Matio 5

1Ŋga Yesu na lenɛɛrɛ pre nya ma kre, a wra nduu nyua ka na mna sɛ tni wa, a u bitumblↄ pre na u kↄŋgↄ ni mna sɛ tni u jaara. 2A wra paara mna pe nyina mbo, 3"Mblɛ pe nyɛni mblɛ pe Nyiɛkpↄↄ kee kre shian kre, pe wo yi dwamu. Ŋgi na, pre wo yi nyjeeri ŋunumu kre. 4Mblɛ pe nyɛni pre wo yi dwamu. Ŋgi na, pre pie bre. 5Mblɛ pe peyɛ nyjii pre wo yi dwamu. Ŋgi na, pre pie tra kre ta mbe tni. 6Mblɛ pe kefrakaa klo, na ki gbↄↄ ta kre, pre wo yi dwamu. Ŋgi na, pre pie yↄↄ. 7Fooro chinfɛɛnlɛ wo yi dwamu. Ŋgi na, pre fooro pie chin. 8Mblɛ jawala ki nyu kre pre wo yi dwamu. Ŋgi na, pre pie Nyiɛkpↄↄ nya. 9Mblɛ pe pan na wejinyiŋge ni kre, pre wo yo yi dwamu. Ŋgi na, pre pie yeeri Nyiɛkpↄↄ biile. 10Mblɛ leele pra pe frakaa na kre, pre wo yi dwamu. Ŋgi na, pre wo yi nyjeeri ŋunumu kre. 11Yire mblɛ pe yila ni na, na e tɛɛlɛ, mu tia e na kala nyaa, mu na sisam kee ŋga kro fnɛ na taari e na kre, e wo yi dwamu. 12E ti mbe e yiɛshↄ, mbe e wejinyi saan e na, yaka ma, e fↄtↄↄrↄ kpↄↄ nyjeeri. Pan chↄↄ pra Nyiɛkpↄↄ kee nyanyofɛɛnlɛ mblɛ pra yiɛklu mu pan kre pra." 13"Yire lɛ waŋgra weŋge. La, na tnamu kↄ weŋge nu kre, ki n nyu mu yaka ŋga na, kna pie ki kna mbe wo, mbe leele ki taanla. 14A yire lɛ waŋgra kania, chia ŋga kii wa nyua na kre wa jaa ndra. 15A pan chↄↄ, pia kania mu mbe ki juule na gbaŋgↄ ni, la, nyjeeri pie ki taa mbe kra nyaa katoo lam. 16Kena e ti mbe e kania nyi leele yiɛ na, mbe pe e kepele chichie nya, mbe e Lɛ ŋmba uu wa nyjeeri kre ŋga mɛɛ." 17"Yaa shia jawa na mbra yire ndee Nyiɛkpↄↄ kee nyanyofɛɛnlɛ kee yire klahaa ni pan, ni n pan mbe yi kla, la, ni pan mbe li yi kro na mbe yi pe chiriri. 18La, kpra na ni yuu e pan, ŋga nyjeeri na tra n ta mu tro ŋga, kee fiɛn nunu kuraa wa wↄ mbra yire nu, fↄna yi kro we tnumu tun mbe kↄ. 19Ki tia na wa mbra yire fiɛn ka gbun mu wa, maa leele nyina fↄŋgↄ kre, pie ufun pe fiɛn Nyiɛkpↄↄ ŋunumu kre nu. La, ŋmba we li yi na mbe leele nyina, mbe pe li yi na kre, pie u yeeri lekpↄↄ Nyiɛkpↄↄ ŋunumu kre nu. 20A e ti ni yo mbe e loo, na e kepele chichie n wɛ Farisiie na Judae nyinafɛɛnlɛ pre na kre, yaa Nyiɛkpↄↄ ŋunumu kre ta mbe le fio." 21"E loo na pra yo fawolo pre pan na, 'Maa shia liiku! Ŋgi na, linkufun we pimi li kpra kun ble kre.' 22La, mi yuu e pan na ŋmba we krↄ wru na u ŋmbrↄ ni kre we pimi li. A ŋmba we u ŋmbrↄ tɛɛlɛ kre we yire loplombo yiɛ. A ŋmba we yo u ŋmbrↄ pan na lewaa wi kre, we pimi li mbe sɛ kanyana kanhun kre nu. 23Kena na muu wa sra wↄ yira ka ni mbe sɛ yire sragbuɛnlɛɛ na, mbe sra wↄ mbe Nyiɛkpↄↄ ŋga, a mu sↄↄnri na mu sisaa pe mu ŋmbrↄ na kre, 24kena mu sra wↄ yirɛ yire ti sragbuɛnlɛɛ yire jaara, mu sɛ ŋu na mu ŋmbrↄ wre lalaa gbeele tun, mu chin mu pan mu mu sra kre wↄ. 25Na ŋu na ndro ta, a wra shie na mu ni kalalifɛɛnlɛ yiɛ na kre, kolo cha mbe e eyɛ lalaa gbeele tun, mbe waa chiin da na mu ni kpra kunfun wre yiɛ na. Na kre ma, kprakunfun wre we mu kala li, mbe mu le nyuŋgo lefɛɛnlɛ pre kɛɛ, mbe pe sɛ mu le nyuŋgo. 26Kpra na ni yuu e pan, kifun wre wa yili nyuŋgo wa, fↄŋga we yira ŋga pie shↄ u pan kre tↄ kro tun." 27"E loo na fawolo pre na yo na, 'Yaa shia tiɛri', 28La, mi yuu e pan na ŋmba we chlↄ le mbra u chaa u loloŋgo nu kre, kena u tiɛri u loloŋgo nu. 29Kena na mu kalie nyini shie na mu ni sisam nu kre, ki foli mu wa, ki nyu mu mu ŋga na mu kokoo we kla, mu wɛ ŋga pie sɛ na mu wejiŋge poŋgo ni kanyana lawee kre nu. 30A na mu kalie kɛ shie na mu ni sisam nu kre, ki kun mu wa, ki nyu mu mu ŋga na mu kokoo we kla, mu wɛ ŋga mu wejiŋge poŋgo ta, mbe pe sɛ na mu ni kanyana lawee kre nu." 31"A pra ki yo fa mu tɛɛ mbo, 'Blↄ ŋmba we u chↄ je kpan, ki fna mbe u chlↄ wre ŋga hlɛ, mbe ki nyina na u u je.' 32La, mi rɛ, ni yuu e pan na, na ki n yire tiɛrɛɛ na, a blↄ u chↄ je kre, kena blↄ wre tia chlↄ wre tiɛri. A blↄ ŋmba we chlↄ wre leŋge kre tiɛri na." 33"A e loo na pra yo fawolo pre pan na pia na Nyiɛkpↄↄ dani finfin, la, ki fna kee ŋga na mu da kre mbe ki pe kpra. 34La, mi yuu e pan na yaa shia da kuraa, yaa shia nyjeeri da, ki pe Nyiɛkpↄↄ tnihaa. 35Ndee mbe tra da, ki pe Nyiɛkpↄↄ jeelee taa yira, ndee mbe Jerusalɛm da, ki pe ŋunu kpↄↄ chia. 36Ndee mbe lewo ndra da. Ŋgi na, wa wa jaa nyjuro nunu fiŋge ndee wↄↄ kuraa gbeele. 37La, e ti mbe kee ŋga ee yo kro pe kpra, mbe e 'Ɛnhɛɛn' pe 'Ɛnhɛɛn', mbe e 'Ↄↄnhↄn' pe 'Ↄↄnhↄn', nyjɛ ee yo nyjɛ kↄkro kre, pe sisam." 38"E loo na pra yo fawolo pre pan na, 'Na ndro mu nyini ja, ki fna mbe pe u wo ja ka na, ndee na ndro mu ŋgaala kↄ kre, pe u wo kↄ ka na.' 39La, mi rɛ, ni yuu e pan na yaa na sisampefɛɛnlɛ sisam fↄlↄ toni, na ndro mu yiɛ kalie wo ja kre, haŋa kre kna mu u ŋga. 40A na ndro sɛ na mu ni kala li ndoo mu sɛ mu dodoŋgi shↄ kre, mu yoŋgo wru mu ya u pan. 41A na ndro yo mu kↄnsni nunu nyaari kre, nyaari shiin. 42A ŋmba we mu tali kpan, u ŋga, a ŋmba we na chaa mbe jin mu pan kre, maa shia je u pan." 43"E loo na pra yo fawolo pre pan na, 'Mu ŋmbrↄ kori, mu mu loŋgo pra.' 44La, mi yuu e pan na e e loŋgoolo kori, e na nyiɛtali e na mblɛ pe e leni kanyana nu kre kaan. 45Na e pe ma kre, kie ti mbe e pe e Lɛ, ŋmba uu wa nyjeeri kre biile. Ŋgi na, wre u tii mbe yila yili sisam pefɛɛnlɛ na chichie pefɛɛnlɛ kro pan, mu tia nyiɛ na paan kprafɛɛnlɛ na denyjuufɛɛnlɛ kro pan. 46Kena na e mblɛ pe e chaa chiin kori kre, fↄtↄↄrↄ ŋgi ee ta hin? Pan ma Judae lampoo shↄfɛɛnlɛ pre, leele dnumufɛɛnlɛ pre kuraa naa pini kree? 47Kena na e chichie piin na e nↄↄlↄ chiin kaan kre, ŋgi kie nyina na e wɛ leele hamblɛ pre na hin? E n chin na pan leele mblɛ pe n pe Judae a pe n Nyiɛkpↄↄ chin kre pini ree? 48Kena e na kee chichie piin nyjila kro nu, imi na e lɛ ŋmba uu wa nyjeeri kre chichie pee n nyukↄↄnrↄ ni kre."

will be added

X\