Wↄnnyinakee 2

1"Nyunↄ mu sɛ Efiso sumifɛɛnlɛ pre bituŋu wre ŋga na, 'Kee ŋga ŋmba u wↄɛlɛɛ kↄↄnashin yii u kalie kɛ nu, mu na nyaari swa nyiɛ kaniɛ taa yirɛ kↄↄnashin yire lalaa kre yuu yi kre. 2Ni e chin, mu e kepelee chin, mu chin imi na e tnumu tun mu da, a ni chin imi na e frↄ mu da. Ni chin na yire na sisam pefɛɛnlɛɛ wa jaa tni, ki tia mblɛ pe peyɛ yeeri Nyiɛkpↄↄ bitumblↄ, a pe n pe plɛ kre, a e pe penle, mu pe nya na kafinɛfɛɛnlɛ lɛ. 3Ni chin na e frↄ tɛɛ mu kala nya tataara ni mɛɛ kre ndra na, nde e n pra. 4La, ni e kee ta mbe yo, na e n ni kori na jle kre yi. 5Kena e e kee jle yire sↄↄnri, e e jawala chinɛ, e jle kepele yire pe. Na e n pe ma, mbe ndru mbe paan e kania taa yira kre bali ki titɛɛ. 6La, kee ŋga na ni e kaan mɛɛ yi na, e Nikolaie kepele yire je imi na ni yi je kre. 7Kena ŋmba uu ndie ni kre, u kee ŋga Kpra Ŋumu wre yuu sumifɛɛnlɛ pre pan kre loo. Mblɛ pie wi mbe yili kre, pre mbe ti mbe pe ŋmaa tiŋge ŋga kii wa Nyiɛkpↄↄ Paradisi lawee kre nu kre sɛŋgɛ li.' " 8"Nyunↄ mu sɛ Smɛna sumifɛɛnlɛ pre bituŋu wre ŋga na. 'Kee ŋga ŋmba u yiɛklu, mu kro tↄ wre, ŋmba wra ku mu ndru mu nyi wre yuu yi kre. 9Ni e kanyana na e shian kro chin, a nde Nyiɛkpↄↄ haa, e ta. Ni mblɛ pe peyɛ yeeri Judae, a pe n pe Judae kre chin. Mu sisam kee nyjɛ pe yuu na taari e na yire kro chin. Pe kro, Sutna wre kotↄmblↄ lɛ. 10Kena kanyana ŋga e paan mbe nya kpan, yaa ki fiɛ. E le, Sutna wre we ti pe e plɛ yii mbe le nyuŋgo, mbe e pe mbe le, mbe e kala nya ble kɛ. E na kpra lii hali na kumu nu yi kuraa kre, mbe e ŋga blenyini ŋmaa mbe ki pe e fↄtↄↄrↄ. 11Ŋmba uu ndie ni kre, e ti mbe u ndie tɛɛ mbe kala ŋga Kpra Ŋumu wre yuu sumifɛɛnlɛ pre pan kre loo. Mblɛ pie wi mbe yili kre fiɛ wa kumu shiin wo kre ku.' " 12"Nyunↄ mu sɛ Pɛgamo sumifɛɛnlɛ pre bituŋu wre ŋga na, 'Kee ŋga ŋmba u brↄfiɛn yiɛ shiin nyu taan kre yii wre yuu yi kre. 13Ni e tnihɛɛ chin. Mna Sutna ŋujↄↄn nyi kre, bawa e ni mɛɛ yii kɛ shiin, a e n laa ni shↄnlie kro, hali nyjila ŋga ni pra ni kpra dansiɛlifun Antipa wↄ e nu mu gbo Sutna tnihaa wa kre, na ee wa mu ni shↄnli. 14La, kee chiɛri wa e na mbe ni taa yo. Plɛɛ wa e nu mu taa Balaam nyinaa yire na, imi na wra Balak nyina kooloe nyjɛ na we yire mbe ti Israel leele pre sisaa pe, mna tia praa sɛɛn kaara kaa, na tiɛri. 15Pan chↄↄ plɛɛ wa e nu mu taa Nikolaie pre nyinaa yire kro. 16Kena e e jawala chinɛ, e laa e sisam yire kro, na kre ma, mbe pan fuŋgaami na brↄfiɛn yiɛshiin ŋga ki yilii ni nyuu kre ni mbe paan ŋunↄ wi na e ni. 17Ŋmba uu ndie ni kre, u kee ŋga Ŋumu wre yuu sumifɛɛnlɛ pre pan kre loo. Ŋmba we wi mbe yili kre, mbe u ŋga Nyiɛkpↄↄ ndrandra sro ŋga pe yeeri maana kre ka mbe u li. Mbe ndruu u yeeri mɛɛ fↄŋgↄ na, mbe ki nyunↄ dnɛ fiŋge prupru na mbe u ŋga, a ndro n wa mbe mɛɛ kre chin, fↄna ŋmba kɛɛ dnɛ kre we to kre.' " 18"Nyunↄ mu sɛ Tiatira sumifɛɛnlɛ pre bituŋu wre ŋga, na 'kee ŋga Nyiɛkpↄↄ Pↄ ŋmba nyiɛlɛ yi kani na kanhun yi, a u jeelee na chiɛnri na swa nyiɛ fre yi kre yuu yi kre. 19Ni e tnumu kro chin, mu e koroo, na e shↄnlie, na e sumiɛ, na e frↄ yire kro chin. Ni chin na e ka pini mu wɛ jle na. 20La, ni e kee ka ta mbe yo. E chlↄ ŋmba pe yeeri Jezebɛl wre ti e nu, a u uyɛ pe na Nyiɛkpↄↄ kee nyanyofun wi na ni sumifɛɛnlɛ pre nyina, na pe fana, a pra tiɛri na sɛɛn kaara kaa. 21Ni u ŋga nyjila mbe u tɛɛ mbe u jawala chinɛ, la, u n na chaa mbe laa u tiɛrɛɛ kre kro. 22E le, mbe ti u yaa mbe sni dɛŋglɛ na, a mblɛ pe taa u kee na kre, mbe ti pe kala nya tataara, fↄna pe pe jawala chinɛ mu laa nyjɛ pe pini yire na. 23A mbe u biile gbo peii, mbe sumifɛɛnlɛ hamblɛ pre chin na mi ni lewo jawala kee kro chini. A mbe ndro kro ŋga fↄtↄↄrↄ ŋga kie fna na u ni. 24Kena yire Tiatira leele hamblɛ mblɛ e n taa yire sisam kooloe nyjɛ plɛ yeeri "Sutna ndrandra kee" yire kro kre, ni yuu e pan na mba e le keshian ka nu na. 25La, ki fna mbe e shↄnlie ŋga e ta kre yii kɛshiin mbe sɛ su na mbe pan. 26Kena ŋmba we wi mbe yili kre, ŋmba we na ŋga ni chaa pini mbe sɛ su waŋgra kↄ ble kre, mbe u ŋga jaŋga ŋga ndaa ta mna yili ni Lɛ pan kre ka. A mbe ti u jaŋga li waŋgra kro na, mbe tↄↄnrↄ van le u kɛɛ mbe u pe frↄ mbe juari, na pe chↄ juari, a mbe ufun ŋga nyisee nyu wↄlↄ kre. 29Kena ŋmba uu ndie ni kre, u kee ŋga Kpra Ŋumu wre yuu na sumifɛɛnlɛ pre nyina kre loo.' "

will be added

X\