Matio 25

1Yire ble yire nu, pie nyjeeri ŋunumu kre wru mbe gbun bichabɛɛlɛ kɛ mblɛ pra pe kaniɛ wru mna sɛ bijↄplↄ wre fni haa kre ni. 2Bichabɛɛlɛ pre kunↄ na daŋga, a pe kunↄ hamblɛ pre na pe kachimblɛ. 3Kena ŋga jijiele pre na pe kaniɛ wru kre, pe nsra simi wru mu ya. 4La, kachimblɛ pre na simi wru mu le yirɛ nu mu ya pe kaniɛ na. 5A bijↄplↄ wre nsra pan yaari. Ki tia pra gbunu chiin mna kↄ na ŋunu. 6Kie pe ndroo nyjila kɛmbↄshiin kre, leele na gble le mbo, 'E le, bijↄplↄ wre paan! E yiri, e u fni!' 7A bichabɛɛlɛ pre na tin mu yiri na pe kaniɛ gbeele, 8bawa jijiele pre na kna mu yo kachimblɛ pre pan mbo, 'E jande, e o ŋga simi mbe o le o kaniɛ nu. Na kre ma, yie fii.' 9A kachimblɛ pre na kna mna yo pe pan mbo, 'Yia o kro da, kena e sɛ mblɛ pe yi prɛ kre pan e sɛ ka cha e lↄ.' 10Ŋga bichabɛɛlɛ pre na sɛ simi cha haa kre, bijↄplↄ wre na pan pe kro, a wre na mblɛ pra peyɛ kna na u sri kre na sɛ le nyuŋgo ŋga nu pra bijam sro pe mu tɛɛ kre nu, mna krↄ kan. 11Praa wa wa maa, a bichabɛɛlɛ jijiele pre na pan, mna pan na krↄ koorii mbo, 'Ndoo, Ndoo, jande, o nyaa!' 12Bawa wra kna mna yo pe pan mbo, 'E laa ni na, ni n e chin.' 13Kena e eyɛ kna, e na sri, na e n ble kre na nyjila kre chin. 14Pan ki nyi na, blↄ wa kolo kuun mbe sɛ haka, mu u sumifɛɛnlɛ yeeri mu pan u jaara, mna u yirɛ wru mu le pe kɛɛ. 15Wra sumifɛɛnlɛ pre kro ŋga u yirɛ mbe praa le. Wra nunu ŋga swa talɛnti kunↄ, mna nunu ŋga shiin, mna taarɛwo wre ŋga nunu, imi pe kro we jaa le mbe da. Mna to kolo mu sɛ. 16Ŋmba wra ŋga swa talɛnti kunↄ kre na sɛ jafa li na ki ni, mna kunↄ ta mu ya ki na. 17Pan chↄↄ ŋmba wra ŋga shiin kre na sɛ jafa li na ki ni mna shiin ta mu ja u wo na. 18A ŋmba wra ŋga nunu kre na sɛ tra uu mna ki le. 19Pe tafun wre na mu mna chin mu pan, a wre na u sumifɛɛnlɛ pre na fni, a wra pe wie nyjɛ pe pe na pe swa yire ni. 20Bawa ŋmba pe tafun wre na ŋga talɛnti kunↄ kre na pan mu talɛnti kunↄ ya ŋga pra u ŋga kre na, mna kna mbo, 'Ni tafun, talɛnti kunↄ mna ni ŋga, a ni pe mu talɛnti kunↄ ta mu ya ki na.' 21A u tafun wre na kna mna yo u pan mbo, 'Lefↄ! Sumifun chichie kprafun. Ŋga mu swa chiɛri ŋga kpra li ŋga, mbe mu wru mbe tɛɛ yirɛ nɛɛrɛ nyu na. Kena pan mbe ŋu na mu tafun wre yiɛshↄ.' 22A ŋmba wra ŋga talɛnti shiin kre na pan mna yo u tafun wre pan mbo, 'Ni tafun, talɛnti shiin mna ni ŋga, a ni pe mu talɛnti shiin ta mu ya ki na.' 23A u tafun wre na kna mbo, 'Lefↄ! Sumifun chichie kpralifun, ŋga mu swa chiɛri ŋga kpra li ŋga, mbe mu tɛɛ yirɛ nɛɛrɛ nyu na. Kena pan mbe ŋu na mu tafun wre yiɛshↄ.' 24A ŋmba wra ŋga talɛnti nunu kre na pan mna yo u pan mbo, 'Ni tafun, ni mu chin na mu pe pↄↄrↄfun, mna mu n luu kuraa mu kuun wa, a mna mu n yira tɛɛ kuraa mu ja na wrui na dani wa. 25Ki tia ŋga mna ni ŋga swa kre, fiɛrɛ na ni yii, a ndaa sɛ ki le wee, kena mu yira ye.' 26A u tafun wre na kna mbo, 'Ndro sisaa titi wi ŋu. Mu gbashia kpↄↄ. Mu chin na ni kuun mna ndaa luu, na kolii mna ni n tɛɛ. 27Na mna wa jin ki yi, ŋga ni pan ŋga, mbe na ki ta, mbra tnu ta ki nu.' 28Bawa u tafun wre na kna mbo, 'E ki shↄ u kɛɛ, e ki wru e ya talɛnti kɛfun wre pan. 29Ŋgi na, Ŋmba uu ka ni mu ki le chichie kre, pie ka ya u pan mbe u ta nɛɛrɛ, la, ŋmba pan fiɛn nyi a u n ki le chiriri kre, ŋga kii wa u pan kre kuraa pie ki shↄ u kɛɛ. 30Kena sumifun lewaa wre, e sɛ u wa wↄmu lawee kre nu, bawa leele we nyɛni, mbe kala nya tataara.' 31Kena na Lewo Pↄ wre na nyjeeri bitumblↄ pre waa pan u yɛnyiŋge kre nu kre, kre nu we paan tni u ŋujↄↄn kre na. 32Kre nu waŋgra leele kro we paan fni u yiɛ. Bawa we pe yↄↄlɛ imi na mbaala lefun u mbaala na u sikaala yↄↄlɛ kre, 33mbe u mbaala pre tɛɛ u kalie kɛ, mbe sikaala pre tɛɛ u kamɛŋɛ. 34Bawa Ŋunu wre we kna mbe yo mblɛ pee wa u kalie kre pan mbo, 'Yire mblɛ ni Lɛ dwan kre, e pan e ŋunumu ŋga pe gbeele mu tɛɛ e pan mu yire waŋgra gbeele nyjila kre wru e li. 35Ŋgi na klo na ni ta, a e na ni ŋga sro a ndaa li a gbↄↄ na ni ta, a e na ni ŋga nyumu a ndaa gbↄ, a ndaa fuŋum li, a e na ni wru mu sɛ katoo. 36Ndaa tro wejiwaara, a e na ni tↄ yoŋgo, a ndaa yaa a e na sɛ ni shaari, a pra ni le nyuŋgo, a e na sɛ ni le.' 37Bawa mblɛ pe pe cheche kre we kna mbe pe Tafun wre wie mbo, 'Ŋgi ble o na mu nya na klo mu ta a o na mu ŋga sro hin? Ndee a gbↄↄ na mu ta a o na mu ŋga nyumu a mna gbↄ hin? 38Ndee ŋgi ble o na mu nya na mu fuŋum lii a o na mu tio mu sɛ katoo hin? Ndee mna mu nya na mu to wejiwaara a e na mu tↄ yoŋgo hin? 39Ndee ŋgi ble o na mu nya nyuŋgo, ndee na mu yaa a o na sɛ mu shaari hin?' 40Bawa Ŋunu wre we kna mbe yo pe pan mbo, 'Kpra na ni yuu e pan na, imi na e pe mu ni chinlɛ fiɛn fiɛn mblɛ wa ŋga kre, mi e pe mu ŋga kre.' 41Mbe Ŋunu wre kna mbe yo mblɛ u kamɛŋɛ kre pan na, 'E laa ni na! Nyiɛkpↄↄ suŋgↄ e yii. E laa ni na. E sɛ ble nyini kanhun ŋga pe gbeele mu tɛɛ Sutna na u nyjeeri bitumblↄ pan kre nu. 42Ŋgi na, Ŋga klo na ni ta, e nsra ni ŋga yaka a ndaa ka; gbↄↄ na ni ta, e nsra ni ŋga nyumu a ndaa gbↄ. 43Ŋga ndaa fuŋum lii, e nsra ni wru mu sɛ katoo, a ŋga ndaa tro wejiwaara, e nsra ni tↄ yoŋgo; a ŋga ndaa yaa, na ŋga pra ni yii mna sɛ le nyuŋgo kre, e nsra ni shaari.' 44Bawa pre we kna mbo, 'O Tafun, nyjila ŋgi nu o na mu nya na klo mu ta, ndee na gbↄↄ mu ta, ndee na mu fuŋum lii, ndee na mu tro wejiwaara, ndee na mu yaa, ndee na pe mu yii mu le nyuŋgo, a o nsra mu le hin?' 45Bawa we kna mbe yo pe pan mbo, 'Kpra na ni yuu e pan, ŋga e n pe mu fiɛn fiɛn mblɛ wa ŋga kre, e n yaka pe mu ni ŋga.' 46Bawa pie flo u jaara mbe sɛ ble nyini kanyana kre nu, la, mblɛ pe fraka kre we sɛ ble nyini ŋmaa kre nu."

will be added

X\