Wↄnnyinakee 12

1Bawa kawako kee ka na pe nyiɛ yiɛ na, a ndaa nya na chlↄ wa yila paari na yoŋgo yi, a ki pe na nyiɛpↄ na u yire, a wↄɛlɛɛ nununu kɛmbↄshiin pe na juulee yi u ndra na. 2Na chlↄ wre chaa mbe se, a selɛɛ na u yaa wra nyɛni. 3Kawako kee ka na pe nyiɛ yiɛ na na, ndaa wↄↄ badaaŋga wa nya, wra nyina, a u ndrɛ naa kↄↄnashin, a u nyamblɛ naa kɛ, a yirɛ yɛ na pe na ŋunu juulee yi u ndrɛ yire kro na. 4Wra u naa tɛɛ mna wↄɛlɛɛ yↄ taarɛ mna yi nunu tini mna pan mu wo tra. Wra sɛ yire chlↄ ŋmba wraa chaa mbe se kre yiɛ, na waa se to, mbe u pↄ wre wru mbe jↄli. 5A chlↄ wre na biblↄ se, ŋmba we waŋgra kro le na tↄↄnrↄ van ni. La, Nyiɛkpↄↄ na pↄ wre wru mna sɛ u tɛɛ wre titi ŋujↄↄn jaara. 6A chlↄ wre na fɛ mna sɛ fimi lawee yire nu, lawee ŋga Nyiɛkpↄↄ gbeele na mu tɛɛ u pan, mbe u pↄↄri wa ble kagbeŋge na lafɛɛshiin na fuloe taarɛ kre nu. 7Bawa ŋunↄ badaaŋga ka na kun nyjeeri wa, Nyiɛkpↄↄ Nyjeeri Bituŋu, Maikɛl, na u bitumblↄ na wↄↄ wre na u bitumblↄ na tun. 8La, pra wↄↄ wre na u wolo pre ja, a pe nsra lawee ta nyjeeri wa mbe tni. 9A pra wre wↄↄ badaaŋga wre kun mu wa tra, wre wi wↄↄ lↄlↄ ŋmba pe yeeri Sutna kre, ŋmba u waŋgra kro fana kre. Pra wre na u bitumblↄ pre kro kun mu wa tra. 10A ndaa mana badaaŋga ka loo nyjeeri mbo, "Fuŋga Nyiɛkpↄↄ ŋmaashↄmu kre, na u jaŋga kre, na u ŋunumu lie kre, na u Kristo wre jaŋga kre pan. Ŋgi na, pe ŋmba u yire Nyiɛkpↄↄ yiɛ na o ŋmbilɛ nyu kaanri lafo na ble kre, pe u kun nyjeeri mu wa tra. 11Mbↄↄpↄ wre nyimi saara na, na kpra kee kre dansiɛrɛ ŋga pe li kre ndra na, pe wi mu yili. Ŋgi na? Praa chaa mbe pe ŋmaa wa mbe fun, mbe ku kee kre ndra na. 12Kena e ti mbe e yiɛshↄ kpↄↄ yire mblɛ ee wa nyjeeri wa kre kro. La, mblɛ ee wa tra na epo yiɛ na kre, e atɛ! Ŋgi na, pe Sutna wre ni a u tii tra, a u krↄ kun badaaŋga. Ŋgi na, u chin na u nyjila kro fiɛɛn." 13Ŋga wↄↄ wre na chin na pe u ni mu wa tra kre, wra chlↄ wre wra biblↄ wre se kre le nyini. 14Pra chlↄ wre ŋga nyuu badaaŋga wa kuɛn shiin, mbe u yiri mbe shↄ wↄↄ wre kɛɛ mbe sɛ fimi lawee nu, mbe pe u pↄↄri wa yɛlɛ taarɛ na yↄↄ. 15Wↄↄ wre na nyumu tuuru tataara na lↄↄ yi, mbe ki pan mbe chlↄ wre fo mbe sɛ. 16A tra na ya chlↄ wre na, mna nyumu kre wↄↄ wre na tuuru kre shiun peii. 17Wↄↄ wre krↄ na kun na chlↄ wre ni, a kra tia wra sɛ mbe sɛ tun na chlↄ wre biile mblɛ pe li Nyiɛkpↄↄ mbra yire na, mu Yesu kekpra nyjɛ u nyina yire kro shↄnli, mu taa u na kre kro ni. Wↄↄ wre naa wa mu yire epo tanyiɛ na.

will be added

X\