Matio 9

1A Yesu na sɛ le krↄ kre nu mna tapla kre kun mna sɛ wre titi chia. 2Ŋga wra le wa kre to, leele plɛ na pan na fna wa ni u pan, na u fuuru mu sni u dɛŋglɛ na. Ŋga Yesu na leele pre shↄnlie nya ma kre, a wra kna mna yo fna wre pan mbo, "Ni pↄ, muyɛ gbun yii, ni mu sisam ti mu mu kɛ." 3Ŋga Yesu na yo ma kre, na Judae mbra nyinafɛɛnlɛ pre plɛɛ wa mu yire wa, a pra kna na yuu peyɛ pan mbo, "Jiɛnlɛ kee blↄ ŋmba yuu kre." 4A Yesu na pe jawala chin mna kna mu yo pe pan mbo, "Mni a e na sisam kee jawa ma hin? 5Ŋga mbe yo na ni mu sisam ti mu mu kɛ yoo kii nyaanyaa ree, ŋga mbe yo na yiri mu mu dɛŋglɛ wru mu nyaari yi hin? 6La, ŋga ni chaa mbe e chin yi na, Lewo Pↄ wree wa na jaŋga ni tra mna na mbe sisam ti mbe kɛ." A Yesu na kna mna yo yaŋu wre pan mbo, "Yiri, mu mu dɛŋglɛ wru mu sɛ katoo." 7A yaŋu wre na taan mu yiri mna sɛ u katoo. 8Ŋga lenɛɛrɛ pre na kee kre nya ma kre, fiɛrɛ na pe yii, a praa Nyiɛkpↄↄ kaan mɛɛ, na u lewo ŋga kre jaŋga ŋga sembremu. 9Blↄ wa naa wa praa u yeeri Matio, a wra pe lampoo shↄfun. Ŋga Yesu na yiri wa na shie kre, wra u nya u lampoo shↄ nyuŋgo. A wra kna mu yo u pan mbo, "Yiri mu taa ni kro." A Matio na yiri mu taa u kro. 10A Yesu na sɛ Matio katoo. Ŋga pra sɛ na lii kre, lampoo shↄfɛɛnlɛ tataara na sisampefɛɛnlɛ na pan, a pre na Yesu na u twanfɛɛnlɛ pre na chaa mu na lii. 11Ŋga Farisiie pre na pe nya ma kre, pra u twanfɛɛnlɛ pre wie mbo, "Ŋgi ki tia a e nyinafun wre na lampoo shↄfɛɛnlɛ na sisampefɛɛnlɛ na chaa na lii ŋga hin?" 12Ŋga pra kre kee ŋga wie ma kre, a Yesu na kee kre loo, a wra kna mna yo pe pan mbo, "Leele mblɛ pe n na yaa kre n shia mbe sɛ dↄkita, fↄna mblɛ pe yaa kre. 13Kena e sɛ kee ŋga nↄↄ twan, na ni n na srawↄↄ chaa, la, fooro chiɛn ni chaa. Ni n pan mblɛ pe fraka pan, la, sisampefɛɛnlɛ pan ni pan." 14Bawa Jↄn, ndrajefun wre, kotↄmblↄ na pan mna Yesu wie mbo, "Ŋgi ki tia wre na Farisiie pre na blefuni, a mu twanfɛɛnlɛ pre na blefun ŋga hin?" 15A Yesu na kna mna pe wie mbo, "Nyjila ŋga ni bijↄplↄ wree wa kre, ki fna mbe bijↄplↄ wre nↄↄlↄ fooro li ra? Pan ma ki fna, la, ble kaa wa na paan, mbe pe paan bijↄplↄ wre wru pe jaara, kre nyjila kre ki fna pe blefun. 16Ndro n wa mbe yoŋgo fↄŋgↄ kↄↄn wru mbe yoŋgo lɛɛ ŋga ki wali tↄ. Na ki pe ma kre, kie lɛɛ kre tini mbe foli, mbe ki walihaa kre kpↄↄ mbe ya. 17A lewo wa n wa mbe sifiŋge fↄŋgↄ le yurↄ hlɛ gbolo lɛɛ nu. Na ki pe ma kre, sifiŋge kre we kan mbe gbolo kre wali, mbe sifiŋge kre wo. Fawolo pre naa sifiŋge leni yurↄ hlɛ gbolo nu. Kena sifiŋge fↄŋgↄ fna yurↄ hlɛ gbolo fↄŋgↄ nu." 18Ŋga Yesu naa wa mu yire na leele pre nyina yire kee nyjɛ kre, Judae ŋulo pre wa na pan mna kosie kan u yiɛ mbo, "Fuŋgaami ni pↄ bichable ku. Kena, jande, pan mu kɛ taa u na mbe u ŋmaa ta ni pan." 19A Yesu na u bitumblↄ pre na yiri mna taa blↄ wre kro a pra sɛ. 20Bawa chlↄ wa, na nyimi woni u pan yɛlɛ kɛmbↄshiin, a wra Yesu nya mna fɛ mu taa u kro. 21Chlↄ wre na klu mu yo u ndra mbo, "Na ni kɛ taa u dodoŋgi nyu na kuraa kre mbe saanla." 22Ŋga wra kɛ taa Yesu dodoŋgi kre nyu na kre to, a Yesu na kna mu chlↄ wre nya, mna kna mu yo u pan mbo, "Ni pↄ, mu yɛ gbun yii, mu shↄnlie tia mu saanla." Titɛɛ kre nu wa to, a chlↄ wre na saanla. 23Ŋga Yesu na sɛ le ŋunu wre katoo kre, wra nya na pe yoo na nyɛni na gble na pↄ wre kumu pini, 24a wra kna mna yo pe pan mbo, "E kro e yili fimi na. Bichable wre n ku; sni u sni." A leele pre kro na kna poŋgo na Yesu le, na u tɛɛ. 25Ŋga leele pre na yili fimi na kre, a Yesu na le nyuŋgo ŋga nu bichable wre na nyi kre nu, mna sɛ u kɛ yii, a bichable wre na yiri mu tni. 26Kee ŋga Yesu na pe kre na kpali bawa tra kre nu kro. 27Ŋga Yesu na yiri wa na shie kre, fuunlo shiin plɛ na taa u kro, na gble leni badaaŋga mbo, "O fooro le ɛ, Devid nana." 28Ŋga Yesu na sɛ le katoo kre, fuunlo pre na sɛ u pan wa, a Yesu na pe wie mbo, "E shↄnli na mbe jaa kee ŋga e wie ŋga pee?" A pra kna mbo, "Ɛnhɛɛn, o Tafun." 29A Yesu na kɛ taa taa pe nyiɛlɛ na, mna yo pe pan mbo, "Imi na e shↄnlie nyi kre, ki pe ma mbe e ŋga." 30Titɛɛ kre nu a pe nyiɛlɛ yire na nyaa nyaa. A Yesu na pe jaari mbo, "Yaa shia sɛ ki yo ndro pan." 31La, ŋga pra yili wa mnaa shie kre, praa kee kre yuu na shie, kra tia kra kpali tra kre nu kro. 32Ŋga fuunlo pre na yili na shie kre, leele plɛ na pan na kpo wa ni Yesu pan, na ŋumufↄↄn wa u nu, kra tia u nsra ja na paara. 33Ŋga Yesu na tia ŋumufↄↄn kre na yili u nu kre, a wra paara, a kra lenɛɛrɛ pre praa wa wa kre kro pe kawako ni, a praa yuu mbo, "O n da mu kee ŋga nyini nya Israel tra nu tun." 34La, Farisiie pre naa yuu mbo, "Ŋumufuɛn ŋunu wre, wre u u ŋga jaŋga a u ja na ŋumufuɛn woni leele nu." 35Yesu na yili wa mna sɛ na kila chiɛ nyjɛ yiraa wa bawa lawee yire nu kre na, na leele nyina pe fninyinyi nu, na Nyiɛkpↄↄ ŋunumu kre ketaan kre yuu, na yira nyininyini trai. 36Ŋga Yesu na kna mu lenɛɛrɛ pre pra taa u na kre nya ma kre, fooro na u yii. Ŋgi na, pe keshiɛn na nɛɛ, a ndro nsraa wa mbe ya pe na, pan pra nyi na mbaala mblɛ pe n lefɛɛnlɛ ni lɛ. 37A wra kna mna yo u twanfɛɛnlɛ pre pan mbo, "Yirɛ kun nyjila kre da, a tnumu kre kpↄↄ, a kunfɛɛnlɛ pree fiɛn. 38Kena e nyiɛtali mbe yirɛ Tafun wre tnumu tunfɛɛnlɛ tun mbe pe paan u yirɛ yire kun."

will be added

X\