Matio 26

1Ŋga Yesu na yire kee nyjɛ krɛɛrɛ yo mu kↄ kre, wra kna mna yo u twanfɛɛnlɛ pre pan mbo, 2"E chin na ki kro ble shiin mbe pe klɛntro ble kre lii? A pie Lewo Pↄ wre wↄ mbe le leele kɛɛ mbe pe u kan kanyana kumu kaan na." 3Kre nyjila kre nu na Judae sↄfue loplombo pre na pe loplombo pre sɛ fni sↄfue lopom titi wre, ŋmba praa yeeri Kaiafas wre katoo. 4Bawa praa kolo chaa ŋga na pie tro mbe Yesu ta mbe yii brɛmm mbe sɛ u gbo mbe ndro wa chin ki nu. 5Pra yo na pia u yii ble kpↄɛ yire nu, na kre ma, lenɛɛrɛ pre we tun na ni. 6Ŋga Yesu na le Bɛtani na kre, wra sɛ le Siimↄn, yiranyiɛrɛfun wre katoo. 7Bawa chlↄ wa na pan na Alabasta gbolo ka ni, na tlade ndiom taan ndrↄ shelee wo kaa wa ki nu. Na Yesu wa mu tni na lii, a wra ki kna mna wo u ndra na. 8Ŋga Yesu twanfɛɛnlɛ pre na ki nya kre, pe krↄ na kun na chlↄ wre ni. A pra kna mna chlↄ wre wie mbo, "Mni a mu tlade ŋga kla finfin ŋga hin? 9Mu na jaa ki prɛ mbra swa nɛɛrɛ shↄ, mbra shianfɛɛnlɛ ŋga" 10Yesu na kee nyjɛ praa chaa mbe yo kre chin, a wra kna mna yo pe pan mbo, "Mni a e na chlↄ wre hau ma ŋga hin? U kee chiriri pe mu ni ŋga. 11Yire na shianfɛɛnlɛ pre lɛ mna nyjila kro nu, la, nyjila kro nu ma ee mi ta e jaara. 12U tlade ŋga kna mu wo ni na, mu ki tɛɛ mu ni wejiŋge gbeele kama, mbe pe chiin ni le wee. 13Kpra na ni yuu e pan na, waŋgra ŋga nu, mna pie ketaan kre kpali kpan, pie chlↄ ŋmba kee ŋga u pe ŋga yo mbe tɛɛ mbe u sↄↄnri." 14Bawa twanfɛɛnlɛ pre nunu ŋmba praa yeeri Judas Iskariↄt, wre na sɛ Judae sↄfue loplombo pre pan, 15mna sɛ yo mbo, "Na ni Yesu wre wↄ mu e ŋga yira ŋgi ee ni ŋga hin?" Ŋga wra yo ma kre, a pra swa fiŋge tↄↄnri nununu fulo na kɛ mna u ŋga. 16Mu yire kre nyjila kre krɛɛrɛ, Judas naa Yesu kolo chaa mbe u ta, mbe pe u yii. 17Ŋga ble nyjɛ nu pe nsraa yiisi paanu kaa yire na da kre, Yesu twanfɛɛnlɛ pre na pan mu wie mbo, "O Tafun, sena haa mu chaa mbe o sɛ gbeele mu pan mbe mu sɛ klɛntro ble yire li hin?" 18A Yesu na kna mu yo pe pan mbo, "E sɛ chia ŋga kii wa e yɛsimi ŋga na, blↄ waa wa wa, e yo u pan na, 'Nyinafun wre yo na u nyjila kre mbra mna, a mu katoo mna wre na u twanfɛɛnlɛ we klɛntro ble yire li.' " 19A twanfɛɛnlɛ pre na sɛ ŋga wra yo pe sɛ pe kre pe, mna lawee kre gbeele kama mbe pe sɛ klɛntro ble yire li. 20Ki ble kre yilakↄŋgↄ, Yesu na le chia kre na, a wre na u twanfɛɛnlɛ kɛmbↄshiin pre na sɛ tni na lii. 21Ŋga praa lii kre, Yesu na kna mu yo pe pan mbo, "Kpra na ni yuu e pan na e wa we ni wↄ mbe ŋga?" 22Ŋga wra yo ma kre, fooro na pe kro yii, a pra kna na u wie nununu mbo, "Ni Tafun, mi wi ree?" 23A Yesu na kna mu yo pe pan mbo, "Ŋmba mi na wre kɛ leni kotolo na lii kre we ni wↄ mbe ŋga. 24Lewo Pↄ wre we ku, imi na pe ki nyunↄ mu tɛɛ kre, la, ŋmba we Lewo Pↄ wre wↄ mbe ŋga kre, u atɛ. Na pe nsra ufun wre se kuraa prↄ." 25Bawa Judas ŋmba wra u wↄ mu ŋga kre na yiri mbo, "Nyinafun mi wi ree?" A Yesu na kna mbo, "Mu nyuu ki yili." 26Ŋga praa wa mu tni na lii kre, Yesu na paanu wru mna ki dwan mna ki pile mu u twanfɛɛnlɛ pre ŋga, mna kna mu yo pe pan mbo, "E shↄ e ka, ŋga yi ni wejiŋge." 27A wra gbↄ yira wru mu yii, mna Nyiɛkpↄↄ ŋga mboo, mna pe ŋga ki yi mbo, "E kro, e shↄ e gbↄ! 28Kre yi ni nyimi ŋga ni Nyiɛkpↄↄ nyu nunu fↄŋgↄ kre pini, mbe ki kna mbe wo mbe lenɛɛrɛ ŋga, mbe pe sisam tinkɛɛ ta. 29E ti ni yo mbe e loo, mba tre sɛnyi simi ŋga ka gbↄ na fio, fↄŋga ble o kro we fni mbe ki gbↄ na ni Lɛ wre ŋunumu kre nu. 30A pra mɛɛ kↄ mna yiri mna sɛ Olive nyua kre na." 31Bawa Yesu na kna mna yo pe pan mbo, "E kro we fɛ mbe ni ti blee ŋga. Ŋgi na, pe ki nyunↄ mu tɛɛ na, 'Nyiɛkpↄↄ we mbaala lefun wre gbo, mbe mbaala pre fɛ mbe nyina.' 32La, na ndaa nyi kre, mbe yiɛklu e na mbra shie Galilii na." 33A Pita na kna mbo, "Pe kro we fɛ mbe laa mu kro, la, mba fɛ fio." 34A Yesu na kna mna yo Pita pan mbo, "Kpra na ni yuu mu pan na ŋgopilɛ wa nyɛni, na mu ni je gbee nununu taarɛ." 35A Pita na kna mbo, "Na ki pan kumu kuraa kre, mi na ŋu we ku, mba mu je fio." Pan chↄↄ twanfɛɛnlɛ hamblɛ pre na yo na. 36A Yesu na u twanfɛɛnlɛ pre na yiri wa mna sɛ lawee ka nu, praa ki yeeri Gɛtsɛmani, bawa wra yo u twanfɛɛnlɛ pre pan mbo, "E tni mna e ni shie, mbe ni sɛ yiɛ chiɛri mbe sɛ nyiɛtali mbe pan." 37A wra Pita na Zebedii biile shiin pre wru mna ya uyɛ na, a fooro na u yii, a u jawala na kla. 38A wra kna mna yo pe pan mbo, "Fooro ni yii kpↄↄ na shie kumu nu, kena yire e tni mna e na ni sri, yaa shia ŋunu." 39A Yesu na pe ti wa mna sɛ yiɛ chiɛri, mna sɛ yiɛ juule tra mna nyiɛtali mbo, "Ndoo, na kie ja kre, ti mbe kanyana ŋga ni tro mbe sɛ, imi na mi chaa ma, la, imi na ŋu chaa." 40Ŋga wra ndru mna pan mna wra twanfɛɛnlɛ pre ti kre, na pe ŋunu, a wra kna mna Pita wie mbo, "Kena e n ja mu ni shie nyjila chiɛri kuraa? 41E jande, e gbeŋmba e eyɛ yii, e na nyiɛtali, mbe yaa to nyu chaara nu. Ŋumu chaa, la, faŋga n wa." 42Yesu na ndru mu pe ti wa mna sɛ nyiɛtali shiin wo na mbo, "Ndoo, na mu chin na kanyana ŋga nyini wa jaa tro, fↄna mbe ki nya kre, kena ŋga mu chaa ki pe." 43Ŋga Yesu na ndru mu pan na kre, na pe sni na ŋunu, a ŋunumu kre wɛ pe na kuraa. 44A wra pe ti mu ndru mu sɛ nyiɛtali taarɛ wo na, kee nunu kre chↄↄ wra yo na. 45Ŋga wra sɛ mu pan kre, a wra yo u twanfɛɛnlɛ pre pan mbo, "Ee wa mu sni na ŋunu, na wuui tɛɛ? E le, nyjila kre da, mbe pe Lewo Pↄ wre wↄ mbe le sisampefɛɛnlɛ kɛɛ. 46E yiri mbe o na shie, ŋmba we ni wↄ mbe ŋga kre da mna." 47Ŋga Yesu naa wa mu na paara to, a twanfɛɛnlɛ pre nunu ŋmba praa yeeri Judas Iskariↄt wre na da mu yire, na leele ni tataara, na pe brↄfiɛnlɛ na vɛɛn ni kɛɛ. Pe kro na yiri sↄfue loplombo pre na pe loplombo pre pan. 48Kre nyjila kre, na ŋmba we Yesu wↄ mbe ŋga kre klu mu nyina na, "Ŋmba nyu mbe shiun kre, wre wi." 49A wra tin, mna pan mu Yesu yii mbo, "Nyinafun, lefↄ!" to, mna u nyu shiun. 50A Yesu na kna mna yo u pan mbo, "Awe, ŋgi pan mu pan mna hin?" Ŋga Yesu na yo ma to, a leele pre na u yii. 51A mblɛ na Yesu praa nyaari kre wa na u brↄfiɛn tini mu foli, mna sↄfue loplombo pre wa tnu ndie cheeri mu kun. 52A Yesu na kna mu yo u pan mbo, "Mu brↄfiɛn kre le ki afoo nu. Ŋgi na, ŋmba we brↄfiɛn tini u ŋmbrↄ na kre, brↄfiɛn nyu na we ku. 53Mu n chin na mbe jaa ni Lɛ tali mbe u ni ŋga nyjeeri bitumblↄ mbe pe wɛ kagbeŋ fuloe taarɛ na kɛ na, mbe paan wi na leele mblɛ ni ree? 54La, na ki pan ma kre, kee kre pe nyunↄ mu tɛɛ kre wa pe kpra, kena pan ki fna mbe pan." 55Kre nyjila kre nu Yesu na yo lenɛɛrɛ pre pan mbo, "E pan ni pan na brↄfiɛnlɛ na vɛɛn ni na kokↄↄn yii haa e pan. Ble nyini ŋga ni jiin suminyuŋgo wa na e nyina, e n ni yii wa. 56La, nyjɛ krɛɛrɛ fna mbe pe mbe ti Nyiɛkpↄↄ kee nyanyofɛɛnlɛ pre kee yire pra yo mu tɛɛ kre, mbe yi pe kpra." Bawa u twanfɛɛnlɛ pre na fɛ mna u ti leele pre pan. 57Mblɛ pra Yesu yii kre na sɛ na u ni sↄfue loplombo pre lopom wre, ŋmba praa yeeri Kaiafas wre katoo, na Judae mbra nyinafɛɛnlɛ pre na pe loplombo pre kro sɛ fni katoo wa. 58La, Pita na taa Yesu kro mna sɛ da sↄfu lopom titi wre katoo lam, ŋga pra le katoo lam wa kre, Pita na sɛ tni lawee shiefɛɛnlɛ pre nu na le imi na kee kre we taa. 59Ŋga pra sɛ na u ni kre, sↄfue loplombo pre, na leele mblɛ pra fni wa kre kro naa kafinɛ dansiɛrɛ kee chaa mbe u taan mbe yire ki na mbe u ta mbe gbo. 60La, pe nsra dansiɛrɛ kee ka ta, nde leele tataara na pan mna nyjɛ pe chaa yo. Bawa leele shiin na yiri mna yo mbo, "Wre blↄ ŋmba nyu nyaa mu yo na, 'Mbe ja mbe Nyiɛkpↄↄ suminyuŋgo kre juari, mbe ble taarɛ tɛɛ mbe ki sin.' " 62Ŋga pe nyu na to kre, a sↄfue loplombo pre lopom wre na taan mu yiri, mu Yesu wie mbo, "Ma nyu ka kun ra? Mni mu tia pra kee nyjɛ krɛɛrɛ yuu na taari mu na ŋga hin?" 63Yesu nsra paara na pe ni. A sↄfue loplombo pre lopom wre na yo u pan mbo, "Ni da Nyiɛkpↄↄ ŋmba u le wre mɛɛ ni mu mu ŋga na, na ŋu wi Kristo, Nyiɛkpↄↄ Pↄ wre titi kre, kpra yo o pan." 64A Yesu na kna mna yo u pan mbo, "Ŋu mu ki yo ma. La, e ti ni yo e pan mbe e loo. Mu yire aŋga na shie, ee Lewo Pↄ wre nya na u tni jaŋga kre kalie, mbra paan tloe nu nyjeeri." 65A sↄfue loplombo pre lopom wre na yiri mu wre titi dodonyi tini mu wila, mna kna mbo, "U jiɛnlɛ kee yo, kena dansiɛrɛ kee ŋgi o sri na hin? Yire titi e u jini kee ŋga loo. 66Kena mni e jawa hin?" A pra kna mbo, "Kumu ki fna na u ni." 67A praa tɛɛnrɛ hlu na woni u yiɛ na, na gbuun kaŋgro, a plɛ naa u yiɛ juari, 68mna kna na yuu mbo, "Ŋu Kristo, ndro ŋmba u mu gbun nya mu yo o pan." 69Kre nyjila kre na Pitaa wa mu tni katoo lam wa. A bichable tnu wa na sɛ u da mbo, "Ŋu na Yesu ŋmba u yiri Galilii na kre ma e naa nyaari kree?" 70A Pita na kaala pe kro yiɛ na wa mbo, "Ndro ŋmba kee mu yuu ŋga kuraa mi n u chin." 71Pita na flo wa mna sɛ yire bamba ka na, bawa bichabɛɛlɛ tinlɛ pre wa na pan mu u da na, mna kna mu yo mblɛ praa wa mu yire wa na le kre pan mbo, "Blↄ ŋmba, wre na Yesu Nazrɛt wo wre praa nyaari." 72Pita na ndru mu kaala wa na, hali mna da mbo, "Blↄ ŋmba mu nyini ŋga kuraa mi n u chin." 73Kraa wa wa maa, a mblɛ praa wa mu yire mbɛɛlɛ na kre plɛ na pan mna Pita da mbo, "O shↄnli na Yesu twanfɛɛnlɛ pre wa wi ŋu, mu paaraa kuraa ki nyina ma." 74A Pita na kna mbo, "Ni da na ni n blↄ ŋmba kee e yuu ŋga chin?" Titɛɛ kre nu to, a ŋgoplↄ na nyɛni. 75Bawa Pita na kee ŋga Yesu na yo u pan kre sↄↄnri mbo, "Ŋgopilɛ wa nyɛni, na mu kaala gbee nununu taarɛ na mu n ni chin." A Pita na yili mna sɛ nyɛni chichie.

will be added

X\