Matio 24

1Ŋga Yesu na yili suminyuŋgo kre nu na shie kre, u twanfɛɛnlɛ pre na pan u jaara mna kna na u nyina suminyuŋgo kre. 2A Yesu na kna mna yo pe pan mbo, "E yirɛ nyjɛ krɛrɛ nyaa. Kpra na ni yuu e pan na pie yi krɛɛrɛ juari mbe wo, dnɛ ka n wa mbe pe ki ti ki ŋmbrↄ na." 3Yesu na yiri wa mna sɛ tni Olive nyua kre na, bawa u twanfɛɛnlɛ pre na pan u jaara wa mna u wie brɛmm mbo, "Jande, o nyina nyjila ŋga nu yire kee nyjɛ krɛrɛ we pan, na kee nyjɛ yie pe mu paan shiin wo kre nu. A na waŋgra kre waa na paan mbe kↄ kre, kee nyji yie pe hin?" 4A Yesu na kna mbo, "E le, e eyɛ dↄↄ ta mbe ndro wa e fana. 5Ŋgi na, leele tataara we pan na ni mɛɛ ni, mbra yuu na, 'Mi wi Kristo wre.' A pie leele tataara wa mbe fun. 6Ee nya na waŋgra na waŋgra, na chia na chia tuni, mbra kakrↄɛ kee ndru, a la, yaa shia fiɛ. Ŋgi na, yire kee nyjɛ krɛrɛ fna mbe pan. La, yire nyjila kre, na nyjila kre n ta mu da tun. 7Waŋgra we yiri mbe wi na waŋgra ni, mbe ŋunu na ŋunu to peyɛ na, mbe klo to waŋgra nu, mbe tra na seeri lawee lawee nu. Na chlↄ yo we se, imi na lɛɛ klu na u yaa kre, pan yire kee nyjɛ we yiɛ klu mbe pe. 9Yire ble yire nu pie e yii mbe leele ŋga mbe pe e fiŋge, mbe e gbo. Mi ndra na, waŋgra leele kro we e pra. 10Kre nyjila kre nu tataara we laa pe shↄnlie kro, mbe pe ŋmbilɛ wↄ mbe ŋga, mbe pe ŋmbilɛ pra. 11Kre nyjila kre kafinɛ Nyiɛkpↄↄ kee nyanyofɛɛnlɛ tataara we yiri mbe lenɛɛrɛ wa mbe fun. 12Kre nyjila kre nu leele ndra we sheli kpↄↄ, mbe ki ti lewo koroo wa jaa sna. 13La, ŋmba we jaa frↄ ta kee nyjɛ krɛrɛ nu kre, we ŋmaa ta. 14A Nyjeeri ŋunumu kre ketaan kre we kpali mbe tro waŋgra kro nu, mbe pe dansiɛrɛ, mbe waŋgra nyukↄↄnrↄ chiin pan. 15'Kena na e waa afuŋgo kee ŋga ki lawee jee kre nya cheche lawee kre nu', ŋga kee Nyiɛkpↄↄ kee nyanyofun Daniel na yo mu tɛɛ kre, kena e ti mbe tↄↄnrifun wre, mbe u kee kre nↄↄ loo. 16Mbe e ti mblɛ pee wa Judea na kre na feni mbra nyua ndru. 17A ŋmba uu wa nyuŋgo ndra na kre, waa shia tii mbe le katoo lam mbe yaka wru. 18A ŋmba uu wa see kre, waa shia ndru mbe pan katoo mbe u yoŋgo bali. 19Yire ble yire nu chiɛlɛ lɛɛfɛɛnlɛ, na mblɛ biile pee fiɛnfiɛn kre, pe atɛ. 20Kena e nyiɛtali mbe kre ble kre waa shia pan weere nyjila na wuuble nu. 21Yaka ndra na ma, ki ble kre we pe kanyana ble kpↄↄ, mu yire waŋgra gbeele nyjila ki ka n da mu pan tun, a ka waa pan ma na fio. 22Nyiɛkpↄↄ we ka kun kanyana ble yire na. Na u n ka kun yi na kre, wa ndro nunu chom ta. Ki tia u yila mblɛ u wↄ kre na, mbe ka kun ble yire na. 23Kena na ndro waa yo e pan mbo, 'E le, Kristo wre wi kre, ndee Kristo wre wi wa kre', yaa shia ufun shↄ mbe li. 24Ŋgi na, kafinɛ Kristoe na kafinɛ Nyiɛkpↄↄ kee nyanyofɛɛnlɛ we yiri yire ble yire nu, mbe kebadɛnyi na kawako kee pe mbe yire yi na mbe lenɛɛrɛ wa mbe fun. Hali mblɛ Nyiɛkpↄↄ wre wↄ kre kuraa, na pie ja, pie pe fana. 25E loo, kre na ni klu na ki yuu e pan mbe nyjila kre chiin da. 26Kena na pe waa yo e pan na e le, uu wa fimi lawee yire nu kre, yaa shia yili mbe sɛ wa. Ndee na pe waa yo e pan na, e le, uu wa mu uyɛ ndra lawee ka nu mna wa kre, yaa shia ki shↄ mbe li. 27Kena imi na nyiɛ nyini yila finhaa mbe nya yila tohaa kre, pan Lewo Pↄ wre paan kre we pe. 28A mna kaara gboo nyi kre, bawa kↄkↄsachie fni. 29Kena na kanyana ble kpↄɛ yire nyu waa to, ndram we wↄ lawee kro nu, a nyiɛpↄ wa jaa fniŋge na, mbe wↄɛlɛɛ na klↄ nyjeeri mbra tuuri tra. Mbe jaŋga ŋga kii wa nyjeeri kro na seeri. 30Bawa pie kee ŋga kie pe Lewo Pↄ wre paan nu kre nya nyjeeri. Kre nu waŋgra ŋga leele kro we nyɛni, a pie Lewo Pↄ wre nya na u paan jaŋga na yɛnyiŋge kpↄↄ ni tloe nu. 31Kre nu we u nyjeeri bitumblↄ tun mbe pe bnↄ badaaŋga fↄ mbe paan u wolo mblɛ u wↄ kre wↄ mbe yili waŋgra kokoe jijirɛ yire nu, mbe sɛ su ki nyukↄↄnrↄ na. 32E fig tiŋge kre yomini kre twan. Na e waa nya na ki wrɛ nyaara kre, kena e chin na ndram wrɛm nyjila dani. 33Kena na e waa nya na yire kee nyjɛ waa na pini kre, kena e chin na nyjila kre dani, kre nyjila kre na ki mbra e na kuraa mu kↄ. 34Kpra na ni yuu e pan, fuŋga leele mblɛ wa kↄ, fↄna yire kee nyjɛ ni yuu ŋga krɛɛrɛ pe tun. 35Nyjeeri na tra we kla, la, ni nyu kee nyjɛ ni yuu ŋga wa pe finfin. 36A ble kre na nyjila kre, ndro n ki chin, nyjeeri bitumblↄ pre n ki chin, hali Nyiɛkpↄↄ Pↄ wre titi kuraa n ki chin, fↄna ni Lɛ wre chiin bↄkↄ. 37Imi na Noa nyjila kre, nyjila ŋga ni nyumu nsra ta mu tra yiɛ tↄ kre, 38na leele kaa, na gboo, a chiɛlɛ na bilɛ naa peyɛ leŋgei, mna sɛ su ŋga ble Noa na le krↄ kre nu. 39Leele nsra chin ŋga ki piin, bawa pra nyi a nyiɛ na pan a lↄↄɛ na nyi mna pe wru peii. Pan chↄↄ Lewo Pↄ wre pan ble kre we leele fo. 40Kre nyjila kre, leele shiin we pe see, mbe pe sɛ nunu wru mbe haŋu wre ti. 41Chiɛlɛ shiin we na yirɛ suu mbe pe nunu wru mbe nunu ti. 42Kena e e ye le chichie. Ŋgi na, Na e n chin ŋga ble e Tafun wre we pan. 43Kena e jawa e chin na, na katoofun na chin ŋga nyjila juo we pan u katoo kre, we na u shie, wa na tni mbra le, mbe pe paan u katoo juari mbe le ki nu. 44Kena yire, e eyɛ shie. Ŋgi na, Lewo Pↄ wre we pan nyjila ŋga ni e n na u kra nu. 45Kena ŋmbi u pe sumifun kprafun, mu pe kachiŋu hin? Wre fun wi ŋmba u tafun we wↄ mbe tɛɛ u katoo sumifɛɛnlɛ kro nyu na, mbe kolo kun, mbe wra pe le mbra pe kaan sro nyjila ŋga ni ki fna nu. 46Na u ja mu pe le, a u tafun wre waa ndru mu pan kre, we dwamu ta u pan. 47Kpra na ni yuu e pan na, na ki pan ma kre, we u tɛɛ u katoo yirɛ kro nyu na. 48La, na sumifun wre waa pe lewo sisaa, maa jawa na u tafun wre mu titi, 49maa sun kre na mu na u ŋmbilɛ sumifɛɛnlɛ pre gbuun, a wre na gbↄgbↄↄlↄ waa na chaa na lii na gboo na tro kre, 50u tafun wre we pan mbe u fo, nyjila ŋga ni u n na u kra nu. 51Bawa we u ndie tini, mbe sɛ u wa yiɛnyumufɛɛnlɛ pre lawee, bawa we nyɛni, mbe kala nya tataara.

will be added

X\