Matio 27

1Ŋga nyiŋge na se bnimi pupu kre, sↄfue loplombo pre kro na chia kre loplombo pre na sɛ fni mu jawa na ki fna pe Yesu gbo. 2A pra u pↄ mna sɛ u le waŋgra lopom Pilato kɛɛ. 3Ŋga Judas ŋmba wra Yesu wↄ mu ŋga kre, na nya na pe Yesu gbun na kumu pimi ni kre, wra u jawala chinɛ, mna ndru mu sɛ sↄfue loplombo pre na chia loplombo pre ŋga swa ŋga wra shↄ pe pan kre, mna kna mu yo pe pan, mbo, 4"Ni sisam pe na ni ndro ŋmba nu sisam n wa wↄ mu e ŋga." A pra kna mbo, "Wre kee ka ma, mu swa bali." 5A Judas na swa kre viŋge mu wa suminyuŋgo kre nu mna sɛ maŋa le. 6A sↄfue loplombo pre na swa kre bali, mna kna mbo, "Ki pe hankɛ swa, ki tia mbra n kolo ŋga mbe o ki chaa o swa nu." 7A pra sɛ fni, mna swa kre wru mna sɛ chↄɛfaanrifun wa tra ka lↄ, na fumblↄ gboolo leni. 8Mu yire kre ble kre na mu pan mu su aŋga na, kre tra kre mɛɛ "nyimi tra". 9Nyiɛkpↄↄ kee nyanyofun Jeremia na kre kee ŋga yo mu tɛɛ a ki pe kpra mbo, "Pra swa fiŋge nununu fulo na kɛ tↄↄnri, kre swa ŋga Israel biile plɛ na jawa na ki fna pe ki tɛɛ mbe u lↄ, 10a pra ki tɛɛ mna tra lↄ chↄɛfaanrifun pan, imi na Nyiɛkpↄↄ na ki kee yo ni pan kre." 11A Yesu na yiri mu yire waŋgra lopom wre yiɛ, a wra u wie mbo, "Ŋu wi Judae ŋunu wre kree?" A Yesu na kna mbo, "Kre mu yuu kre." 12La, ŋga sↄfue loplombo pre na chia loplombo pre naa paara na u taanla kre, u nsra paara. 13A Pilato na kna mbo, "Kena kee tataara nyjɛ pe yuu na taari mu na ŋga, mu n yi loo ree?" 14Yesu nsra nyu kun. Hali u nsra kee nunu chom nyu wↄ. A kra waŋgra lopom wre pe kawako ni mu tro. 15Kena na pe pe ble kpↄɛ yire lii kre, waŋgra lopom wre ndro nunu woni nyuŋgo mbe wa, ŋmba lenɛɛrɛ pre chaa. 16A kre nyjila kre nu na pe blↄ wa yii mu le nyuŋgo. Wre blↄ wre na lenɛɛrɛ u chin paa. Praa u yeeri Barabas. 17Kena ŋga pra sɛ fni kre, Pilato na lenɛɛrɛ pre wie mbo, "Ndro ŋmbi e chaa mbe ni wↄ nyuŋgo mbe wa hin? Barabas ree? ndee Yesu ŋmba pe yeeri Kristo wre hin?" 18Pilato na chin na prara ki tia pra pan na Yesu ni u pan. 19Nyjila ŋga nu Pilato na sɛ tni u kpra kun jↄↄn na kre, u chↄ na tia pra pan mu yo u pan mbo, "Jande, blↄ ŋmba u fraka, kena maa shia u pe sisaa, ni u kee nya ŋunɛ nu blee ŋga, a kra ni hau paa." 20A sↄfue loplombo pre na chia loplombo pre naa yuu leele pre pan na pe yo Pilato pan mbe u Barabas wↄ mbe wa, mbe Yesu gbo. 21Waŋgra lopom wre na ndru mu pe wie shiin wo na mbo, "Leele mblɛ shiin, ŋmbi haa e chaa mbe ni wↄ mbe wa hin?" A pra kna mbo, "Barabas wa!" 22A Pilato na kna mbo, "Kena mni e chaa mbe ni Yesu ŋmba pe yeeri Kristo wre pe hin?" A pe kro na kna mbo "Ti pe u kan kanyana kumu kaan na!" 23A Pilato na kna mbo, "Mni hin? Sisam ŋgi u pe ma hin?" A pra kna na yuu poŋgo mbo, "O yo ti pe u kan kanyana kumu kaan na!!!" 24Ŋga Pilato na nya na leele pre gble kpↄↄ ma kre, wra chin na wa jaa kee ka pe, a wra yiri mna sɛ nyumu ko, mna u kɛnyi je leele pre yiɛ na, mna kna mu yo pe pan mbo, "Ni kɛ n wa blↄ ŋmba kumu kee ka nu, e kee ye e pan." 25A leele pre kro na kna na yuu mbo, "Ti mbe kee ŋga kie pan ki kro kpan, tuu wre na o biile na." 26A Pilato na Barabas wↄ mu wa, mna tia pra Yesu frↄ na fotro ni, a wra u wↄ mu le pe kɛɛ mbe pe sɛ u kan kanyana kumu kaan na. 27A Pilato sojae pre na Yesu yii mna sɛ na u ni ŋunu katoo, mna sojae pre kro yeeri a pra sɛ fni wa. 28A pra Yesu dodoŋgi wↄ u na, mna u le dodoŋgi nyiɛ, 29mna ŋunu juulee tin na wuuro ni mu u juule, mna kaan ka wru mu le u kalie kɛ nu. A praa kosie kani u yiɛ na yiri na ŋunu wi, na u piin na tɛɛ mbo, "Judae ŋunu mu ka pe". 30A praa tɛɛnrɛ hlu na woni u na, mna kaan kre shↄ u kɛɛ mna u ndra lalaa fↄↄri na ki ni. 31Ŋga pra pna na u ni mu kↄ kre, a pra dodoŋgi kre wↄ u na mna u le wre titi wo kre, mna sɛ na u ni mbe sɛ u kan kanyana kumu kaan na. 32Ŋga pra yili na shie kre, pra blↄ wa fni, na u yiri Kirene chia kre na, u mɛɛ naa Siimↄn, a pra u yii jaŋga na, a wra sɛ Yesu kumu kaan kre tio. 33Pra sɛ na Yesu ni lawee ka nu, pe ki yeeri Golgota. Ki nyina na lewo ndra kajle lawee. 34Bawa pra tuwe susrom ka chaa simi nu mna Yesu ŋga mbe u gbↄ, a u nsra ki gbↄ. 35Ŋga pra sɛ u kan kanyana kumu kaan kre na kre, a pra u yirɛ nyjɛ wra le kre wↄ mna yi yↄↄlɛ mna pe yɛ ŋga, hali pra kɛɛn tɛɛ, mbe chin ŋga ki fna mbe ta ta. 36Ŋga pra kↄ kre, a pra tni u jaara na u sri. 37Mna u pimi kee nyunↄ mu kan u ndra nyjeeri mbo, "JUDAE ŊUNU WRE WI KRE." 38A pra kokↄↄnlↄ shiin plɛ kan mna mbra u na. Wa naa wa u kalie, a wa naa wa u kamɛŋɛ. 39Leele mblɛ praa tro na u nyaa kre, naa ndra nyaara na u tɛɛlɛ mbo, 40"Ŋu mu yo mu jaa suminyuŋgo kre juari mbe wo, mbe jaa ble taarɛ tɛɛ mbe ki sin, muyɛ shↄ mbe o le. Na Nyiɛkpↄↄ pↄ titi wi ŋu kre, mu yɛ shↄ mu tii kanyana kumu kaan kre na!" 41Pan chↄↄ sↄfue loplombo pre na chia loplombo pre, na pe mbra nyinafɛɛnlɛ pre kro naa u piin na tɛɛ mbo, 42"Wraa plɛ shio, a wa jaa uyɛ shↄ. Wre wi Judae ŋunu wre, tii kanyana kumu kaan kre na, kre oo mu shↄ mbe li. 43Wre u Nyiɛkpↄↄ shↄnli, na yuu na Nyiɛkpↄↄ Pↄ wi wre, na Nyiɛkpↄↄ u chaa titi u u shↄ." 44Pan chↄↄ mblɛ pra kan kɛɛn na mu ya u na kre naa u tɛɛlɛ na yuu na. 45Ŋga nyjila kɛmbↄshiin na gbun kre, ndram na wↄ lawee kro nu mna sɛ su nyjila taarɛ lafo na. 46Nyjila taarɛ kre nu kre, Yesu na gblee badaaŋga ka le mbo, "Eli, Eli, lama sabaktani!" Ki nyina na, "Ni Nyiɛkpↄↄ, ni Nyiɛkpↄↄ, mni a mu laa ni kro hin?" 47Ŋga leele mblɛ praa wa mu yire wa kre na kre kee ŋga loo kre, a pra kna na yuu mbo, "E loo, u Elaija yeeri." 48A pe wa na fɛ mu sɛ zeere le simi ŋga ki taan nyanya ka nu, mna ki su braŋgↄ kaan na, mna sɛ u ŋga mbe u gbↄ. 49A plɛ kna mbo, "E ti o na u le, aada Elaija we paan u shↄ." 50Ŋga Yesu na ndru mna gble kre le na to, a wra fii. 51Kre nyjila kre, na pe yoŋgo ka pↄ mu suminyuŋgo kre yↄ shiin, a yoŋgo kre na peeri shiin mu yire nyjeeri mu pan mu su tapan, a tra na seeri, a dnɛ na yↄↄlɛ, 52a fanyi na nyaala, a Nyiɛkpↄↄ leele mblɛ pra ku kre plɛ na nyi tataara. 53Ŋga Yesu na nyi u ble taarɛ wo na kre, leele mblɛ pra nyi kre na sɛ Jerusalɛm na, a lenɛɛrɛ na pe nya. 54Sojae plɛ na pe lopom wa naa wa mu yire na Yesu sri, ŋga pra nya na tra seeri, a yire kaalɛɛ nyjɛ naa pini kre, fiɛrɛ na pe yii kpↄↄ, a praa yuu mbo, "Nyiɛkpↄↄ Pↄ wi blↄ wre yɛŋgɛ." 55Chiɛlɛ tataara na yiri Galilii na mna taa Yesu kro, na yaa u na, a pra sɛ yire haalee na kala le. 56Maria Magdalene na Jemisi na Josɛf lo Maria wre, na Zebedii biile pre lo wre, pe kro naa wa wa. 57Ŋga kra da yilakↄŋgↄ nyu na kre, blↄ swafun wa na yiri Aramatia na, u mɛɛ naa Josɛf, a wra pe Yesu kotↄmblↄ pre wa. 58Wre wra yiri mna sɛ Pilato pan mna sɛ u tali Yesu gboo wre. 59Pilato nsra je. Wra tia pra u ŋga u wi. 60A Josɛf na sɛ gboo wre wru, mna u pↄ na mbↄfiŋge ni, mna sɛ u le wre titi dnɛ wee ŋga u tuu mu tɛɛ nu. Mna sɛ dnɛ badaaŋga ka gbila mna ki nyu tↄ, mna sɛ katoo. 61Kre nyjila kre, na Maria Magdalene, na Maria shiin wo wree wa mu tni na faŋga kre jle. 62Ŋga nyiŋge na se pe sumi ble kre, sↄfue loplombo pre na Farisiie pre na sɛ fni Pilato katoo, 63mna yo u pan mbo "Tolɛɛ, o sↄↄnri na ŋga kafnu wre naa wa kre, wraa yuu na, na pe u gbo, we nyi ki ble taarɛ ble na. 64Kena o mu tali, ti mbe leele sɛ tni u lehaa wa, mbe u shie mbe sɛ su ble taarɛ ble kre na, mbe u twanfɛɛnlɛ pre waa shia sɛ u ju mbe wↄ, mbra yuu leele pan na u nyi. Na ki pan ma kre, kee nyjɛ pie fni mbe yo kre we wɛ jle wee yire na." 65A Pilato na kna mu yo pe pan mbo, "E sɛ yire titi sojae wru mbe pe sɛ ki shie e pan, imi na e ki chaa." 66A pra yili wa mna sɛ faŋga kre nyu mbra na yira ni kpↄↄ, mbe kia jaa nyaa, mna leele plɛ wↄ mu tɛɛ ki nyu na, mbe pra ki sri.

will be added

X\