Matio 3

1Kre nyjila kre nu Jↄn, ndrajefun wre, na yiri na Nyiɛkpↄↄ kee yuu fimi lawee waa kre nu, Judea tra nu. 2Mbo, "E e jawala chinɛ, Nyiɛkpↄↄ ŋunumu kre mbra mna." 3Wre Jↄn ŋmba kee Nyiɛkpↄↄ kee nyanyofun Yisaia na nya mu yo kre, mbo, "Ndro waa wa na gble leni fimi lawee yire nu, mbo, 'E o Tafun kolo kre gbeele! E u trohaa kre fraka!' " 4Nyuuma yooro yoŋgo Jↄn naa toni. A yurↄ hlɛ na yi u greree, a u sroe na yii lɛ kpatↄ na srɛ. 5A Jerusalɛm leele na Judea leele na Jↄↄdan lↄↄ kre mbɛɛ tnifɛɛnlɛ kro na yili mna sɛ u pan wa, 6mna sɛ pe sisam yo, a wra pe ndrɛ je Jↄↄdan lↄↄ kre nu. 7Ŋga Jↄn na Farisiie na Sadukie pre tataara nya na pe paan mbe u pe ndrɛ je kre, a wra kna mu yo pe pan mbo, "Leesaala biile, ŋmbi u e nyina na e fɛ mbe yili krↄ kↄↄn ŋga ki paan kre nu hin? 8Kena e na kee nyjɛ yi nyina na e laa e sisam kro kre pini. 9Mbe yaa kro mbra eyɛ fana mbra yuu na, 'O lɛ wi Abraham.' 10Pe gbana tɛɛ tinyi yire didinyi na, tiŋge ŋga ki n na sɛŋgɛ chichie sɛni kre, pie ki kun mbe sɛ ki wa kanhun." 11"Mi rɛ, nyumu ni ni e ndrɛ jee, mbe ki nyina na e laa e sisam kro, la, ŋmba uu wa ni kro na paan kre rɛ, Kpra Ŋumu wre na kanhun ni we e ndrɛ je. U jaŋga wɛ ni na. Mi kuraa n fna mbe u kpawrɛ yii. Wre we paan e ndrɛ je Kpra Ŋumu wre na kanhun ni. 12U kↄↄŋgↄↄ ŋga ni u yirɛ foo wa u kɛɛ, ŋga ni we yirɛ fue yire fↄ mbe yili yi bie nu, mbe sɛ yi bie yire tɛɛ lawee chichie nu, mbe sɛ yi fue yire le kanhun ŋga kraa fii nu." 13A Yesu na yiri Galilii na mna sɛ Jↄↄdan lↄↄ kre mbɛɛ na Jↄn pan, na Jↄn u u ndra je. 14A Jↄn na kna mbo, "Mi ŋmba ki fna mbe mu ni ndra je kre, a ŋu pan na yuu na ni mu ndra je." 15A Yesu na kna mbo, "Fuŋgaami ŋga, pan ki fna mbe pan. Ŋgi na? Kre kolo na oo yire mbe chiin ŋga Nyiɛkpↄↄ chaa pe." Ŋga wra yo ma kre, kra tia Jↄn na u ndra je. 16Ŋga Jↄn na u ndra je mu kↄ, a wra yili lↄↄ kre nu to, a nyjeeri na nyaa, a Yesu na nya na Nyiɛkpↄↄ Ŋumu wre tii mu pan u na, na katoo kotro wi. 17To, a mana kpↄↄ ka na yili nyjeeri mbo, "Ŋmba wi ni Pↄ ŋmba ni kori, a ni yiɛ shↄ u na titi!"

will be added

X\