Matio 7

1"Yaa na leele gbuun pimi ni nyaanyaa, mbe Nyiɛkpↄↄ waa wa gbun na pimi ni. 2Ŋgi na, pimi ŋga ni ee leele gbun kre chↄↄ ni Nyiɛkpↄↄ we e gbun. A kolo ŋga na ee tro na leele ni kre chↄↄ na Nyiɛkpↄↄ we tro na e ni. 3Yira ŋgi ki tia a kra fiɛn ŋga kii wa mu ŋmbrↄ nyini kre, a mu kre nya, la, kpↄↄ ŋga kii wa ŋu titi nyini kre, a mu n kre nya hin? 4Ndee ŋgi ki ti mbe mu yo mu ŋmbrↄ pan na ti mbe ni kra fiɛn ŋga wↄ mu nyini, a kpↄↄ ŋga kii wa ŋu titi nyini kre, a mu n kre wↄ tun hin? 5Yire yiɛnyumufɛɛnlɛ, e kra kpↄɛ nyjɛ yii wa e nyiɛlɛ yire wↄ tun, kre ee nya chiriri, mbe chiin jaa e ŋmbilɛ wee fiɛn fiɛn yire wↄ pe pan. 6Yaa shia Nyiɛkpↄↄ ŋunumu kee titi yo mblɛ pe ki le kee waara kre pan. Ŋgi na, na mu yirɛ chichiele wa nyukwanla na prakoe yiɛ kre, pie yi taanla mbe kla, mbaa paan mu tↄ." 7"Kena e Nyiɛkpↄↄ tali, we e ŋga, e na chaa u pan, ee nyjɛ e chaa yire kro ta. E u krↄ koori, we ki nyaa e pan. 8Ŋmba u tali kre taa, a ŋmba u chaa kre we nya. A ŋmba u u krↄ koori kre, u ki nyaari u pan. 9Kena e ŋmbi haa pↄ we u tali paanu mbe u u ŋga dnɛ hin? 10Ndee e ŋmbi haa pↄ we u tali mbro mbe u wↄↄ le u kɛɛ hin? 11A kena na yire sisampefɛɛnlɛ mblɛ kuraa chin mu na yirɛ chichiele leni e biile kɛɛ kre, kena e jawa e chin na e Lɛ ŋmba uu wa nyjeeri kre, we mblɛ pe u wie kre ŋga yirɛ chichiele. 12Kena kee nyjɛ e chaa mbe pra piin e na kre, e na yi pini e ŋmbilɛ na. Pan Mbose mbra yire na Nyiɛkpↄↄ kee nyanyofɛɛnlɛ pre kee yire nyina." 13"E tro jlonwee fiɛn kre na. Jlonwee ŋga ki shie kanhun nu kre vala, a ki kolo kre vala na, lenɛɛrɛ troi ki na. 14La, jlonwee ŋga ki shie ŋmaa lawee kre pe fiɛn, a kolo kre pe foo, ki tia leele chiɛri plɛ pe troi ki na." 15"E eyɛ le chichie kafinɛ Nyiɛkpↄↄ kee nyanyofɛɛnlɛ pre haa. Pie peyɛ nyjii imi na mbaala pe yɛ nyjiri kre, mbe pan e pan. La, pan pe nyi na komboolo lɛ. 16Pe kepeelee ni ee pe chin. Ŋgi na, wufiŋge tiŋge wa jaa lombru sɛ, a mbrambra tiŋge wa jaa gbena sɛ. 17Tiŋge chiriri ki sɛŋgɛ chiriri sɛni, a tiŋge sisaa na sɛŋgɛ sisaa sɛni. 18Tiŋge chichie na sɛŋgɛ sisaa sɛ, a tiŋge sisaa na sɛŋgɛ chichie sɛ. 19Tiŋge ŋga kraa sɛ chiriri kre, pie ki kun mbe wa kanhun. 20Kena kafinɛ Nyiɛkpↄↄ kee nyanyofɛɛnlɛ pre, pe kepele ni ee pe chin." 21"Ki n pe mblɛ pe ni yeeri 'ni Tafun, ni Tafun', kre kro pie sɛ nyjeeri ŋunumu kre nu. La, mblɛ pe ŋga ni Lɛ ŋmba uu wa nyjeeri chaa pini kre, pre pie le u ŋunumu kre nu. 22Na ki ble kre waa da, leele tataara we pan mbe yo mbo, 'O Tafun, mu mɛɛ ni, o nsraa mu kee nyaa na yuu kree? A o n na mu mɛɛ tɛɛ mna ŋumufuɛn wↄ leele nu, mna kawako kee tataara pe kree?' 23Bawa mbe kna mbe yo pe pan na, 'E laa ni na e sɛ. Ni n e chin. Yire sisampefɛɛnlɛ mblɛ.' " 24"Kena ndro ŋmba we ni kee nyjɛ loo mbe li yi na kre, we pe na kachiŋu ŋmba wra u nyuŋgo sin dnɛ lawee nu kre wi. 25Ŋga wra ki sin mu kↄ kre, nyiɛ na pan, a lↄↄɛ na nyi mna fo mu le nyuŋgo kre jaara, a fuflɛ na gbun badaaŋga mna le nyuŋgo kre nu, a nde ki nsra ja mu nyuŋgo kre chan, na wra ki sin dnɛ na. 26A ŋmba we ni kee nyjɛ loo, a u n li yi na kre, we pe na jijuo ŋmba wra yo we u nyuŋgo sin mna sɛ ki sin tablↄ na kre wi. 27Ŋga nyiɛ na pan kre, a lↄↄɛ na nyi mna fo mu le nyuŋgo kre jaara, a fuflɛ na gbun kpↄↄ mna le nyuŋgo kre nu, a nyuŋgo kre na to, kra tia nyuŋgo kre too na peere." 28Ŋga Yesu na kee nyjɛ krɛrɛ yo mu kↄ kre, u kee yire nyinaa na lenɛɛrɛ pre pe kawako ni. 29Ŋgi na, u nsra u kee yire nyina na pe nyinafɛɛnlɛ pre lɛ, la, wraa paara na jaŋga ni.

will be added

X\