Matio 8

1Ŋga Yesu na yiri nyua kre na mna tii tra kre, lenɛɛrɛ na taa u kro. 2Bawa kokoefun wa na pan mna kosie kan u yiɛ mna yo u pan mbo, "Ni Tafun, jande, na ki tna mu pan, ti mbe ni saanla." 3A Yesu na kɛ tini mna taa u na, mna kna mbo, "Ki tna ni pan, Kena saanla!" Titɛɛ kre nu, a wra saanla. 4A Yesu na kna mu yo u pan mbo, "Le, maa shia ki yo mbe ndro loo. La, sɛ Judae sↄfue pre pan, mu sɛ sra yirɛ nyjɛ Mbose mbra nyina kre wↄ, mbe ki mu dansiɛrɛ li pe yiɛ na." 5Ŋga Yesu na sɛ le Kapɛnↄm na kre, Romae sojae lopom wa na pan mna Yesu tali mbo, 6"Ni Tafun, ni sumifun wa fuuru mu sni katoo na kala nyaa tataara, kena jande, ni mu tali mbe mu paan ya ni na." 7A Yesu na kna mbo, "Ni loo, mbe paan u tra." 8A sojae lopom wre na kna mbo, "Ni Tafun, ni n fna na mu le ni katoo. Kena na mu yire mna mu paara kuraa kre, ni sumifun wre we saanla. 9Mi chↄↄ, ni pe lewo ŋmba nii wa na jaŋga ni, a nii wa na sojae ni a pee wa ni jaara. Na ni yo wa pan na u sɛ, we sɛ, a na ni yo wa pan na u pan, mbe u pan. A na ni yo ni tnu pan na ŋga imi pe, we ki pe." 10Ŋga Yesu na kee nyjɛ blↄ wre na yo kre loo kre, kra u pe kawako ni, a wra kna mu yo mblɛ pra taa u kro kre pan mbo, "Kpra na ni yuu e pan na, Israel leele nu kuraa kre, ni n shↄnlie kpↄↄ ka nya imi tun. 11Kpra na ni yuu e pan na lenɛɛrɛ we yiri yila finhaa na yila tohaa mbe paan chaa mbe li na Abraham na Isaki na Jakↄb ni Nyiɛkpↄↄ ŋunumu kre nu. 12La, mblɛ wo yi ŋunumu kre, pie pe viŋge mbe wa haaleelee wↄmu nu. Bawa leele we na nyɛni mbra pe ŋgaala chrɛ." 13A Yesu na kna mna yo sojae lopom wre pan mbo, "Sɛ katoo! Imi na mu shↄnli kre, ki pe ma mbe mu ŋga." Kre nyjila kre nu, na yaŋu wre saanla katoo. 14Ŋga Yesu na yiri wa mna sɛ le Pita katoo kre, wra nya na kabro Pita nafun chlↄ gbun. 15A Yesu na kɛ taa u kɛ na to, a kabro kre na laa u na, a wra yiri mna sro pe mu u ŋga. 16Ki ble kre yilakↄŋgↄ kre, pra pan na ŋumufuɛnfɛɛnlɛ tataara ni Yesu pan, a wra u nyu kee tɛɛ mna ŋumufuɛn yire wↄ pe nu, mna mblɛ praa yaa kro tra. 17Yire kee nyjɛ Nyiɛkpↄↄ kee nyanyofun Yisaia na nya mu yo kre mbo, "Wra o pↄlɛm shↄ, mna o kanyana wru mu tio." 18Ŋga Yesu na lenɛɛrɛ pre nya na pe u kun mu le lalaa ma kre, a wra kna mna yo u twanfɛɛnlɛ pre pan, na pe kun mbe sɛ tapla kre kro. 19A Mbose mbra nyinafɛɛnlɛ pre wa na kna mna yo Yesu pan mbo, "Nyinafun, ni chaa mbe taa mu kro. Mna mu sɛ kpan, mbe mi na ŋu sɛ." 20A Yesu na yo u pan mbo, "Ŋmbokuŋmboe wa na wee ni na sni, a nyjeeri hanyiɛlɛ wa na pe zeere ni, la mi Lewo Pↄ wre n wa ndra tɛɛhaa ni." 21A Yesu twanfɛɛnlɛ pre nunu na kna mbo, "Ni Tafun, ni ŋga kolo mbe ni sɛ ni lɛ gboo le tun, mbe chiin paan taa mu kro." 22A Yesu na kna mu yo u pan mbo, "Pan mbe o sɛ, ti mbe mblɛ pe ku kre na pe gboolo leni." 23A Yesu na yire wa mna le krↄ nu, wre na u twanfɛɛnlɛ pre ni. 24Ŋga praa shie kre, fuflɛ badaaŋga ka na gbun, a krↄ kre na chaa kna mbe juule, kre nyjila kre na Yesu sni na ŋunu krↄ kre nu. 25A pra sɛ u gbun mu nyi mbo, "O Tafun, yiri mu o shↄɛ, o chaa fun." 26A Yesu na kna mna yo pe pan mbo, "Mni a e na fiɛ ma hin? E shↄnlie fiɛn titi." A wra yiri mna fuu fuflɛ kre na, a nyumu kre na yire dimm. 27A kra leele pre praa wa krↄ kre nu kre pe kawako ni. A pra kna na yuu mbo, "Lewo ŋmbi nyini wi ŋmba kuraa a fuflɛ na nyumu na u kayolo ndru ŋga hin?" 28Ŋga pra kun tapla kre kro mna sɛ to Garasiie tra nu kre, bilɛ shiin plɛ na yiri fanyi lawee mna pan mu u fni, pre leele mblɛ, na ŋumufuɛn wa pe nu, kra tia mna pra nyi kre, ndro nsraa wa mbe jaa tro wa. 29Ŋga pra Yesu nya kre, titɛɛ kre nu, a pra gblee fↄↄri mu le mbo, "Nyiɛkpↄↄ pↄ Yesu, kala ŋgi ni wre na ŋu nyi hin? O klahaa mu pan mbe nyjila kre chiin da ree?" 30Kre nyjila kre na prakoe tataara plɛɛ wa na kaa pe mbɛɛ na, 31a ŋumufuɛn pre na Yesu tali mbo, "Jande, na mu o ni, ti mbe o sɛ le prakoe mblɛ nu." 32A Yesu na kna mu yo ŋumufuɛn pre pan mbo, "E yili pe nu." Titɛɛ kre nu, a pra yili mna sɛ le prakoe pre nu, a prakoe pre na mↄŋↄ mna tii landɛɛ kre nu mna sɛ to epo kre nu, a kra pe li. 33Ŋga kra pan ma kre, leele mblɛ praa prakoe pre le kre na jele fↄↄri tra, na feni na shie chia lam, na kee ŋga ki pe kre yuu na shie, na ŋumufuɛnfɛɛnlɛ pre kee kre kpali. 34Ŋga kra pan ma kre, chia kre leele kro na yili chia kre na mna sɛ Yesu fni, mna u tali na u yili pe pan tra kre na mbe sɛ.

will be added

X\