyunↄ ufun na, mbe Jerusalɛm fↄŋgↄ kre, ni lɛ Nyiɛkpↄↄ wre chia ŋga kie yiri nyjeeri mbe pan kre mɛɛ nyunↄ u na. A mbe u yeeri mɛɛ fↄŋgↄ na, mbe ki nyunↄ u na. 13Ŋmba uu ndie ni kre, u kee ŋga Ŋumu wre yuu sumifɛɛnlɛ pre pan kre loo.' " 14"Nyunↄ mu sɛ Laodikia sumifɛɛnlɛ pre bituŋu wre ŋga na, 'Kee ŋga Amin, kpra dansiɛlifun, ŋmba Nyiɛkpↄↄ na tia wra klu mu yirɛ kro gbeele kre, yuu yi kre. 15Ni e kepelee chin, e n wɛɛri, a e n nyjii. La, ni chaa na ee wɛɛri mbe e wɛɛri, a na ee nyjii mbe, e nyjii. 16La, ŋga ee pe bɛlibɛli, a yaa wɛɛri, a yaa nyjii kre ndra na, mbe e hluu yili ni nyuu. 17E kro ja na yuu na e ta, ki tia e nyu, a yaka n e shian na. La, e n chin na yire lɛ kanyanafɛɛnlɛ, na foorofɛɛnlɛ, na shianfɛɛnlɛ, na fuunlo, na tro wejiwaara. 18Kena ni e jaari na yuu e pan na, e pan ni pan, e swa nyiɛ titi lↄ, kre ee pe swafɛɛnlɛ titi. E dodonyi finyi lↄ ni pan e le, e e nyifɛɛrɛ wejiwaara yire e wa kre tↄ, e tuwe lↄ ni pan e le nyiɛlɛ, kre ee nya chiriri. 19A mblɛ ni kori kre, pre yiɛ kee ni yuu pe pan, na pe ndie tinii, kena e gbeŋmba e e jawala chinɛ e laa e sisam kro. 20E le, nii wa mu yire krↄ nyu na na ki koorii, ŋmba we ni mana loo mbe paan krↄ nyaa ni pan kre, mbe pan ufun katoo, mbe mi na wre chaa mbe li. 21Kena ŋmba we wi mbe yili kre, wre mbe ŋga kolo mbe mi na wre tni ni ŋujↄↄn kre na, imi ni wi mu yili, a mi na ni Lɛ wre tni u ŋujↄↄn kre na kre. 22Kena ŋmba uu ndie ni kre, u kee ŋga Kpra Ŋumu wre yuu sumifɛɛnlɛ pre pan kre loo.' "

will be added

X\