Filipie Hlɛ 2

1Kena ŋga e tni Kristo mɛɛ nu ŋga ki e kaan gbeŋmbaa ŋgaa? Kena eyɛ koroo kre e gbeŋmba ŋgaa? Kena o kroo nunu Nyiɛkpↄↄ Ŋumu wre nu ŋgaa? Kena eyɛ kee eyɛ shian ŋgaa? 2Kena e tni lɛɛ nunu ni, e eyɛ kori, mbe e nyu na e jawala pe nunu mbe ki ti ni yiɛshↄ kpↄↄ. 3A wa waa na wii wre nunu wo na, ndee mbra chaa mbe pe chin na u wɛ u ŋmbilɛ na, la, e eyɛ nyjii e na leele kro kaan yiɛ. 4Wa waa na wre chiin kala jawa, la, e na e ŋmbilɛ kee jawa na. 5E ti Yesu Kristo kepele na u jawala ŋga kraa wa u pan kre tni e nu. 6U kepele kro nu kre, pan wra nyi na Nyiɛkpↄↄ wi. U nsra uyɛ kpↄↄ na wre na Nyiɛkpↄↄ we yila. 7La, wra kre kpↄↄmu kre tɛɛ mbɛɛ na mna uyɛ pe sumifun. A pan pra u se na lewo wi, 8a wra uyɛ nyjii mna ndie tɛɛ u Lɛ wre pan, mna sɛ ku kanyana kumu kaan kre na. 9Kre kee ŋga ndra na Nyiɛkpↄↄ na u nyi mna u ŋga kpↄↄmu na mɛɛ ŋga ki wɛ mɛɛ kro na. 10Kre ndra na, mblɛ pee wa nyjeeri, na tra yiɛ na, na mblɛ pee wa tra tapan kro fna na pe Yesu mɛɛ loo kre, mbe pe kosie kan, 11mbe yo na Kristo wi o Tafun, mbe ki ti mbe u Lɛ Nyiɛkpↄↄ wre mɛɛ ta. 12Kena ni wolo, imi e na ja mu kro mu ndie tɛɛ ni pan Nyiɛkpↄↄ kee kre na nyjila ŋga ni ndaa wa e jaara kre, yaa ti mbe ki pe nyjila ŋga ni nii wa e nu chiin, la, ni sɛɛ kↄkro kre, e ndie tɛɛ e fiɛrɛ na buuro wru e e ŋmaashↄmu tnumu tun e kↄ. 13Ŋgi na, Nyiɛkpↄↄ wa na tnumu tuni e nu imi kie pe mbe e na chaa mbe jaa ŋga wre titi chaa pe. 14Kee ŋga ee na pini kro, yaa na taanri, ndee mbra kebɛɛlɛ wie. 15Imi kie pe mbe pia e kee sisaa ka taa yo, mbe e pe cheche na Nyiɛkpↄↄ biile lɛ yire, a ee wa mu tni waŋgra leele sisampefɛɛnlɛ mblɛ pe n fraka nu. E fniŋge pe nu imi na wↄɛlɛɛ fniŋge nyjeeri kre, 16ŋga e ŋmaa kee kre yii na pe kaan kre ndra na pan ki fna e pe, kena na e pe ma kre, mbe kee ta mbe e yiɛshↄ kpↄↄ, na Yesu waa ndru mu pan shiin wo, ŋgi na, kie nyina na ni tnumu ŋga ni yɛnyiɛ tɛɛ mu tun kre n pe waara. 17Kena na pe ni gbo mu ni nyimi ya e shↄnlie na, na sra yirɛ yi kre, ki tna ni pan, na mi na yire kro we ni yɛshↄↄrↄ kre li. 18A pan chↄↄ ni chaa mbe e yiɛshↄ, mbe mi na yire e yɛshↄↄrↄ kre li. 19Ni kaan na Yesu Kristo we ti ni jaa Timotio tun e pan nyaanyaa, mbe ki ti na waa ndru mu pan mu e mandiɛ taan bↄ ni pan kre, mbe ki ni le faŋga. 20Ni n ndro wa ni mu ya ni na, a mi na wre jawalaa nunu, a e kee u shian na Timotio wi. 21Ndro kro wii pre titi keshian na, a ki n pe Yesu Kristo kee na pe wii. 22A yire titi, e Timotio chin imi na u kepele nyu mu da, na imi mi na wre nyaari, a u ya ni na, na ndro na u pↄ wi mu ketaan kre yo. 23Na bawa kee nyjɛ yie ni da mna nya kre, mbe u tun e pan wa nyaanyaa. 24A ni shↄnli na Yesu Kristo we ni ŋga kolo nyaanyaa mbe ni pan wa na. 25A ni ki jawa na ki pe keshian na mbe ti mbe o ŋmbrↄ Epafrodito ndru mbe pan e jaara. Yire e na tia wra pan mu ya ni na, a mi na wre na tnumu nunu tun, a wra wi mu ya ni na. 26A fuŋgaami e kro la u ta, a wra e chaa mbe ya. U jawala u hau. Ŋgi na? E na loo na u yaa. 27A wra yaa yɛŋgɛ, kra kro fiɛn mbe wra ku. La, Nyiɛkpↄↄ na nyu u na, a mi na wre kro na Nyiɛkpↄↄ na nyu. Ŋgi na? Nyiɛkpↄↄ nsraa chaa mbe ni fooro kee nɛɛ ni na mbe tro. 28Ki tia ni chaa mbe ti u ndru mbe pan mbe e u nya. Ni chin na na e u nya kre e yiɛ we shↄ, a kia ni shian na. 29E ŋmbrↄ wi o Tafun mɛɛ nu, kena e u yii na yɛshↄↄrↄ ni. A na e ndro nya ma na wre wi kre, e u ŋga buuro. 30Ŋgi na, wra wejiwrɛ nya, a kra kro fiɛn mbe wra u ŋmaa waafun Kristo tnumu ŋga na e na u tun ni pan kre na.

will be added

X\