Matio 23

1Bawa Yesu na paara u twanfɛɛnlɛ pre na lenɛɛrɛ pre pan mbo, 2"Mbra nyinafɛɛnlɛ pre na Farisiie pre, Mbose titɛɛ pe nyi mu tni na u mbra yire nyina. 3Kena e ndie tɛɛ pe pan, e li nyjɛ pe e nyina kre na, la, yaa taa pe kepelee na. Ŋgi na, pe paara na e nyina, la, pre titi na taa nyjɛ pe e nyina yire na. 4Pe tuuro nyjɛ leele wa ja pↄ mu pe tio, a pia kɛ le pe pan mbe pe wuu. 5Pe chaa kee nyjɛ pe piin kro mbe leele na yi nyaa. Ŋgi na, pe Nyiɛkpↄↄ nyu kee nyunↄ mu le hlɛ nu, mu yi fra mu pↄ pe nduweele na, na pe kɛnyi na, mu yirɛ pↄ mu hlu pe dodonyi nyu na. 6A na pe sɛ lenɛɛrɛ fninlihaa nu kre, kpↄↄmu lawee pe chaa. A na pe sɛ fninyinyi nu kre, tni hɛɛ chichiele nu pe jiin, 7na lete shaaraa chaa, na chaa mbe leele na pe yeeri nyinafɛɛnlɛ. 8La, yire rɛ, yaa ti mbe pra e yeeri nyinafɛɛnlɛ. Ŋgi na, e nyinafun wree nunu, a e kro ndra yila, nyjↄↄlↄ na chinlɛ lɛ e kro. 9A yaa ndro wa yeeri, 'O lɛ' tra ŋga na. Ŋgi na, e Lɛ wree nunu chom, ŋmba uu wa nyjeeri kre. 10A yaa ti mbe pra e yeeri yiɛkulo. Ŋgi na? E yiɛklo wree nunu, wre wi Kristo wre. 11Kena ŋmba u pe lekpↄↄ e nu kre, u pe e kro tnu. 12La, ŋmba we uyɛ kpↄↄ kre, pie u pe fiɛn. A ŋmba we uyɛ nyjii kre, pie ufun kpↄↄ. 13Yire Judae mbra nyina fɛɛnlɛ na Farisiie, yiɛnyumufɛɛnlɛ, e atɛ. Ŋgi ndra na? E nyjeeri ŋunumu kre kolo tↄ leele na, a yire titi wa sɛ ki nu. A yaa leele mblɛ pie sɛ kre ŋga kolo. E eyɛ pe na e pe cheche mu wɛ ndro kro na, na yiree lete na na nyiɛtali titnↄŋↄ, a nde e lekuchiɛlɛ yirɛ juu pe kalonyi nu. Ki tia e sisam fↄtↄↄrↄ we kpↄↄ. 15Yire Judae mbra nyinafɛɛnlɛ, na Farisiie, yiɛnyumufɛɛnlɛ, e atɛ. E nyaari na shie lee, mbe sɛ ndro nunu chom cha mbe u jawala chinɛ mbe u pe na yire lɛ, a na e u ta mu kↄ kre, mbe ufun sisam fↄtↄↄrↄ kpↄↄ mbe wɛ e na. 16Fuunlo lɛ yire, a e na leele nyina kolo, e atɛ. Yire e yuu leele pan na, na ndro suminyuŋgo kre da na we yaka pe, a u n ja mu ki pe kre, ki n shian, la, na ndro swa nyiɛ ŋga kii wa suminyuŋgo wa kre da kre, kena ufun fna mbe ti u nyu kee pe yɛŋgɛ. 17Fuunlo jijiele lɛ yire, yirɛ shiin nyjɛ, ŋgi ki wɛ ŋgi na hin? Suminyuŋgo ŋga nu swa nyiɛ kre nyi mu ki pe cheche kre ki wɛ, ndee swa nyiɛ kre yi hin? 18Yire chↄↄ e leele nyina na, na wa sra gbunu kre da, ki n shian na we li u nyu kee na, la, na ndro yirɛ nyjɛ pe taa sra gbunu kre na kre da kre, kena ufun fna mbe li u nyu kee na. 19Fuunlo mblɛ, ŋgi haa ki wɛ ŋgi na hin? Sra yirɛ yire yi wɛ ndee, sra gbunu ŋga na pe yirɛ yire taari mbe ki ti yi pe cheche kre yi hin? 20Kena e ti ni yo e pan mbe e loo na, ŋmba we sra gbunu kre da kpan, kena u kre na yirɛ nyjɛ pe taa ki na kre kro da. 21Kena ŋmba we suminyuŋgo kre da kpan, kena u kre na ŋmba u jiin ki nu kre kro da. 22A ŋmba we nyjeeri da kpan, kena u Nyiɛkpↄↄ ŋujↄↄn kre na Nyiɛkpↄↄ wre titi da. 23Yire Judae mbra nyinafɛɛnlɛ na Farisiie, yiɛnyumufɛɛnlɛ, e atɛ. Ŋgi na, e kagblɛ yirɛ chiɛri nyjɛ e taa kre, e yi yↄↄlɛ kɛ mbe Nyiɛkpↄↄ ŋga nunu kama, la, u mbra kee nyjɛ yi sna titi kre e yire wa, yire yi kpra kↄↄn, fooro chiɛn na shↄnlie. Yire kee nyjɛ yi fna e naa piin mbe ya. 24Yire fuunlo mblɛ na shunshun to e simi nu, e wre woni na waa la, na nyuuma to e simi nu kre, e na wre wↄ mbe wa, e wre juru. 25Yire Judae mbra nyinafɛɛnlɛ na Farisiie, yiɛnyumufɛɛnlɛ, e atɛ. Yire e e gbↄ yirɛ na e taahɛɛ krↄ jee mbe yi lam ti, e juuro yirɛ na jajaara yirɛ le yi lam a yi nyi. 26Yire Farisiie fuunlo, e e gbↄ yirɛ na e taahɛɛ lam je tun, e chin e yi krↄɛ je. 27Yire Judae mbra nyinafɛɛnlɛ na Farisiie, yiɛnyumufɛɛnlɛ, e atɛ. Pan e nyi na fanyi nyjɛ pe faanri mu yi fniŋge na penti ni yi, yi nyu fimi na kama, la, gboolo kajle na kafuɛn bribri yi yi lam. 28Kena leele yiɛ na kre, e fraka kama, la, yiɛnyumu kee na sisam bribri yi e lam nyi. 29Yire Judae mbra nyinafɛɛnlɛ na Farisiie, yiɛnyumufɛɛnlɛ, e atɛ. Yire e fawolo Nyiɛkpↄↄ kee nyanyofɛɛnlɛ mblɛ pra fraka a pra pe gbo gbo kre fanyi faanri, mu yi lam san kama. 30Na yuu na, na o naa wa o tolɛɛlɛ pre nyjila, waa na chaa mblɛ pra Nyiɛkpↄↄ kee nyanyofɛɛnlɛ mblɛ gbo gbo kre nu. 31Na e tolɛɛlɛ lɛ mblɛ pra Nyiɛkpↄↄ kee nyanyofɛɛnlɛ pre gbo kre, kena e nyu kee e dansiɛrɛ li mu e taan. 32Kena kee nyjɛ e tolɛɛlɛ na pe kre, e yi taa e pe. 33Leesaala, na leesaala biile, mni ee pe mbe shↄ mbe pia sɛ na e ni kanyana kanhun kre nu hin?" 34A Yesu na kna mbo, "E ti ni yo e pan mbe e loo, mbe Nyiɛkpↄↄ kee nyanyofɛɛnlɛ, na kachimblɛ, na nyinafɛɛnlɛ tun mbe pe pan e pan, mbe e plɛ gbo gbo, mbe plɛ kan kanyana kumu kaan na, a ee plɛ frↄ e fni nyinyi nu, mbe e pe ni mbe pe yili chia na mbe sɛ chia na. 35Kena mu yire Abɛl na mu sɛ su Zakaria, Barachia pↄ ŋmba e tolɛɛlɛ na gbo sra gbuɛnlɛɛ yire na suminyuŋgo kre lalaa kre, na Nyiɛkpↄↄ kee nyanyofɛɛnlɛ mblɛ pra gbo finfin kre kro, pe hakɛɛ wa e na. 36Kpra na ni yuu e pan, pre leele mblɛ krɛrɛ hakɛɛ wa e na. 37Jerusalɛm leele, yire e Nyiɛkpↄↄ kee nyanyofɛɛnlɛ yii mu gbo gbo mu leele mblɛ pe tun e pan waari na dnɛ ni. Nyjila kro nu ni chaa mbe e yii mbe le kuɛn jaara, imi na ŋgolo u biile leni u kuɛn jaara kre, a e je. 38Ki tia mba e shↄ na. 39Kpra na ni yuu e pan, yaa ni nya na fio, fↄna ŋga ble ee na yuu na, 'Ŋmba u paan o Tafun mɛɛ nu kre wo yi dwamu kre bↄkↄ.' "

will be added

X\