Wↄnnyinakee 22

1Nyjeeri bituŋu wre na ndru mna sɛ ni nyina lↄↄ ŋga nu ŋmaa nyumu nyi kre, na kii wa na chiɛnri na dwanle yi, mnaa yilii Nyiɛkpↄↄ na Mbↄↄpↄ wre ŋujↄↄn kre ndoolo, 2na fuu na tro chia kre lete lalaa. Lↄↄ kre kokoe gbee shiin yire kro na ŋmaa tinyi yire na nyi mu yire yire, na sɛni gbee kɛmbↄshiin, yɛlɛ nyu. Tinyi yire we sɛ gbee nunu nyiɛpↄ, a yi wrɛ ni pe tɛɛ na waŋgra kro leele trai. 3Yira ŋga Nyiɛkpↄↄ na sun kro wa le chia kre na. La, Nyiɛkpↄↄ na Mbↄↄpↄ wre ŋujↄↄn kre we pe chia kre na, mbe u sumifɛɛnlɛ na u sumi. 4Pie Nyiɛkpↄↄ yiɛ nya, mbe pe u mɛɛ nyunↄ pe nduweele na. 5Ble wa wↄ na fio, a kania kee wa leele shian, a yila wa yili wa. O Tafun Nyiɛkpↄↄ titi wi pe kania, mbe pra ŋunumu lii nyjila kro nu. 6A bituŋu wre na kna mu yo ni pan mbo, "Yire kee nyjɛ pe shↄnli kee, na kpra kee, a o Tafun Nyiɛkpↄↄ ŋmba wra u ŋumu le u kee nyanyofɛɛnlɛ nu kre, u u nyjeeri bituŋu tun mbe u pan mbe u sumifɛɛnlɛ nyina kee nyjɛ yia mu mbe pan kre." 7Yesu yo mbo, "E loo, ni paan fuŋgaami, kia mu, kena ŋmba we wↄnnyinakee nyjɛ yii wa hlɛ ŋga nu ŋga shↄ mbe li kre, we dwamu ta." 8A mi Jↄn, ni yire kee nyjɛ loo mu yi nya, ŋga ndaa yi loo, mna yi nya mu kↄ kre, ndaa kosie kan bituŋu wre wra ni nyina yire kee nyjɛ kre yiɛ mbe u sumi. 9La, wra kna mna yo ni pan mbo, "Maa pe ma, sumifun wi mi chↄↄ, imi na ŋu na mu wolo Nyiɛkpↄↄ kee nyanyofɛɛnlɛ pre na mblɛ pe hlɛ ŋga kee shↄ mu li kre sumi kre chↄↄ, pan ni nyi. Kena Nyiɛkpↄↄ sumi." 10A wra ndru mna yo ni pan mbo, "Maa shia wↄnnyinakee nyjɛ yii wa hlɛ ŋga nu ŋga ndra leele na. Ŋgi na, nyjila kre mbra mna, na yire kee yire we pan. 11Lewo ŋmba u sisam pini kre, ufun u kro wra sisam pini, mbe ŋmba u nɛɛrɛ kee pini kre kro mbra yi pini. A ŋmba u chichie pini kre, u kro mbra chichie pini, mbe lewo ŋmba u pe cheche kro ma." 12A Yesu na kna mbo, "Loo, ni paan fuŋgaami, ni paan na ndro kro fↄtↄↄrↄ ni mbe u fↄlↄ tↄ imi na u tnumu nyi. 13Mi wi Jlo, a mi wi Haŋu, yiɛklo na kotↄŋu, mi wi nↄↄhlehaa na nyukↄↄrↄ. 14Mblɛ pe pe dodonyi je kre we dwamu ta, a pre pie kolo ta mbe ŋmaa tiŋge kre sɛŋge ta mbe li, mbe nyaari chia kre jlonwee nyu na mbe le chia kre lam. 15La, leesaala pre, na chlɛfɛɛnlɛ pre, na tiɛrifɛɛnlɛ pre, na linkufɛɛnlɛ pre, na mblɛ pe sɛɛnlɛ sumi, na mblɛ pe kala fnɛ pe paaraa na pe kepeelee na kre, chia kre mbookrↄ pie kro. 16Mi Yesu ni nyjeeri bituŋu tun mbe u paan yire kee nyjɛ kpali sumifɛɛnlɛ pre pan. Devid nana wi mi, mi wi nyisee nyu wↄlↄ ŋga ki nyaa chiriri." 17Nyiɛkpↄↄ Ŋumu na Mbↄↄpↄ wre bijↄ wre yo na! "Pan". A e ti ŋmba we kee ŋga loo kpan kre yo na, "Pan". A ŋmba gbↄↄ ta kre, u pan u ŋmaa nyumu kre shↄ finfin. 18Ni e jaari, yire mblɛ e wↄnnyinakee nyjɛ yii wa hlɛ ŋga nu ŋga loo kre kro. Ŋmba we ka ya kee yire na kre, Nyiɛkpↄↄ we ti mbe kanyana nyjɛ yii wa hlɛ ŋga nu kre ufun nya. 19A na ndro waa ka wↄ mu yili hlɛ ŋga wↄnnyinakee nyjɛ nu kre, ufun wohaa ŋga we ta mbe yili ŋmaa tiŋge kre sɛŋge nu kre, Nyiɛkpↄↄ we ki shↄ u pan. A ufun tnihaa ŋga kii wa chia cheche ŋga kee pe nyina hlɛ ŋga nu kre, kie yili u kɛɛ. 20Ŋmba u yire kee nyjɛ dansiɛrɛ lii kre yo mbo, "Kpra yi, ni paan fuŋgaami." Amin! Pan o Tafun Yesu! 21O Tafun Yesu dwamu kre ki pan e kro na. Amin.

will be added

X\