Wↄnnyinakee 15

1Ndaa ndru mna kawako kee ka nya nyjeeri na, kraa fiɛrɛ ni mu tro. Ndaa nyjeeri bitumblↄ kↄↄnashin nya, a praa paan na kanyana nununu kↄↄnashin ni, a yire kↄkro kre, kanyana wa pan na, a yire nu Nyiɛkpↄↄ krↄ kↄↄn kre nyu we to. 2Bawa ndaa yira ka nya na epo yi, kanhun na chaa ki nu, a kraa chiɛnri na dwanle yi. Na mblɛ pe yurↄ wre na u sɛɛn, na u tnↄmu je kre, na pee wa mu yire epo kre nyu na, mna pe juru nyjɛ ni pe Nyiɛkpↄↄ sumi yii kɛɛ. 3A praa Nyiɛkpↄↄ sumifun Mbose na Mbↄↄpↄ wre mɛɛ koni mbo, "O Tafun Nyiɛkpↄↄ jaŋgafun, mu kepeelee kpↄↄ mu pe kawako ni. Waŋgra kro ŋunu, mu kooloe kro fraka, a mu pe kpra ni. 4O Tafun, ŋmbi uu wa a wa mu fiɛ hin? Ndee mbe wa mu mɛɛ kre ŋga yɛnyiŋge hin? Ŋgi na, ŋu chiin mu pe cheche. Waŋgra kro we pan mbe mu sumi, na mu mu kpra kↄↄn kre wↄ fimi na." 5Nyjɛ kↄkro ndaa nyjeeri suminyuŋgo kre nya na ki nyu nyaa, a Nyiɛkpↄↄ yirɛ nyjɛ yi u dansiɛrɛ lii kree wa ki lam. 6A bitumblↄ kↄↄnashin mblɛ pan yire kanyana kↄↄnashin yire nyi kre na yili suminyuŋgo wa, mna dodonyi finyi chiɛnri wee yɛ le, mna swa nyiɛ greree tɛɛ mna pe gbun grere. 7A yurɛ jijirɛ pre nunu na swa nyiɛ kotie kↄↄnashin nyjɛ nu Nyiɛkpↄↄ ŋmba uu wa mu tni blenyini wre krↄkuↄn kre nyi yire le bitumblↄ kↄↄnashin pre kɛɛ. 8Nyiɛkpↄↄ wre yɛnyiŋge na u jaŋga kre na tia wree na yili mna suminyuŋgo kre nyi, a ndro wa nsraa wa mbe jaa le wa, mna sɛ su ŋga kanyana kↄↄnashin nyjɛ ni bitumblↄ kↄↄnashin pre na pan yire nyu na to.

will be added

X\