Wↄnnyinakee 1

1Yesu Kristo kee nyjɛ Nyiɛkpↄↄ na u ŋga, mna tia wra yi wↄ mu u sumifɛɛnlɛ nyina na yire kee yire wa mu kuraa mbe pan. A Yesu na u nyjeeri bituŋu tun, a wra pan mna kee yire krɛrɛ wↄ mna u sumifun Jↄn nyina, 2a mi Jↄn na Nyiɛkpↄↄ na Yesu kee nyjɛ ndaa nya mna loo yire kro dansiɛrɛ li. 3Kena ŋmba we kee nyjɛ tↄↄnri kpↄↄ mbe leele loo kre we dwamu ta o Tafun wre pan, a mblɛ pie kee yire loo mbe li yi na kre we dwamu ta. Ŋgi na, nyjila kre mbra mna. 4Mi Jↄn, ni kee nyjɛ nyunↄi na paan mbe sumifɛɛnlɛ kↄↄnashin nyjɛ yii wa Asia tra nu kre ŋga. Ni wolo, yire na dumiɛ na wejinyiŋge ŋga ki yiri ŋmba wraa wa fa, mu wa aŋga, mu wa mbe pan na kre, na ŋumu kↄↄnashin pre pee wa u ŋujↄↄn kre yiɛ kre, 5na Yesu Kristo ŋmba u pe kpra dansiɛrɛlifun wre, bijlo ŋmba u klu mu nyi mu yili kuulo nu kre, waŋgra ŋulo kro ŋunu wre e tni. U o kori, mu yire u kumu na u nyimi ŋga wra kna mu wo kre na, mna o sisam laa o na, 6mu o pe u ŋunumu kre lebiile, a o pe sↄfue mu na u Lɛ Nyiɛkpↄↄ wre sumi. Kena Yesu na yɛnyiŋge na jaŋga kre ki tni nyjila kro nu. Amin. 7E le, u paan tloe nu, ndro kro we u nya, hali mblɛ pra u gbo kre kro. Waŋgra leele kro we nyɛni na fooro ni u yiɛ. Ki pe kpra. Amin. 8O Tafun Nyiɛkpↄↄ yo mbo, "Mi wi yɛklo na kotↄŋu, Jaŋgafun wre. Mi ndaa wa fa, mu wa aŋga, mu wa na paan na kre." 9Mi wi Jↄn, e ŋmbrↄ wre, ŋga yire na Yesu pe nunu ŋga, kanyana nunu o kro nyaa, a o kro wo yi u ŋunumu kre, a frↄ nunu o kro frↄ. Ŋga ndaa Nyiɛkpↄↄ na Yesu kekpra kre kpali kre ndra na, pra ni yii mna sɛ ni wa kooyↄↄsu ŋga pe yeeri Patmos kre na. 10O Tafun sumi ble ka na to, a ndaa wa na sumi, a Kpra Ŋumu wre na pan ni nu, a ndaa mana kpↄↄ ka loo ni kro a kraa tini na bnↄɛ yi 11mbo, "Kee nyjɛ mu nya ŋga nyunↄ mu le hlɛ nu mu sɛ sumifɛɛnlɛ fnimu kↄↄnashin nyjɛ yii wa Efiso, na Smɛna, na Pɛgamo, na Tiatira, na Saadi, na Filadelfia, na Laodikia na kre ŋga." 12Ŋga ndaa mana kre loo mna kna mu le kre, swa nyiɛ kaniɛ taa yirɛ kↄↄnashin ndaa nya na yii wa mu yire, 13a ndaa ndro wa nya yi lalaa na Lewo Pↄ wre wi, a wra dodoŋgi titnↄŋↄ le, a kra da u jewrɛ na, mu swa nyiɛ greree pↄ gbun na. 14U ndra, na u nyjure na fniŋge prupru na mbafiun yooro yi, mu pe na nyiɛsubie yi, a u nyiɛlɛ naa kani na kanhun yi. 15A u jeelee naa chiɛnri na pe swa nyiɛ fre le kanhun mu ki je, a u mana naa tini na chↄlↄjuu yi. 16Wra wↄɛlɛɛ kↄↄnashin yii u kalie kɛ nu, a brↄfiɛn yiɛ shiin ŋga nyu ki tna naa yilii u nyuu, a u yiɛ naa chiɛnri na lafo yila yi. 17Ŋga ndaa u nya ma kre, a ndaa to u yiɛ mu sni na gboo wi, a wra u kalie kɛ taa ni ndra na mbo, "Maa fiɛ! Mi wi yɛklo na kotↄŋu wre. 18A mi wi ŋmba uu wa mu tni nyjila kro nu kre, ndaa ku fa, la, ni ndru mu nyi, a mba ku na fio. Mi kɛɛ kumu na kuulo lawee jaŋga kre nyi. 19Kena nyjɛ mu nya ŋga kee nyunↄ fuŋgaami, mu nyjɛ yii wa fuŋgaami, na nyjɛ yii wa kro na paan yire krɛrɛ nyunↄ mu ya. 20Wↄɛlɛɛ kↄↄnashin nyjɛ mu nya ni kalie kɛ nu, na swa nyiɛ kaniɛ taa yirɛ kↄↄnashin nyjɛ mu nya yire, yi ndrandra kee yi kre. Wↄɛlɛɛ kↄↄnashin yire mu nya kre, sumifɛɛnlɛ fnimu kↄↄnashin yire bitumblↄ lɛ, a kaniɛ taa yirɛ kↄↄnashin yire mu nya kre, sumifɛɛnlɛ fnimu kↄↄnashin yire yi."

will be added

X\