Wↄnnyinakee 16

1A ndaa mana kpↄↄ ka loo na ki yili suminyuŋgo wa na yuu bitumblↄ kↄↄnashin pre pa mbo, "E sɛ Nyiɛkpↄↄ krↄkuↄn kotie kↄↄnashin yire kanyana yire kna e wo tra." 2A bituŋu ŋmba u yiɛklu wre na sɛ u kotolo kre kna mna wo tra. Klɛ badɛnyi nyjɛ yi yaa na to to leele mblɛ na yurↄ wre tnↄmu na nyi, a pra na u sɛɛn kre sumi pre na. 3Bituŋu shiinwo wre na u kanyana kna mna wo epo nu, a ki nyumu na kna nyimi mna ndri na gboo nyimi yi, a yurɛ mblɛ praa wa epo nu kro na ku peii. 4Bituŋu taarɛwo wre na u kanyana kna mna le lↄɛ na bloe nu, a yira kaari nyimi. 5Bawa ndaa loo na bituŋu ŋmba u lↄɛ le kre yuu mbo, "Nyiɛkpↄↄ, mu kpra ŋga mu kun ŋga fraka, ŋu nunu mu pe cheche, ŋu muu wa fuŋgaami, a mnaa wa fa. 6Pre leele mblɛ pra mu sumifɛɛnlɛ na mu kee nyanyofɛɛnlɛ nyimi kna mna wo kre, kre na mu pe ŋga nyimi mbe pe gbↄ, ki fna na pe ni." 7A ndaa mana ka loo na ki yili sragbunu kre nu na yuu mbo, "O Tafun Nyiɛkpↄↄ jaŋgafun, mu tam na mu pimi ŋga mu kuun pe kpra mu fraka." 8A bituŋu jijirɛwo wre na u kotolo kre kanyana kna mna wo yila na, mbe ki wɛɛri mbe leele sro na kanhun yi. 9Yila kre wrɛmu na leele sro mu wɛ, a pra na Nyiɛkpↄↄ ŋmba uu wa na jaŋga ni kanyana yire na kre suni, pe nsra pe jawala chinɛ mna Nyiɛkpↄↄ ŋga mɛɛ. 10Bituŋu kↄnↄwo wre na u kanyana kotolo kre kna mu wo yurↄ wre ŋujↄↄn kre na. Titɛɛ kre nu, wↄmu na pan lawee ŋga nu yurↄ wre ŋunumu lii kre nu kro. 11Ki wejiwrɛm sisaa na tia leele naa pe ndile niↄ, na Nyiɛkpↄↄ ŋmba uu wa nyjeeri wre suni, pe klɛ yire yira toto pe na kre ndra na. La, pe nsra pe jawala chinɛ mna laa pe sisam kro. 12Bituŋu kↄↄnanuwo wre na u kotolo kre kanyana kna mna le lↄↄ kpↄↄ ŋga pe yeeri Eufreti kre nu. Lↄↄ kre nyumu na kↄ peii, mbe ŋulo mblɛ pie yiri yilafinhaa mbe pan kre jaa tro ki nu. 13A ndaa ŋumufuɛn taarɛ plɛ nya a pra pe na kpanhↄↄnlↄ lɛ, na yilii wↄↄ badaaŋga wre, na yurↄ wre, na kafinɛ Nyiɛkpↄↄ kee nyanyofun wre nyuu. 14Pre lɛ Sutna wre ŋumufuɛn mblɛ pe kawako kee pini kre. Pre ŋumufuɛn taarɛ pre, pre pe shie mbe sɛ tra ŋulo fni mbe pe paan ŋunↄ wi na Nyiɛkpↄↄ jaŋgafun wre ni u ble kpↄↄ kre nu. 15"E le, mbe paan e fo na jio wi, a ŋmba we jaa tni mbe shie, mbe u yonyi le chichie, mbe wa tro wejiwaara, mbe nyifɛɛrɛ u gbo leele yiɛ na kre, wre wo yi dwamu." 16A ŋumufuɛn pre na pan na ŋulo pre ni mu ble lawee ka nu, pe ki yeeri Amagedↄn Hebrie kayolo nu. 17A bituŋu kↄↄnashinwo wre na u kotolo kre kna mna wo fuflɛ na. A mana badaaŋga ka na yili ŋujↄↄn kre kii wa suminyuŋgo nu wa kre nu mbo, "Ki kↄ!" 18Titɛɛ kre nu, nyiɛ naa nyini na tini na twanri, a tra na seeri badaaŋga. Mu yire ŋga pe lewo wa, tra n da mu seeri ma tun. Kre ki wɛ yi kro na. 19Chia kpↄↄ kre na yↄↄlɛ taarɛ, a waŋgra kakpↄɛ yire kro na juari, la, Nyiɛkpↄↄ nsra Babilↄn chia kpↄↄ kre sisam fɛɛ. Wra tia Babilↄn na u krↄ kuↄn simi kre gbↄ peii. 20Kooyↄↄsu na nyuɛ na klↄ yi titɛɛ mna fun. 21Nyiɛ subie nyjɛ yira sna mbe jaa ndro gbo naa tuuri leele na. A leele pre naa Nyiɛkpↄↄ suni pe kanyana yire praa nyaa kre ndra na. Ŋgi na, kra pe kanyana kpↄↄ mu pe ŋga.

will be added

X\