Wↄnnyinakee 19

1Nyjɛ kↄkro kre ndaa yira ka tiŋge loo nyjeeri na lenɛɛrɛ maalɛɛ yi, a yiraa yuu mbo, "Haleluuya! Ŋmaashↄmu na yɛnyiŋge, na jaŋga kro Tafun wi o Nyiɛkpↄↄ wre. 2U tam kuↄn pe kpra mu fraka, a tɛtiɛrↄↄ kpↄↄ wre u u tiɛrɛɛ tɛɛ mu tra kla kre, u u pimi kun. Nyiɛkpↄↄ u ndie tini ŋga u u sumifɛɛnlɛ gbo kre ndra na." 3Leele pre mana na ndru mu yili shiin wo na mbo, "Haleluuya! Chia kre shio, a ki wree wa mbra shie nyjeeri nyjila kro nu." 4Bawa loplombo fulo na jijirɛ pre, na yurɛ jijirɛ pre na kosie kan mna Nyiɛkpↄↄ ŋmba uu wa mu tni ŋujↄↄn kre na kre yiɛ na yuu mbo, "Amin! Haleluuya!" 5A mana ka na yili Nyiɛkpↄↄ ŋujↄↄn kre lawee mbo, "Nyiɛkpↄↄ sumifɛɛnlɛ, e o Nyiɛkpↄↄ wre ŋga mɛɛ, yire mblɛ e u fiɛ kre kro, leele fiɛnfiɛn na lekpↄɛ kro." 6Ndaa yira ka tiŋge loo, a kra pe na lenɛɛrɛ mana yi. Na ki tini na chↄlↄjuu yi. Mnaa tini na nyiɛtwanraa yi badaaŋga. A ndaa loo na pe paara kpↄↄ mbo, "Haleluuya! Ŋgi na? O Tafun jaŋgafun Nyiɛkpↄↄ wre wi ŋunu. 7E ti mbe o yiɛshↄ kpↄↄ, mbe o na u kaan yɛnyiŋge. Ŋgi na? Fuŋga Mbↄↄpↄ wre bijam nyjila kre da. A u bijↄ wre uyɛ kna. 8Pe bijↄ wre ŋga kolo na u Mbↄfiŋge ŋga ki chiɛnri mu pe cheche tↄ, mbↄfiŋge kre ki Nyiɛkpↄↄ lefrakae pre kepele nyina." 9Bituŋu wre na kna mu yo ni pan mbo, "Kee nyjɛ nyunↄ, mblɛ pie yeeri mbe pe paan Mbↄↄpↄ wre bijam sro kre li kre wo yi dwamu." A bituŋu wre na kna mna yo ni pan mbo, "Nyiɛkpↄↄ titi nyu kayolo yi kre." 10A ndaa kosie kan bituŋu wre yiɛ mbra u sumi, a wra kna mbo, "Maa pe ma, sumifun wi mi, imi ŋu na mu wolo pre sumi, mu Yesu kpra kee kre yii kɛshiin kre chↄↄ pan ni nyi. Kena kosie kan Nyiɛkpↄↄ yiɛ. Yesu kee yire chↄↄ Kpra Ŋumu wre na wↄ mu Nyiɛkpↄↄ kee nyanyofɛɛnlɛ pre nyina." 11A ndaa nyjeeri nya na ki nyaa, a ndaa sofiun wa nya. Ŋmba wraa wa mu tni u na kre mɛɛ na yi, Shↄnlifun na Kprafun, a u fraka u kpra kuↄn, na u ŋunↄ wiire nu. 12U nyiɛlɛ naa kani na kanhun yi, a wra ŋunu juulee juule tataara. A pra mɛɛ ka nyunↄ u na, ndro nsraa wa mu ki chin, fↄna wre chiin bↄkↄ. 13Wra dodoŋgi titnↄŋↄ ka le, a pra nyimi nyaara ki na poŋgo. A u mɛɛ ŋga na pe u yeeri yi "Nyiɛkpↄↄ kee." 14A ŋunↄ wifɛɛnlɛ mblɛ pee wa nyjeeri na taa u kro, mu nduu soolo fimble na, mna dodonyi finyi prupru le le. 15Brↄfiɛn yiɛshiin nyutaan ka naa yilii u nyuu. Kre ni we tɛɛ mbe waŋgra leele kla. Mbe tↄↄnrↄ fwa tɛɛ mbe pe le. Wre we pan na Nyiɛkpↄↄ jaŋgafun wre krↄ kuↄn kpↄↄ kre ni, mbe Simi kre yuwi ki fɛɛrihaa. 16Pra mɛɛ ka nyunↄ u dodoŋgi kre, na u jesiŋge na mbo, "Ŋulo kro kro Ŋunu, na tafɛɛnlɛ kro Tafun." 17Ndaa nyjeeri bituŋu wa nya na uu wa mu yire yila na, na paara badaaŋga na hanyiɛlɛ mblɛ pe tro nyiɛ babaari kro yeeri mbo, "E pan e fni titɛɛ e Nyiɛkpↄↄ sro kpↄↄ kre li. 18E pan e fni e ŋulo, na sojae loplombo, na sojae, na soolo, na pe nduufɛɛnlɛ, na leele mblɛ e chin ŋga kro, mblɛ pe lↄ, na mblɛ pe n lↄ, na lekpↄɛ na bɛɛlɛ, e pan e pe wejikaara wru e li." 19Bawa ndaa yurↄ wre na ŋulo mblɛ pee wa tra na kre na pe ŋunↄ nya, na pe pan mu fni titɛɛ mbe ŋunↄ wi na sofiun nduufun wre na u ŋunↄ ni. 20Pra yurↄ wre na kafinɛ Nyiɛkpↄↄ kee nyanyofun wre wraa dobodobo woni yurↄ wre yiɛ na kre yii. Wre wra yire u dobodobo yire na mna mblɛ yurↄ wre tnↄ, kre na mblɛ pe u sɛɛn kre sumi kre fana. Yurↄ wre na kafinɛ kee nyanyofun wre, pra pe yii lewolo mna sɛ le kanhun tapla ŋga nu pwa tuwe nyi, na nyini kre nu. 21Sofiun nduufun wre na brↄfiɛn yiɛshiin ŋga kraa yilii u nyuu kre tɛɛ mna leele hamblɛ pre gbo peii, a hanyiɛlɛ pre na li mu yↄↄ mu tro.

will be added

X\