Filipie Hlɛ 1

1Pↄↄl na Timotio, Yesu Kristo sumifɛɛnlɛ pre, o pan hlɛ ŋga yiri na shie Nyiɛkpↄↄ leele, na pe loplombo na pe yafɛɛnlɛ pre pan. Leele mblɛ u wↄ mu le Yesu Kristo mɛɛ nu Filipi na kre. 2O Lɛ Nyiɛkpↄↄ na o Tafun Yesu Kristo wre u e ŋga dumiɛ na wejinyiŋge. 3Na nyiɛtali kpan ni ni Nyiɛkpↄↄ kaan mboo nyjila ŋga mu mbe e kee jawa kpan, 4na yɛshↄↄrↄ ni. 5Ŋgi na, mi na yire nyu nunu ta na yaa oyɛ na, mu yire nyjila ŋga ni e ketaan kre loo mu pan mu su aŋga na. 6A ni shↄnli na Nyiɛkpↄↄ ŋmba u kepele chichie kre nↄↄ hle e nu kre, we ki tun mbe sɛ su Yesu Kristo paan shiin wo kre nu. 7Ki fna na mbe kee nyjɛ krɛrɛ jawa na e ni. Ŋgi na, nyjila kro nu, e kee wa ni loloŋgo nu, a mi na yire kro wo yi Nyiɛkpↄↄ dumiɛ ŋga u o ŋga kre ŋgi na, Nyjila ŋga ni pra ni yii mna sɛ le nyuŋgo, na ŋga ndaa ni nyu woni na yuu na ketaan kre pe kpra kee kre, na mi na yire lɛ. 8Nyiɛkpↄↄ wre titi chin imi na ni e kori Yesu Kristo ndra na. 9A ŋga nyiɛ ni tali na e kaan yi na e koroo we sɛ yiɛ tataara kachindɛ na nↄↄloo nu, 10imi na kie pe mbe e ja mbe ŋga ki nyu chiriri chin mbe wↄ, mbe pe cheche mbe pia wa kee sisaa taa yo, mbe sɛ su nyjila ŋga nu Kristo pan ble kre we da, 11kena pe e nya na mu yire Yesu Kristo na kre, e fraka, mbe ki Nyiɛkpↄↄ ŋga yɛnyiŋge, mbe leele Nyiɛkpↄↄ ŋga mɛɛ e kepele ndra na. 12Ni wolo, ni chaa mbe e chin na kee nyjɛ yi ni da, na ŋga pra ni le nyuŋgo kre, ki tia Nyiɛkpↄↄ ketaan kre na kpali na shie yiɛ, 13a sojae ŋunu katoo shiefɛɛnlɛ pre, na mblɛ pe mbra wa kre kro chin na Kristo ndra na pe ni le nyuŋgo. 14A ki tia ni wolo pre tataara shↄnlie ta kpↄↄ o Tafun wre nu, mu jaŋga badaŋga ta na Nyiɛkpↄↄ kee kre yuu, a pe n na fiɛ. 15Plɛ yenyjam na kakra tɛɛ na Kristo wre kee yuu, a plɛɛ wa mu yiɛ sin na ki yuu. 16Mblɛ pe yiɛ sin kre pe koroo tɛɛ na ki yuu, mu chin na ketaan kre dansiɛrɛ lie na pe ni yii mu le nyuŋgo ŋga nu. 17A leele mblɛ pe yenyjam na kakra tɛɛ na kee kre yuu kre n na Kristo kee kre yuu kolo chichie na, la, chaa pe chaa mbe peyɛ kpↄↄ, na jawa na, na pe pe ma kre, kie ti mbe ni fooro kpↄↄ li nyuŋgo mna. 18Kolo kro na kre, na kpra pe lii oo, na kpra ma pe lii oo, ni yiɛ shↄ na pe Kristo ketaan kre yuu. 19A mbe ti ni yiɛ na shio. Ŋgi na, ni chin na e nyiɛtalaa, na Yesu Kristo Ŋumu wre saara na pie ni wa. 20A ni shↄnli, mu na chaa na mba kee ka na ki nyini pe, mbe nyifɛɛrɛ ni gbo. Kena na pe ni gbo ndee na pe ni wa kre, mbe gbuntitirem ta, mbe leele yire ni na mbe Kristo wre ŋga mɛɛ. 21A mi pan kre, na ni tni waŋgra nu mna, kena Kristo ni tni mu ŋga. A na ni ku kre, kii tnu ni ni pan. 22La, na mbe tnu ta ni tnimu nu tra mna mbe Kristo ŋga kre, kena ni n chin ŋga mbe wↄ kee shiin nyjɛ nu. 23Ki tia ni nyjira yire kee shiin nyjɛ lalaa, ni jawala yi na mbe yiri tra ŋga na mbe mi na Kristo wre sɛ tni. Ŋgi na, kre kee ŋga nyu ni pan mu tro. 24La, e ndra na, kaa ki nyu na mbe tni tra mna. 25Kre jawala ŋga tia ni shↄnli na mi na yire we tni, imi kie pe mbe e shↄnlie sɛ yiɛ na yɛshↄↄrↄ ni. 26Kena, na ndaa ndru mu pan e tni haa wa kre, ee Kristo Yesu wre ŋga mɛɛ chichie mbe jɛŋgi ni ndra na. 27Ŋga ki shian titi yi na ee ti mbe e kepele kro pe na Kristo ketaan kre chinfɛɛnlɛ lɛ. Kena na ni pan mu e nya o, na ni n e nya o, mbe ndaa e kee ndru na e yire gbiŋmbi, lɛɛ nunu ni, na jawala nunu ni, na wii na yaa eyɛ na, mbe ki ti leele ketaan kre shↄↄli. 28A yaa ti mbe fiɛrɛ e yii e loŋgoolo haa. E gbun ta, kre kie nyina pe pan na Nyiɛkpↄↄ we pe kla, mbe e ŋga ŋmaa. 29Ŋgi na, Nyiɛkpↄↄ e ŋga kolo na e Yesu shↄ mbe li. Ki n pe shↄnlie chiin yi e tnumu, la, u ndra na ee kala nya. 30A fuŋgaami ŋga, wiire nunu kre mi na yire wii. Wiire ŋga e na nya fa na ni wii kre, kre chↄↄ e loo na ni wii tɛ kre.

will be added

X\